Nagigiammum taw nga brosiur i aru nga prinsipio na Biblia nga makoffun nikaw anna ta familiam. Ikaya ni Jehova nga magayayya kamu. Nepromesana nga nu papolluannu i passerbinu tannisa, ‘iyawa na ngaming i mawag nu.’ (Mateo 6:33) Ikakaya na talaga nga mabbaling ka tu kofun na. Aprobetsammu i kada oportunidad nga mapakastam i pakikofummu ta Dios. Yaw i kadakallan nga pribilehio nga malawa na tadday nga tolay.—Mateo 22:37, 38.

I KAGIAN NA BIBLIA: “‘Sakan noka i yama nu ngana, anna sikamu i ana-ana ku gapa,’ kun-na Yafu [Jehova] nga Makapangngua.” (2 Corinto 6:18) Ikaya na Dios nga mabbaling ka tu madukko nga kofunna. Pakimallo i tadday nga maka-uffun nikaw nga makuam yaw. Imbitannaka ni Jehova nga “makimallo ta ngaming nga tiempu.” (1 Tesalonica 5:17) Ikakaya ni Jehova nga ginnan nu anni i egga ta futum anna nu anni ira kavurungammu. (Filipos 4:6) Nu kavulumu nga makimallo i familiam, matagenoda nga kurug nga persona si Jehova nikaw.

Fuera paga ta pakibbida ta Dios, mawag nga ginnammu yayya. Posible yaw nu gigiammuammu i Uvovugna anna i nebase ta Biblia nga publikasion ira. (Salmo 1:1, 2) Panopanonopan uli nu anni nagigiammum. (Salmo 77:11, 12) Maggigginna ka ta Dios nu kanayung ka nga umay ta paddayarayaw na Kristianu ira.​—Salmo 122:1-4.

I pangilayyagayya meyannung kani Jehova ay tadday paga nga importante nga kuammu tapenu mapatuyag i relasiommu tannisa. Nu kadabes kuammu yaw, mas maddukko ka tannisa.—Mateo 28:19, 20.

NU ANNI MAKUAM:

• Mangiskediul tu inaggaw nga pabbibbig tu Biblia anna makimalloka

• Pappolluan anna tagibaloran na interu familia i espiritual nga aktibidad anne ta pappasa-pasiar anna parrelaks

I KAGIAN NA BIBLIA: “Umaranni kamu ta Dios, ay umaranni yayya nikamu.” (Santiago 4:8) Mangiskediul tu regular nga paddayarayaw na familia anna tuttulan yatun. (Genesis 18:19) Ngem egga paga i mawag nga kuannu. Mawag nga parte nakuan na pattolaynu ta kada aggaw i Dios. Patuyaggan i relasionnu kani Jehova gukaban na pabbirida meyannung tannisa “nu magitubakka ta balem anna nu lumalakagka ta dalan anna nu magiddaka anna nu masikkagka.” (Deuteronomio 6:6, 7) Parigannu nakuan si Josue nga nangikagi: “Nu para niakan anna ta familia, masserbi kami kani Jehova.”​—Josue 24:15.

NU ANNI MAKUAM:

• Egga nakuan regular nga paddayarayaw na familia nga mebagay ta kada miembro