Ikaya ni Jehova nga tagibalorattam i kinamatalo. (Mikias 6:8) Importante i kinamatalo ta pagatawa gafu ta nu awan yaw, mariga i mattiwala ta kataggitadday. Importante i tiwala tapenu mas malladda i aya.

Ta maddaggun, mabi nga mawawan i tiwala na magatawa ta kataggitadday. Tapenu maprotektan i relasionnu, mawag tu kuannu i dua nga gannug.

I KAGIAN NA BIBLIA: “Siguraduannu i mas importante ira nga gannug.” (Filipos 1:10) I relasionnu nga magatawa i tadday ta pinaka-importante ira nga gannagannug ta pattolem. Mawag nga iprayoridad mu yatun.

Ikaya ni Jehova nga egga ta atawam i atensionmu anna makkavulu kamu nga maenjoy i pattolay. (Eclesiastes 9:9) Kinagina nga arim pagurayan i atawam. Kanayung nga angnguannu i gannagannug nga mamagayayya parehu nikamu. (1 Corinto 10:24) Matageno nakuan na atawam nga kuruga kawagammu anna importante yayya nikaw.

NU ANNI MAKUAM:

• Siguraduammu nga egga kanayung i tiempunu nga dua nga mavvulu, nga i atensionmu ay egga nisa

• Nonoppammu i pammakapianan “nu” ari tu i pammakapianam “mu” laman

I KAGIAN NA BIBLIA: “I sinni laman nga lalaki nga patallunganna ta nono na i maritta nu innan na i babay, nakaliwa ngana ta panallaw.” (Mateo 5:28) Nu siggapanono i tadday ta imoral nga gannagannug, ari yayya matalo ta atawa na.

Kinagi ni Jehova nga “immugurammu i futum.” (Proverbio 4:23; Jeremias 17:9) Tapenu makuam yaw, piliammu i gannagannug nga innammu. (Mateo 5:29, 30) Parigammu i ehemplo na patriarka nga Job nga nakitratu ta mata na nga ari matenta ta tanakuan nga babay. (Job 31:1) Determinadu ka nakuan nga ari maggiraw tu pornograpia. Anna ari ka pulus makirelasion ta akkan tu atawam.

NU ANNI MAKUAM:

• Ipasingammu ta tanakuan nga matalo ka ta atawam

• Ikonsideram i panageno na atawam. Iyemmammu i anni laman nga relasion nga ikalussaw na