LEKSION 06
Egga Kari Namaratu?
“Ngamin nga inango ay [Dios] i en-na paggafuan.” (Salmo 36:9) Kurugammu kari yatun? Kurugan na karuan nga totolay nga awan tu namaratu anna gavva ngana laman nga limittuag i ngamin. Ngem egga i namaratu—si Jehova nga Dios. Siguradu gafu nga egga i gakkagna. a Innattam i kagian na Biblia meyannung ta pamaratu anna nu ngatta kurugattam yatun.
1. Kunnasi naparatu i uniberso?
Kagian na Biblia: “Ta gafa-gafu, pinaratu na Dios i langi anna i davvun.” (Genesis 1:1) Kurugan na aru nga sientista nga egga i namegafuanan na uniberso. Kunnasi nga pinaratu na Dios yatun? Niyusana i “aktibo nga fuersana”—i masanto nga espirituna—ta pamaratu ta uniberso, nelavu tatun i galaxy, star, anna planeta ira.—Genesis 1:2.
2. Ngatta pinaratu na Dios i davvun?
Si Jehova nga Dios, “arianna pinaratu [i davvun] nga awan tu sesserbina ngem finormana yatun tapenu paddianan.” (Isaias 45:18) Pinaratu na Dios nga makakkasta i davvun tapenu paddianan na totolay tu mannanayun. (Bibbigan i Isaias 40:28; 42:5.) Kagian na sientista ira nga nerumu-ruma i davvun kumpara ta tanakuan nga planeta. Taw laman nga malegan i ngamin nga kawagan na totolay tapenu mattolay.
3. Ngatta neruma i totolay ta ayam ira?
Kabalin nga pinaratu ni Jehova i davvun, pinaratuna i ngamin nga ganna-gannug. Ollu, kingnguana i mulu-mula anna aya-ayam. Tapus, “pinaratu na Dios i tolay ta imahena.” (Bibbigan i Genesis 1:27.) Ngatta nerumu-ruma i totolay? Megafu ta naparatu ittam ta imahe na Dios, mepasingattam i kualidadna ira kagitta na aya anna hustisia. Egga gapa i abilidad tam nga maggigiammu tu tanakuan nga lengguahe, magayayya ta makakkasta ira nga gannug, anna ta musika. Mawayya tam nga dayawan i Namaratu nittam, nga ari nga makua na ayam ira.
GIGIAMMUAN I ARU PAGA
Ammuan i ebidensia nga egga i namaratu anna nu ngatta kurugattam i kagian na Biblia meyannung ta pamaratu. Ammuan nu anni i magigiammu tam meyannung ta Dios megafu ta kualidad tam ira.
4. Egga i naddisenio
Medayaw i totolay gafu ta disenio ira nga kinopiada ta naparatu ira. Sinni gafu i mepangngo nga medayaw ta orihinal ira nga disenio? Girawan i VIDEO, anna paguvovugan yaw nga pakkiavu.
-
Anni ira nga pinaratu na Dios i pinarigan na totolay?
Egga i naddisenio anna namataddag ta kada balay. Sinni gafu i naddisenio anna namadday ta ngamin nga ganna-gannug? Bibbigan i Hebreo 3:4, anna paguvovugan yaw ira nga pakkiavu:
-
Anni ira nga naparatu i kakayà mu i nikadiseniona?
-
Ngatta kurugammu nga egga i naddisenio ta uniberso anna ta ngamin nga ganna-gannug?
Ammum kari?
Malegammu ta jw.org/ibg i artikulo anna video ira meyannung taw nga topiko ta serye nga “Egga Kari i Naddisenio?” anna “Pangurug ta Naggafuan na Inango.”
“Kurug tu tolay i namataddag ta kada balay, ngem i Dios i nangngua ta ngamin nga ganna-gannug”
5. Egga ira i rason tapenu kurugan i kagian na Biblia meyannung ta pamaratu
Mabibbig ta Genesis kapitulo 1, nu kunnasi naparatu i davvun anna i ngamin nga egga tatun. Kurug kari yatun, onu appe laman nga istoria? Girawan i VIDEO, anna paguvovugan yaw ira nga pakkiavu.
-
Ituddu kari na Biblia nga naparatu i davvun anna i ngamin nga egga tatun ta unag laman na annam nga aggaw nga sinaggi-24 oras?
-
Rasonable anna fustu kari i kagian na Biblia ta pamaratu? Ngatta?
Bibbigan i Genesis 1:1, anna paguvovugan yaw nga pakkiavu:
-
Kagian na sientista ira nga egga i namegafuanan na uniberso. Kunnasi nga suportan yatun na nabibbig mu nga teksto?
Nonopan na karuan nga totolay nu niyusa kari na Dios i ebolusion ta pamaratu. Bibbigan i Genesis 1:21, 25, 27, anna paguvovugan yaw ira nga pakkiavu:
-
Ituddu kari na Biblia nga namaratu i Dios tu simple laman ira nga gannug anna nipamavulunna tu i ebolusion i mamabbalin tatun tu manango, ayam ira, anna totolay? Onu pinaratuna i ngamin nga “klase” na ganna-gannug? b
6. Nerumu-ruma nga pinaratu i totolay
Ari tu kagitta na ayam i pinamaratu ni Jehova nittam. Bibbigan i Genesis 1:26, anna paguvovugan yaw nga pakkiavu:
-
Megafu ta naparatu ittam ta imahe na Dios, anni i magigiammu tam ta nisa megafu ta egga i abilidad tam nga mangipasingan tu aya anna allo?
I KAGIAN NA KARUAN: “Ari tu kurug i kagian na Biblia meyannung ta pamaratu.”
-
Kurugammu kari yatun? Ngatta?
ANNI I NAGIGIAMMUM?
Si Jehova i namaratu ta interu uniberso anna ta ngamin nga egga tatun.
Review
-
Anni i ituddu na Biblia nga namegafuanan na uniberso?
-
Niyusa kari na Dios i ebolusion, onu pinaratuna i ngamin nga ganna-gannug?
-
Ngatta nerumu-ruma i totolay?
I AWAYYAM PAGA KUAN
Gigiammuan i karuan ta pinaratu ira nga mamakurug nga egga i naddisenio.
“Anni i Magigiammu Tam ta Pinaratu Ira?” (Malukag!, Setiembre 2006)
Innan nu kunnasi usan na tadday nga yama i Biblia tapenu ipakanawag ta anana i meyannung ta pamaratu.
Gigiammuan nu suportan na Biblia i ebolusion.
“Niyusa Kari na Dios i Ebolusion Tapenu Mamaratu?” (Artikulo ta website)
a Magigiammu ta Leksion 25 i gakkag na Dios para ta totolay.
b Ta Biblia, tumukoy i “klase” ta ngamin nga gannug nga sigga-matolay.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
