Ta pinamegafu ni Jehova tu familia, neyawa na ta magana i responsabilidad nga manangngal ta ana da. (Colosas 3:20) Responsabilidad mu nga magana nga tudduan i ana mu nga ayatan si Jehova anna dumakal tu responsable. (2 Timoteo 1:5; 3:15) Mawag gapa tu ammuammu nu anni i egga ta futu na ana mu. Siempre, importante i ehemplom. Kakastan nga metuddum i Uvovug ni Jehova ta ana mu nu egga ta mismu nga futum yatun.​—Salmo 40:8.

I KAGIAN NA BIBLIA: ‘Mawag tu siggaparak kamu nga mag- ginna, memmugug ta paguvovug.’ (Santiago 1:19) Ikaya mu nga matageno na ana mu nga mabi ka maranian maski anni nga oras. Mawag tu ammu da nga aggaparang ka nga magginna nira. Kuannu nga memammo i situasion na familia tapenu mabi tannira i mangikagi ta ikaya da. (Santiago 3:18) Nu ammu da nga mapporayka anna minakkritika, baka ariadda ikagi nikaw i egga ta nonoda. Pasensiammu i ana mu, anna kanayung nga ipasingammu i aya mu tannira.​—Mateo 3:17; 1 Corinto 8:1.

NU ANNI MAKUAM:

• Egga nakuan tiempum nu egga ikaya kagian na anamu

• Kanayung nga makibbida ta ana, ari laman nu egga problema

I KAGIAN NA BIBLIA: “I mangipasingan tu pakalippawa ta gannug ay mavviktoria.” (Proverbio 16:20) Mawag nga ari mu laman ginnan nu anni kagiadda, ammuammu i talaga nga panageno da. Natural laman tu masobran na teenager ira i kagiadda onu makagi da i gannug nga ari gamma tu yari i kaya da kagian. “Nu tumabbag i tolay nga ari na paga naginna i detalye, ari tu masirib yayya.” (Proverbio 18:13) Ari ka mapporay insigida.​—Proverbio 19:11.

NU ANNI MAKUAM:

• Magginna ka labbi, ari ka insigida mar-react maski nu anni kagian na ana mu

• Nonoppammu turi ta kagittam yayya anna nu anni importante nikaw

I KAGIAN NA BIBLIA: “Magginna ka, ana ku, ta disiplina na yamam, anna arim pagurayan i instruksion na yenam.” (Proverbio 1:8) Parehu nga iniddan ni Jehova i yama anna yena tu autoridad ta ana. Mawag tu tudduammu i ana mu nga irespetu anna ginnaddaka. (Efeso 6:1-3) Matageno na ana ira nu ari “makka-ana-anugu” i magana da. (1 Corinto 1:10) Ari kamu makkaturia ta arubang na ana nu, ta baka ari na kamu irespetu.

NU ANNI MAKUAM:

• Paguvovugan anna pakka-anugutannu nu kunnasi disiplinan i ana nu

• Nu tanakuan i opinion mu ta atawam meyannung ta paddisiplina ta abbing, intindiammu i kaya na kagian

I KAGIAN NA BIBLIA: “Tudduammu i abbing ta dalan nga lakaranna.” (Proverbio 22:6) I makasta nga kadisiplina na abbing ay ari tu gaggavva laman nga mesimmu. Mawagmu i mapplano, kasali na taw i paddisiplina ta ana. (Salmo 127:4; Proverbio 29:17) I disiplina ay ari laman nga pamalu. Lallagu, uffunammu i ana mu nga matindiadda nu ngatta mawagda i madisiplina. (Proverbio 28:7) Tudduammu gapa ira nga ayatan i Uvovug ni Jehova anna alippawatan i prinsipio na ira. (Salmo 1:2) Manguffun nira yaw nga mapeggan tu marenu nga konsensia.​—Hebreo 5:14.

NU ANNI MAKUAM:

• Siguraduammu nga kurug nga Persona si Jehova ta ana mu nga puede na pammakatalakkan

• Uffunammu ira nga masingan anna malisian i manaral ta moralidadda gitta ira na egga ta Internet anna social network. Tudduammu ira nu kunnasi tammangngan i seksual ira nga minangngabuso