LEKSION 10
Kunnasi Ka Mabenefisiowan ta Study na Saksi ira ni Jehova?
Nembita ka kari ngana ta study na Saksi ira ni Jehova? Awayyana nga mavuru-vurung ka nu nonopammu nga magatende ka. Baka meyavu mu: ‘Anni i kukukuadda ta study? Ngatta importante yatun? Ngatta mawag nga magatende ngà?’ Taw nga leksion, magigiammum nu kunnasi ka nga mas maddukko ta Dios anna moffunakka nu magatende ka ta study.
1. Ngatta mattaradday i Saksi ira ni Jehova?
Kinagi na tadday nga nattura ta Biblia i pinaka-importante nga rason nu ngatta kawagan nga mattaradday. “Ta pattaraddayan na ngamin nga totolay na, i YAFU ay ek-ku daya-rayawan.” (Salmo 26:12) Magayayya gapa i Saksi ira ni Jehova nga mattaradday. Ta interu mundo, mattaradday ira ta kada ligguan tapenu dayawan i Dios, makkansion, anna makimallo. Ta kada ragun, egga gapa ira i darakal nga pattaraddeda tapenu dayawan si Jehova.
2. Anni i magigiammum ta study?
Ta study, usammi i Uvovug na Dios ta pattuddu anna “ipaka-pakanawag yatun tu mapia anna mangiyayawa tu kebalinanna.” (Bibbigan i Nehemias 8:8.) Nu magatende ka, magigiammum i meyannung kani Jehova anna i makakkasta ira nga kualidadna. Nu mas aru i mammuammu meyannung ta ayana nikaw, mas nga maddukko ka nisa. Magigiammum gapa nu kunnasi naka nga moffunan tapenu makapagayayya i pattolem.—Isaias 48:17, 18.
3. Kunnasi ka nga moffunan na totolay ira nga makilalam ta study?
Kinagi ni Jehova nga “nonopat-tam nu kunnasi na pakka-uffu-uffut-tam nga mangipasingan ta aya anna pangngua ta mapia. Ariat-tam nga immangan i paggarammammung tam.” (Hebreo 10:24, 25) Makilalam ta study i totolay ira nga kurug tu ayatadda i kataggi-tadday, anna kagittam nga interesadu gapa nga maggigiammu meyannung ta Dios. Maginnam i makapagaram ira nga komentoda nga nebase ta Biblia. (Bibbigan i Roma 1:11, 12.) Makilalam gapa i karuan nga sigga-atawan anna awan paga tu atawada nga magayayya maski nu aru i problemada. Yaw i karuan laman ira nga rason nu ngatta kayà ni Jehova nga regular nga mattaradday ittam!
GIGIAMMUAN I ARU PAGA
Ammuammu nu anni i kukukuan na Saksi ira ni Jehova ta study, anna nu ngatta pammakapianattam i pagatende taw ira nga study.
4. I study na Saksi ira ni Jehova
Regular nga mattaradday tapenu maddayaw kani Jehova i ollu-siglo ira nga Cristiano. (Roma 16:3-5) Bibbigan i Colosas 3:16, anna paguvovugan yaw nga pakkiavu:
-
Anni i kukukuan na nappollu ira nga Cristiano ta paddayawda kani Jehova?
Regular gapa nga mattaradday i Saksi ira sangawe ta lugar nga paddayarayawadda. Tapenu mammuammu i kukukuadda ta study, girawan i VIDEO. Kabalinna, innan i letratu na study na kongregasion anna paguvovugan yaw ira nga pakkiavu.
-
Anni i nasingammu nga napparehuan na kukukuadda ta Kingdom Hall anna ta nabibbig mu ta Colosas 3:16?
-
Ta video onu ta letratu, anni i nagustuammu meyannung ta study?
Bibbigan i 2 Corinto 9:7, anna paguvovugan yaw nga pakkiavu:
-
Ngatta awan tu mapagan ta study na Saksi ira ni Jehova?
Kavulu i mab-Bible study nikaw, innannu i magigiammu ta study taw nga ligguan.
-
Anni i parte na study i kayà mu onu i makoffun nikaw?
Ammum kari?
Ta jw.org/ibg, masingammu i iskediul na study ira ta interu mundo.
-
Ta study, egga i palappa, demonstrasion, anna video ira. Mamegafu anna mangultimu yatun ta kansion anna pakimallo
-
Egga gapa ira i parte nga puede makkomento i nagatende ira
-
Malawa i ngamin—familiadu, awan tu atawana, mannakam, anna abbarabbing
-
Awan tu mapagan ta study mi. Ari nga makkolekta i Saksi ira ni Jehova tu kuartu
5. Mawag i pappursigi ta pagatende ta study
Innattam i ehemplo na familia ni Jesus. Tapenu makaatende ta zinagun nga okasion, lumakag ira tu piga nga aggaw ta vuku-vukig maggafu ta Nazaret mappange ta Jerusalem. Bibbigan i Lucas 2:39-42, anna paguvovugan yaw ira nga pakkiavu:
-
Ngatta mawagda i mappursigi nga umay ta Jerusalem?
-
Ngatta mawag mu gapa i mappursigi tapenu makaatende ka ta study ira?
-
Pammakapianammu kari i pagatende ta study ira maski nu marigatakka? Ngatta?
Kagian na Biblia nga importante i pattaradday tapenu dayawan si Jehova. Bibbigan i Hebreo 10:24, 25, anna paguvovugan yaw nga pakkiavu:
-
Ngatta regular nakuan nga magatende ittam ta study ira?
I KAGIAN NA KARUAN: “Ari ngana kawagan i umay ta study. Makalanno ngana i paggigiammu tu Biblia maski ta balay laman.”
-
Anni nga teksto onu angngarigan ta Biblia i mangipasingan ta ikaya ni Jehova?
ANNI I NAGIGIAMMUM?
Makoffun i pagatende ta study tapenu mas magigiammum i meyannung kani Jehova, mas maddukko i pakikkofummu nisa, anna makapaddayaw ka nisa kavulu i tanakuan.
Review
-
Ngatta ipagaram ni Jehova nga mattaradday ittam?
-
Anni i magigiammum ta study na Saksi ira ni Jehova?
-
Para nikaw, anni paga i meyuffun na pagatendem ta study ira?
I AWAYYAM PAGA KUAN
Mavuru-vurung ka kari nu nonopammu nga magatende ka ta study? Ammuan nu anni i nakoffun ta tadday nga lalaki tapenu magustuanna i magatende ta study ira.
Innan nu ngatta kakayà na tadday nga kabataan i makistudy, anna nu anni i kingnguana tapenu kanayun nga makaatende.
Ammuan nu anni i matageno na karuan ta pagatendeda ta study ira.
“Ngatta Makasta nu Magatende Ka ta Study ta Kingdom Hall?” (Artikulo ta website)
Ammuan nu kunnasi nga nanguli i tadday nga vayolente nga miembro na gang kabalinna nga nagatende ta study na Saksi ira ni Jehova.
“Agga-vulu Ku Kanayun i Palattug Ku” (Passifusifutan, Hulio 1, 2014)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
