Makapagayayya ngem mariga para ta magatawa i keyana na baby. Bilang bagu nga magana, baka makaddagka nga maggi ngaming nga tiempum anna sikammu ay meyusam ta panangngal ta baby. Manguli i emosion gafu ta kurang ngana i katrug nga mamabbaling tu tensionadu i relasionnu nga magatawa. Mawag nga egga i kuan onu ulian tapenu matangngallan i baby nu anna maladda lagapa i relasionnu. Kunnasi nga makoffun nikamu i tabarang na Biblia tapenu marubannu yaw nga problema?

I KAGIAN NA BIBLIA: “I aya ay pappasensia anna pagallo.” Kunne gapa i aya “ari tu pakkaraga ta pammakapian lagapa na baggi, ari tu pallullussaw.” (1 Corinto 13:4, 5) Nu bagu ka nga yena, natural laman nga egga i atensionmu ta ananu. Ngem baka nonoppan na atawam nga pinagurayammu ngana yayya nga makawag gapa tu atensionmu. Nu minappasensia anna masippo ka, moffunammu nga matageno na nga importante yayya nikaw anna mawagmu gapa yayya ta panangngalmu ta ananu.

“Attawa nga lallaki . . . Itulu-tuluynu nga makipattalupaddiang ta gittawannu sigun ta pakannammu.” (1 Pedro 3:7, NW) Matindiammu nakuan nga aru i tiempu nga mawag na atawam para ta ananu. Egga bagu nga responsabilidadna ira yari tu baka ma-stress, mababbannag, onu madepres. Nu mamittan, mappatu i ulu na nikaw, ngem kalmadu ka laman, gafu ta “i tadday nga ari insigida mapporay mas malalaki anne ta makapangngua nga lalaki.” (Proverbio 16:32) Intindian anna suportammu yayya.​—Proverbio 14:29.

NU ANNI MAKUAM:

• Yama: Uffunammu i atawam maski ta gabi, nga manangngal ta ananu. Pangarianammu i karuan nga trabahum tapenu mas aru i tiempum para ta atawa anna anamu

• Yena: Nu ikaya na atawam i manguffun ta ananu mappoffunka. Nu nakkamali yayya, ariammu nakuan porrian, malumamo nga ituddum nisa nu kunnasi nga kuan yatun

I KAGIAN NA BIBLIA: “Mabbaling ira nga tattadday nga pattag.” (Genesis 2:24) Maski nu egga ngana i bagu nga miembro na familianu, nonoppammu nga “tattadday nga pattag” kamu nga magatawa. Kuannu i ngaming nga mawayyanu tapenu tulu-tuluy i maladda nga relasionnu.

Attawa nga babbay, mabbalabalo kamu ta uffun anna suporta na atawanu. “Makapabannay” i napafutuan nga pangappresia nu. (Proverbio 12:18) Attawa nga lallaki, ikagi nu ta attawanu nu kunnasi kadakal na aya anna pattagibalornu tannira. Appresiannu i pangalagada ta familia.​—Proverbio 31:10, 28.

“Ari tu i pammakapian na baggi nu laman i nonoppan, nu ari i pammakapian na ikattolay nu.” (1 Corinto 10:24) Kanayung nga kuan i pinakamakasta ta atawam. Mabbida kamu kanayung, appresian i makasta nga kingngua anna magginna ta kataggitadday. Ari tu i baggim laman i nonoppammu nu ta seksual nga kawagan. Nonoppan gapa i kawagan na atawam. I kagian na Biblia: “Ari kamu nga makka-itu-itu, fuera laman nu pakka-annugutan nu.” (1 Corinto 7:3-5) Paguvovugannu yatun tu mapia. Malladda i relasionnu nga magatawa nu minappasensia anna minangngalippawa.

NU ANNI MAKUAM:

• Kanayung nakuan nga egga i tiempu nga para tannikamu laman nga dua

• Ipatageno ta atawam tu iddedukammu yayya. Iddammu yayya tu kard onu simple nga regalu maski nu baddi nga gannug laman yatun

I KAGIAN NA BIBLIA: “Namegafu paga gari ta kabbing mu, nannammuam-mu ngana i Masanto ira nga Tura nga mangiyawa ta ka-uto nga mattuppal ta kapaliag.” (2 Timoteo 3:15) Plannuan nu kunnasi nga tuduan i abbingnu. Egga i kattaka-taka nga abilidadna nga maggigiammu nage na paga neyana. Nevussi paga laman i baby, makilala na ngana i boses nu anna matagenona i emosionnu nga dua. Ibibbigannu yayya maski abbing paga. Maski nu ari na paga nga matindian i ibibbibbignu sa, maka-uffun yatun tapenu ma-enjoyna i mabbibbig sonu dakal ngana.

Ariammu nga nonoppan nga kuruga abbing paga tapenu ginnanna i kagiammu meyannung ta Dios. Ipaginnam sa i pakimallo kani Jehova. (Deuteronomio 11:19) Maski nu maggayam kamu, kagiammu sa i gannagannug nga pinaratu na Dios. (Salmo 78:3, 4) Ta paddakal na ananu, matageno na i ayanu kani Jehova anna magiggiammuna gapa nga ayatang si Jehova.

NU ANNI MAKUAM:

• Espesipiko nga kiddawammu ta pakimallo i sirib ta passanay ta anamu

• Itotolim i uvovug anna idea nga ikayamu nga magigiammuna maski nu abbing paga