LEKSION 11
Nu Kunnasi Ka Mabenefisiowan ta Pabbibbig tu Biblia
Egga kari i kayà mu igafu nga proyekto ngem kuruga mariga? Tapenu ariammu marigatan, awayyam bili-billayan yatun. Kunnatun gapa ta pabbibbig tu Biblia. Baka meyavu mu, ‘Kunnasì igafu i pabbibbig?’ Magigiammu taw nga leksion nu anni i makoffun nikaw tapenu magustuammu i mabbibbig anna maggigiammu tu Biblia.
1. Ngatta regular nga bibbigattam i Biblia?
Magayayya anna makasta i pattuppalan na tolay nga regular nga mabbibbig tu Biblia, onu “Dob na YAFU.” (Bibbigan i Salmo 1:1-3.) Puruebammu i mabbibbig maski piga laman nga minuto ta kada aggaw. Nu mas mabbalikka tu familiar ta Uvovug na Dios, mas ma-enjoy mu i mabbibbig tu Biblia.
2. Anni i kuammu tapenu mabenefisiowakka ta pabbibbig tu Biblia?
Tapenu mabenefisiowakka ta pabbibbig tu Biblia, mawag nga pannonopammu tu mapia i bibbibbigammu. Bibbigan anna “monag nga pannonopan” yatun. (Josue 1:8, footnote) Ta pabbibbig mu, awayyam iyavu: ‘Anni i magigiammù taw meyannung kani Jehova nga Dios? Kunnasì meyaplika yaw? Kunnasì meyusa yaw nga teksto tapenu uffunan i tanakuan?’
3. Anni kuammu tapenu egga i tiempom nga mabbibbig tu Biblia?
Marigatakka kari nga mapeggan tu tiempo nga mabbibbig tu Biblia? Aru ta nittam i marigatan. Yari tu mawag nga “kuan nu ngamin i adde na awayya nu.” (Efeso 5:16) Usammu tu mapia i tiempom gukaban na pangiskediul mu ta pabbibbig tu Biblia kada aggaw. Iniskediul na karuan nga mabbibbig tu Biblia ta ummumma. I karuan gapa, ta tangnga na aggaw kabalidda kuman. Gabi gapa ta karuan nigeda makkatrug. Anni gapa i kapianan nga oras para ta nikaw?
GIGIAMMUAN I ARU PAGA
Gigiammuan nu kunnasi mabbalin tu mas makapa-interes i pabbibbig mu tu Biblia. Ammuan gapa nu kunnasi ka mapprepara tapenu mabenefisiowakka ta paggigiammum tu Biblia.
Awayyam magigiammu nga magustuan i nadduruma nga makan, awayyam gapa magigiammu nga magustuan i pabbibbig tu Biblia
4. Magenjoy ta pabbibbig tu Biblia
Awayyana nga mariga igafu i pabbibbig tu Biblia. Ngem awayyam magustuan yatun, nu kunnasi nga awayyam magigiammu nga magustuan i makan nga bagu laman nga nasissimammu. Bibbigan i 1 Pedro 2:2, anna paguvovugan yaw nga pakkiavu:
-
Kunnasim nga mas magustuan i pabbibbig tu Biblia nu kada aggaw mu nga kuan yatun?
Girawan i VIDEO anna innan nu kunnasi nagustuan na karuan i pabbibbig tu Biblia. Kabalinna, paguvovugan i tumunug ira nga pakkiavu.
-
Ta video, anni i neparubang ta kabataan ira?
-
Anni i nakoffun nira tapenu regular nga mabibbigda i Biblia?
-
Anni i kingnguada tapenu mas makapa-interes i pabbibbigda tu Biblia?
Suhestion ira ta pangigafu ta pabbibbig:
-
Mappili tu mapammakatalakkan, anna mabi malippawa nga transleysion. Bibbigan i New World Translation nu available yatun ta lengguahem, onu ta lengguahe nga mantindiammu.
-
Igafum nga bibbigan i rekord na Biblia nga kuruga paginteresammu. Innan i chart nga “Igafu i Pabbibbig tu Biblia.”
-
Irekord i nabibbig mu. Usan i chart nga “Irekord i Pabbibbig Mu tu Biblia” nga egga taw nga publikasion.
-
Usan i JW Library®app. Awayyam bibbigan anna ginnan i Biblia ta smartphone onu ta gadyet mu maski sitaw i diammu.
-
Usan i apendise ta Bagong Sanlibutang Salin. Egga i mapa, chart, anna glosari tatun tapenu mas maginteres ka ta pabbibbig.
5. Mapprepara nige na kada Bible study
Bibbigan i Salmo 119:34, anna paguvovugan yaw nga pakkiavu:
-
Ngatta makasta nu makimallo ka labbi nigem mabbibbig tu Biblia onu mapprepara para ta Bible study?
Kunnasi ka mas mabenefisiowan ta kada pab-Bible study? Nu mapprepara ka ta kada leksion, puruebammu i tumunug ira:
-
Bibbigan i ollu ira nga parapo na leksion.
-
Bibbigan i teksto ira, anna alippawatan i koneksionna ta giggigiammuammu.
-
Markan i tabbag ta kada pakkiavu; makoffun yaw ta paggigiammum kavulu i manuddu ta nikaw.
Ammum kari?
Mangusa i Saksi ira ni Jehova tu nadduruma nga transleysion na Biblia. Ngem mas kayàda i Bagong Sanlibutang Salin ng Banal na Kasulatan megafu ta mapammakatalakkan, mabi malippawa, anna mabibbig tatun i ngagan na Dios.—Innan i artikulo ta website nga “Egga Kari i Sarili nga Biblia na Saksi ira ni Jehova?”
I KAGIAN NA KARUAN: “Mariga i maggigiammu tu Biblia. Awan tu tiempò nga maggigiammu anna nababbannag ngà.”
-
Anni i makagim tatun?
ANNI I NAGIGIAMMUM?
Tapenu mas mabenefisiowakka ta Biblia, magangngua ka tu iskediul mu ta pabbibbig tatun, ipakimallo mu nga mantindiammu i bibbibbigammu, anna mapprepara ka nige na kada Bible study.
Review
-
Kunnasi ka nga mas mabenefisiowan ta pabbibbig tu Biblia?
-
Anni i kapianan nga tiempo para nikaw ta pabbibbig anna paggigiammu tu Biblia?
-
Ngatta makasta i mapprepara nige na kada Bible study?
I AWAYYAM PAGA KUAN
Innan i karuan paga nga makoffun nikaw tapenu mas mabenefisiowakka ta pabbibbig tu Biblia.
“Kunnasi Mas Mabenefisiowan ta Pabbibbig tu Biblia?” (Passifusifutan Num. 1 2017)
Innan i tallu nga makuam tapenu bibbigan i Biblia.
“Kunnasi Ngà Moffunan na Biblia?—Part 1: Bibbigan i Biblia” (Artikulo ta website)
Ammuan nu kunnasi mabbalin tu makapa-interes i pabbibbig tu Biblia.
Makagigiammu ta suhestion ira na nabayag ngana nga mabbibbibbig tu Biblia.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
