LEKSION 09
Umaranni Ka ta Dios ta Pakimallo
Natageno mu kari ngana nga kawagammu i uffun? Egga kari i pakkiavu mu ira nga kayà mu matabbag? Kawagammu kari i banna-bannay? Kayà mu kari nga mas maddukko kani Jehova? Makoffun nikaw i pakimallo. Ngem kunnasi i fustu nga pappakimallo? Ginnan kari na Dios i ngamin nga pakimallo? Anni i kuammu tapenu siguradu nga ginnanna i pakimallo mu? Innattam.
1. Sinni i paddasallattam, anna anni i awayya tam ipakimallo?
Nituddu ni Jesus nga makimallo ittam laman ta nelangitan nga Yama tam. Nakimallo mismu si Jesus kani Jehova. Kinagina: “Kunnoye gafu i akkimallo nu: ‘Ama mi nga egga ta langi . . . ’” (Mateo 6:9) Nu makimallo ittam kani Jehova, maddukko i pakikkofuttam nisa.
Awayya tam ipakimallo i maski anni. Ngem siempre, tapenu ginnan na Dios i pakimallo tam ira, mawag nga ari mekontra yatun ta urayna. “Tangngagan na ittam [na Dios] ta anni laman nga kiddawat-tam sa nga metuttul ta uray na.” (1 Juan 5:14) Nangiyawa si Jesus tu angngarigan nu anni ira i awayya tam nga ipakimallo. (Bibbigan i Mateo 6:9-13.) Fuera paga ta personal ira nga gannug, ariattam nakuan kattaman nga mappabalo ta Dios ta kikkingnguana para nittam, anna ipakimallo tam gapa nga uffunanna i tanakuan.
2. Kunnasi ittam makimallo?
Ipagaram na Biblia: “Ngamin i vuru-vurung nu en-nu sa nga kagian.” (Salmo 62:8) Mawag gafu nga napafutuan i pakimallo tam. Awayya tam makimallo tu masikan onu silensio anna ta maski anni nga marespeto nga posision. Awayya tam gapa makimallo ta maski anni nga oras anna maski sitaw i diattam.
3. Kunnasi nga tabbagan na Dios i pakimallo tam ira?
Nadduruma i panabbagna ta pakimallo tam ira. Niyawa ni Jehova i Uvovugna, i Biblia. Malegattam tatun i tabbag ta pakkiavu tam ira. Nu bibbigattam i Uvovug na Dios, mabbalittam tu “ma-uto.” (Salmo 19:7; bibbigan i Santiago 1:5.) Uffunan ittam ni Jehova nga mabbalin tu kalmadu nu meparubang ittam ta kapurueba ira. Awayyana gapa nga paguyuan i aripanna ira nga uffunan ittam nu kawagattam.
GIGIAMMUAN I ARU PAGA
Ammuan nu anni i kuammu tapenu napafutuan i pakimallo mu ira anna makapagayayya ta Dios. Ammuammu gapa nu kunnasi ka nga mabenefisiowan nu makimallo ka.
4. I ikiddaw na Dios nu makimallo ittam
Anni i kuattam tapenu akseptan na Dios i pakimallo tam? Girawan i VIDEO.
Kayà ni Jehova nga makimallo ittam nisa. Bibbigan i Salmo 65:2, anna paguvovugan yaw ira nga pakkiavu:
-
Kayà kari na Dios nga makimallo ka nisa? Ngatta?
Mawag nga mattolay ittam segun ta estandarte ira na Dios tapenu ginnanna i pakimallo tam ira. Bibbigan i Mikias 3:4 anna 1 Pedro 3:12, anna paguvovugan yaw nga pakkiavu:
-
Kunnasi ittam makasiguradu nga ginnan ni Jehova i pakimallo tam ira?
Nu egga gerra, parehas nga ipakimallo na makkalaban nga grupo nga mangaffu ira. Ekspektattam kari nga tabbagan na Dios i pakimalloda?
5. Mawag nga napafutuan i pakimallo tam ira
Memoriadu na karuan nga totolay i pakimalloda. Ngem kunnatun kari i kayà na Dios nu makimallo ittam nisa? Bibbigan i Mateo 6:7, anna paguvovugan yaw nga pakkiavu:
-
Kunnasim nga malillitan nga itotoli nga “vuyatan i kuruga aru nga uvovug” nu makimallo ka?
Ta kada aggaw, mannono ka tu bendision nga nalawa mu nga awayyam ipappabalo kani Jehova. Nu kuammu yatun ta unag na tanga-ligguan, egga i pitu nga nadduruma nga gannug nga mepakimallo mu.
Kayà na minaggiddu nga yama nga kagian nisa na anana i egga ta futuna. Kayà gapa ni Jehova nga napafutuan nga makimallo ittam nisa
6. Regalu na Dios i pakimallo
Kunnasi ittam mapasikan na pakimallo mas ngana nu egga i problema tam? Girawan i VIDEO.
Ipasiguradu na Biblia nga makoffun i pakimallo tapenu mabbalin tu memammo i nono tam. Bibbigan i Filipos 4:6, 7, anna paguvovugan yaw ira nga pakkiavu:
-
Kunnasi nga makoffun i pakimallo maski nu ari gapa nga kanayun nga masolba i problema tam kabalittam makimallo?
-
Anni ira i kayà mu nga ipakimallo?
Ammum kari?
I kebalinan na termino nga “amen” ay “paray nakuan” onu “siguradu.” Namegafu paga ta tiempo na Biblia, mevuyà i “amen” ta ultimu na kada pakimallo.—1 Cronicas 16:36.
7. Makimallo ka nakuan kanayun
Aru i kuattam nu karuan, yatutta makattamattam ngana i makimallo. Kunnasi ka-importante kani Jesus i pakimallo? Bibbigan i Mateo 14:23 anna Marcos 1:35, anna paguvovugan yaw ira nga pakkiavu:
-
Anni i kingngua ni Jesus tapenu egga i tiempona nga makimallo?
-
Anni i kuammu tapenu egga i tiempom nga makimallo?
I KAGIAN NA KARUAN: “Awan tu meyuffun na pakimallo.”
-
Anni i makagim?
ANNI I NAGIGIAMMUM?
Nu napafutuan i pakimallo tam ira, mas maddukko ittam ta Dios, memammo i nono tam, anna mapasikan ittam nga kuan nu anni i makapagayayya kani Jehova.
Review
-
Sinni i paddasallattam?
-
Kunnasi ittam makimallo?
-
Kunnasi ittam mabenefisiowan ta pakimallo?
I AWAYYAM PAGA KUAN
Ammuan i tabbag ta gagangay ira nga pakkiavu meyannung ta pakimallo.
“Pitu nga Gannug nga Mawag tu Mammuammu Meyannung ta Pakimallo” (Passifusifutan, Oktubre 1, 2010)
Gigiammuan nu ngatta mawag nga makimallo ka anna nu kunnasim mas mapakasta i pakimallo mu.
Ammuan i tuttuddu na Biblia nu sinni i mawag nga paddasallattam.
“Mepangngo Kari nga Maddasal Ngà ta Santo Ira?” (Artikulo ta website)
Taw nga music video, ammuan nu sitaw onu kanni ittam puede nga makimallo.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
