I pagatawa kebalinanna ay bagu nga familia. Maski nu iddeddukan anna irespetum i maganamu, mas importante ngana i atawam. Awayyana nga mariga ta karuan nga kafamilia onu parientes nga alawatan yaw. Ngem moffunakka na prinsipio ira na Biblia nu kunnasi mabalanse i gannagannug, tapenu kanayung nga memammo i relasionnu ta katugangammu ta pammataddag tu bagu nga familia.

I KAGIAN NA BIBLIA: “Ikakuam i yamam anna yenam.” (Efeso 6:2) Maski anni edadmu, kanayung nga irespetum i maganamu ira. Ariammu kattaman nga ana gapa i atawam. Mawag gapa nga iddanna tu atension i magana na ira. Yari tu, ariammu nonoppan tu kakompetensia ira ta atawam gafu ta “i aya ari tu pamassa-passil.”​—1 Corinto 13:4; Galacia 5:26.

NU ANNI MAKUAM:

• Ariannu ikagi i “Kanayung nga pasirananna na familiam” onu “Awang lang ngana tu fustu nga kingngua ta paningan na yenam”

• Innan i gannagannug sigun ta pagimamma na atawam

I KAGIAN NA BIBLIA: “I tadday nga lalaki panawanna i yama anna yenana anna metadday ta atawana, anna mabbaling ira nga tattadday nga pattag.” (Genesis 2:24) Nu mangatawaka, baka nonoppan na maganamu nga responsabilidad daka paga, anna ikayada nga makialam ira ta pagatawanu maski ari gamma kuruga kawagan.

Egga tannikamu nga magatawa nu anni i pakka-anugutannu nga limitasion na magananu ta relasionnu. Puede nga kagiannu nira yatun ta prangka ngem malumamo. (Proverbio 15:1) Nu minappakalinno, malumamo anna minappasensia kamu, mapeggan kamu tu makasta nga relasion ta kafamilianu. Nu kunnatun, mepasingan i ‘pakka-aya-aya ta pakkapasa-pasensia ta kataggitadday.’​—Efeso 4:2.

NU ANNI MAKUAM:

• Nu matageno mu nga sobra ngana i pangi-alam na katugangammu, paguvovugannu yatun ta atawam nu kalmadu ngana i situasion

• Paddesisionannu nu kunnasi nga arubangan i gannagannug