Mawag tam ngaming i kuartu tapenu meyawa i kawagan na familia tam. (Proverbio 30:8) Kakuruganna, “proteksion i kuartu.” (Eclesiastes 7:12) Awayya na nga mariga para tannikamu nga paguvovugan i meyannung ta kuartu, ngem ariannu nga iyanugu nga i kuartu i manaral ta pagatawa nu. (Efeso 4:32) Mawag nga pammakatalakkannu i kataggitadday anna dua kamu nga maddesision nu piga gastuannu.

I KAGIAN NA BIBLIA: “Nu i tadday nikamu ay ikaya na i mappataddag tu tore, magitubang labbi anna karkulan na nu piga i magastu na tapenu innan na nu makalanno i kuartu nga pamalin na ta pataddaggan na.” (Lucas 14:28) Importante nga planuan nu kunnasi nga usan i kuartunu. (Amos 3:3) Ammuannu nu anni i mawag nga gatangannu anna nu piga laman i badyetnu. (Proverbio 31:16) Ari na kaya kagian nga nu egga paggatangnu ay makagagatang kamu. Ari kamu gumatu. Nu anni i badyetnu, yari laman i gastuannu.​—Proverbio 21:5; 22:7.

NU ANNI MAKUAM:

• Nu egga paga navuna nga kuartu ta ngaming nga naggastuan, desisionannu i kuannu tatun

• Nu nakkurang gapa i badyet, plannuan nu kunnasi nga pangarianan i paggastuan. Angngariganna, mas mapia nu mallutu anne ta gumatang tu ready made

I KAGIAN NA BIBLIA: “Karagatammi tu mapammakatalakkan kami ta ngaming nga gannagannug.” (Hebreo 13:18, NW) Kagiammu ta atawam i kurug nga sueldum anna naggastuammu.

Kanayung nga makkiavu ta atawam nige ka magangngua tu madammo nga desision meyannung ta kuartu. (Proverbio 13:10) Nu kuammu ya mabbaling tu memammo i pavvulu nu nga magatawa. Nonoppammu nga kuartu na familia i sueldum, ari nga kukuam laman.​—1 Timoteo 5:8.

NU ANNI MAKUAM:

• Paguvovugannu nu piga i puede gastuan na kataggitadday nikamu maski ariannu ngana nga iyavu

• Ariannu nga innaggan nga makkaproblema kamu nige nga paguvovugannu i kuartu