Nu namegafu ngana i pattolaynu bilang magatawa, nadduruma i mallawan ira nga problema. Awayyana nga gafu yaw ta makkaduma kamu tu appanono, panageno anna pagimamma ta gannagannug. Onu baka naggafu yaw ta tanakuan anna ta ari ekspektan ira nga mesissimmu.

Awayyana nga matentaka nga ikarutan i problema, ngem tabarangngan na ittam na Biblia nga solban i problema ira. (Mateo 5:23, 24) Nu iyaplikam i prinsipio ira na Biblia, masolbanu i problema ira.

I KAGIAN NA BIBLIA: “Egga i . . . tiempu na pabbida.” (Eclesiastes 3:1, 7) Siguraduannu nga egga i tiempunu nga paguvovugan i problema. Kagiammu ta atawam nu anni talaga i egga ta nonomu anna nu kunnasi panagenomu. Ta ngamin nga tiempu, ‘Ari ka malladda-laddug’ ta atawam. (Efeso 4:25) Maski nu makaporay ka ngana, fugaddammu i makiddama. I malumamo nga zila ay kagitta na danum nga sassabbanna i zumozzozzog nga afi.​—Proverbio 15:4; 26:20.

Maski ari ka umanugu, malumamo ka lagapa nakuan, ariammu kattamman nga ipasingan i respetu anna aya ta atawam. (Colosas 4:6) Solban insigida i problema anna lillikannu i ari nga makka-tannuk.​—Efeso 4:26.

NU ANNI MAKUAM:

• Mangiskediul kamu tu tiempu nga paguvovugan i problema

• Nu mabbibida i atawam, ari ka makiggiddang. Innaggammu i tiempum nga mabbida

I KAGIAN NA BIBLIA: ‘Makka-aya-aya kamu ta napasikkal nga pakka-aya-aya na mawwaragi kani Cristo, anna ipasingannu i aya nu nga mangikakua ta kataggitadday.’ (Roma 12:10) Importante nu kunnasi ka nga magginna. Intindiammu i kaya kagian na atawam gukaban na tadday nga “appana-panono . . . anna mappakalinno.” (1 Pedro 3:8; Santiago 1:19) Ariammu magappappe tu maggigginnaka. Nu posible, iyemmammu mabbi i kuammu. Ifokusmu atensionmu ta atawam, onu ikiddom nu puede nga paguvovugannu i problema kabalinna trabahum. Nu kofun i anningammu ta atawam imbes nga kalaban, “ari nga mabi mattaki i nonomu.”​—Eclesiastes 7:9.

NU ANNI MAKUAM:

• Magginnaka nga egga i alawa nga panopanono maski nu ariammu nga ikaya i magigginnam

• Intindiammu nu anni ikaya kagian na atawam. Sifutammu i tono na bosesna anna guyuna

I KAGIAN NA BIBLIA: “Egga i pammakapianan ta kada nabbannaggan, ngem i aru nga bida i makagafu ta pakkurangan.” (Proverbio 14:23) Ari lang nga umanugu ta solusion, mawag tu itrabahu i nadesisionannu. Mariga nga makua yaw, ngem makasta i resulta na nu metrabahum. (Proverbio 10:4) Nu makka-uffun kamu kagitta na team, “egga i makasta nga bala-balo” na nabbannagannu.​—Eclesiastes 4:9.

NU ANNI MAKUAM:

• Nonoppan na kataggitadday nu anni praktikal nga solusion tapenu masolba problema

• Egga nakuan tiempu nga i-monitornu i nagafuanannu