LEKSION 04
Sinni i Dios?
Nabayag ngana nga maddayarayaw i totolay ta nadduruma nga dios. Ngem kagian na Biblia nga tattadday laman i kurug nga Dios nga ‘mas makapangngua anne ta maski sinni paga nga dios.’ (2 Cronicas 2:5) Sinni yayya? Ngatta mas makapangngua yayya anne ta maski sinni paga nga dios nga dayawan na totolay? Taw nga leksion, magigiammum nu ngatta kayà na Dios nga makilalam yayya.
1. Anni i ngagan na Dios, anna ngatta makasiguradu ittam nga kayàna nga makilala tam yayya?
Ta Biblia, nipakannammu nittam na Dios i ngaganna. Kinagina: “Sakan si Jehova. Yatun i ngagakku.” (Bibbigan i Isaias 42:5, 8.) Netransleyt tu “Jehova” i Hebreo nga ngagan na Dios nga i kebalinanna “Mawayyana nga Pabbalinan.” Kayà ni Jehova nga mammuattam i ngaganna. (Exodo 3:15) Ngatta makasiguradu ittam tatun? Maturu 7,000 nga nakagi ta Biblia i ngagan na Dios! a I ngagan nga Jehova ay para laman ta “kurug nga Dios ta langi anna ta davvun.”—Deuteronomio 4:39.
2. Anni i kagian na Biblia meyannung kani Jehova?
Kagian na Biblia nga aru nga dios i dayawan na totolay, ngem si Jehova laman i kurug nga Dios. Ngatta? Egga i aru nga rason. Si Jehova laman “i katannangan nga mammaguray ta tanga-ravvunan.” (Bibbigan i Salmo 83:18.) Yayya i “Makapangngua sa Ngamin” megafu ta mawayyana nga kuan i maski anni nga ikayana. ‘Pinarona i ngamin’—i uniberso anna i ngamin nga egga ta davvun. (Nepakannammu 4:8, 11) Awan tu namegafuanan ni Jehova, anna awan tu pangultimuanna.—Salmo 90:2.
GIGIAMMUAN I ARU PAGA
Gigiammuan i nadduman na titulo na Dios ta nerumu-ruma nga ngaganna. Ammuan gapa nu kunnasi anna nu ngatta nipakilalana i ngaganna nittam.
3. Aru i titulo na Dios, ngem tattadday laman i ngaganna
Tapenu masingan i nadduman na titulo ta ngagan, girawan i VIDEO, anna paguvovugan yaw nga pakkiavu.
-
Anni i nadduman na ngagan ta titulo nga kagitta na “Yafu”?
Kagian na Biblia nga aru nga dios anna yafu i dayawan na totolay. Bibbigan i Salmo 136:1-3, anna paguvovugan yaw nga pakkiavu:
-
Sinni i ‘Dios ta ngamin nga dios’ anna i ‘YAFU ta ngamin nga yafu’?
4. Ikaya ni Jehova nga mammuammu anna usammu i ngaganna
Anni i mangipasingan nga kayà ni Jehova nga mammuammu i ngaganna? Girawan i VIDEO, anna paguvovugan yaw nga pakkiavu.
-
Ngatta makagim nga kayà ni Jehova nga mepakannammu i ngaganna?
Ikaya ni Jehova nga usan na totolay i ngaganna. Bibbigan i Roma 10:13, anna paguvovugan yaw ira nga pakkiavu:
-
Ngatta importante nga usammu i ngagan ni Jehova?
-
Anni i matageno mu nu meraddamman na tadday i ngagammu?
-
Anni gapa i matageno ni Jehova nu usammu i ngaganna?
5. Ikaya ni Jehova nga mas maddukko ka nisa
Kinagi ni Soten nga taga-Cambodia nga mas nagayayya yayya turi ta nammuanna i ngagan na Dios. Girawan i VIDEO, anna paguvovugan yaw nga pakkiavu.
-
Ta video, anni i efektona kani Soten turi ta nammuanna i ngagan na Dios?
Nigem mabbalin nga kofun i tadday nga tolay, mawag nga ammuammu labbi i ngaganna. Bibbigan i Santiago 4:8a, anna paguvovugan yaw ira nga pakkiavu:
-
Anni i kayà ni Jehova nga kuammu?
-
Kunnasi ka nga mas maddukko ta Dios nu ammum anna usammu i ngaganna?
I KAGIAN NA KARUAN: “Tattadday laman i Dios, anna ari importante nu anni i pagagal tam nisa.”
-
Kurugammu kari nga Jehova i ngagan na Dios?
-
Kunnasim nga ipakanawag nga kayà na Dios nga usattam i ngaganna?
ANNI I NAGIGIAMMUM?
Jehova i ngagan na kurug nga Dios. Ikayana nga mammuattam anna usattam i ngaganna tapenu maddukko ittam nisa.
Review
-
Ngatta neruma si Jehova ta tanakuan ira nga dios nga dayawan na totolay?
-
Ngatta usattam i ngagan na Dios?
-
Anni i mangipasingan tu ikaya ni Jehova nga maddukko ka nisa?
I AWAYYAM PAGA KUAN
Gigiammuan i lima nga rason nu ngatta mangurug ka nga egga i Dios.
Ngatta ta mepangngo laman nga nonopan nga awan tu namegafuanan anna pangultimuan na Dios?
“Egga Kari i Namaratu ta Dios?” (Passifusifutan, Agosto 1, 2014)
Gigiammuan nu ngatta mepangngo nga usattam i ngagan na Dios maski nu ariattam ammu i fustu nga kevuyana.
Importante kari nu anni i pagagal tam ta Dios? Innan nu ngatta tadday laman i ngagan na Dios.
a Tapenu mammuan i mas aru paga meyannung ta kebalinan na ngagan na Dios anna nu ngatta awan yatun ta karuan nga transleysion na Biblia, innan i Apendise A4 na Bagong Sanlibutang Salin ng Banal na Kasulatan.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
