Si Jehova a i namangasal ta ollu nga magatawa. Kinagi nittam na Biblia tu pinaratu na Dios i ollu nga babay anna “niyangay na yayya ta lalaki.” Nagayayya nga kinagi ni Adan: “Panguriananna, yaw i tulang na tulangku anna pattag na pattagku.” (Genesis 2:22, 23) Adde ta maddaggun, ikaya ni Jehova nga magayayya i magatawa ira.

Ari tu kagitta na pelikula i pagatawa, nga puru masaya i ending na. Ta kakuruganna, maski i magatawa nga makkinna-iddu ay egga lagapa i luttuag nga problemada ira. (1 Corinto 7:28) Taw nga brosiur , makagigiammuka tu prinsipio ira na Biblia nga nu iyaplikam, magayayya i pagatawa anna familiam.​—Salmo 19:8-11.

I KAGIAN NA BIBLIA: I lalaki i ulu na familia.​—Efeso 5:23.

Nu atawa ka nga lalaki, ekspektan ni Jehova nga tangngallan anna iddukammu i atawam. (1 Pedro 3:7) Pinaratu yayya na Dios nga ka-uffunmu, anna ikayana tu tratuammu nga egga dignidadna. (Genesis 2:18) Mawag tu fermi nga iddukammu anna kanayung nga papolluammu i kawaganna anne nikaw.​—Efeso 5:25-29.

Nu atawa ka nga babay, ekspektan ni Jehova nga kuruga dakal i respetum ta atawam anna uffunammu tapenu makuana i responsabilidadna. (1 Corinto 11:3; Efeso 5:33) Napafutuan nga makikooperaka anna suportammu i desisionna ira. (Colosas 3:18) Nu kuammu ya, makasta anninganna nikaw anna pati ta pagimamma ni Jehova.​—1 Pedro 3:1-6.

NU ANNI MAKUAM:

• Iyavumu ta atawam nu kunnasi ka mabbaling nga mas responsable nga atawa nga lalaki onu babay. Magginnaka tu mapia anna kuammu i ngaming nga adde na mawayyam tapenu manguli

• Mappasensia. Mawag i tiempu tapenu magigiammunu nu kunnasi nga mapagayayya i kataggitadday nikamu

I KAGIAN NA BIBLIA: Mawag nga nonoppammu kanayung i pammakapianan na atawam. (Filipos 2:3, 4) Tagibalorammu i atawam, takkilalammu i karagatan ni Jehova ta aripanna ira nga ‘mawag tu mapia i akkivvulu-vulu ta ngaming nga totolay.’ (2 Timoteo 2:24) “I ari memmugug nga paguvovug ay kagitta na kattag na espada, ngem i zila na masirib ay maka-uru.” Yatun ta piliammu tu mapia i kagiammu. (Proverbio 12:18) Uffunan naka na espiritu ni Jehova nga maguvovug gukaban na kinasippo anna aya.​—Galacia 5:22, 23; Colosas 4:6.

NU ANNI MAKUAM:

• Ipakimallo mu tu mabbaling ka nga kalmadu anna tapenu alawa i pagimamma mu nige nu nga paguvovugan i serioso nga ganna-gannug

• Nonoppammu tu mapia nu anni kagiammu anna nu kunnasim nga kagian

I KAGIAN NA BIBLIA: Nu mangatawa onu makitawa ka, mabbaling kamu tu “tattadday.” (Mateo 19:5) Ngem dua kamu lagapa nga indibidual nga nadduma. Mawag vu tu gigiammuannu nu kunnasi nga mapparehu i panopanono anna panageno nu. (Filipos 2:2) Nu egga desisionannu mawag nga pakkataddayan i nono nu. I kagian na Biblia: “Nu egga i pabbirida, metuppal i plano.” (Proverbio 20:18) Mappegiya kamu ta prinsipio ira na Biblia nu egga importante nga desisionannu.​—Proverbio 8:32, 33.

NU ANNI MAKUAM:

• Ikagim ta atawam nu anni talaga i matageno mu, ari laman tu informasion onu opinionmu ira

• Nige nga makittratu ka ta tanakuan, paguvovugannu labbi nga magatawa