LEKSION 12
Anni i Makoffun Tapenu Metulu-tuloy Mu i Paggigiammu tu Biblia?
Aru i benefisio na paggigiammu tu Biblia ngem mariga kuan yatun nu karuan. Baka manono mu nu awayyam paga kari metuloy i mappa-Bible study. Anni i benefisiona nu ari ka magimmang? Anni i makoffun nikaw tapenu metulu-tuloy mu maski nu aru i problema?
1. Ngatta importante i pab-Bible study?
“I uvovug na Dios ay matotolay anna makapangngua.” (Hebreo 4:12) Nabalor i Biblia megafu ta mammuattam taw i appana-panono na Dios anna i matagenona nikaw. Moffunan naka nga mapeggan tu pakannammu, sirib, anna iddanama. Moffunan naka gapa nga mabbalin tu kofun ni Jehova. Nu gigiammuammu i Biblia, makoffun yatun tapenu makkasta i pattolem.
2. Ngatta importante nga masingattam i balor na kinakurug ta Biblia?
Kagitta na nabalor ira nga minas i kinakurug ira ta Biblia. Yatutta ipagaram na Biblia nga “gatangammu i kinakurug anna kammu vuluvuga ilaku yatun.” (Proverbio 23:23) Nu agga-nono tam i balor na kinakurug ta Biblia, kuattam i adde na mawayya tam tapenu metulu-tuloy i paggigiammu maski nu egga ira i problema.—Bibbigan i Proverbio 2:4, 5.
3. Kunnasi naka moffunan ni Jehova tapenu metulu-tuloy mu i pab-Bible study?
Megafu ta si Jehova i makapangngua nga Namaratu anna Kofun, ikaya naka uffunan nga gigiammuan i meyannung nisa. Meddan naka tu ‘pakkaraga anna pakawayya nga mamarulo ta uray na.’ (Bibbigan i Filipos 2:13.) Yatutta uffunan naka nu kawagammu paga i determinasion tapenu maggigiammu onu iyaplika i magiggigiammum. Iyawana paga i sikan nga kawagammu tapenu maarubang i problema onu pangokkontra ira. Ipakimallo mu kanayun kani Jehova nga uffunan naka tapenu metulu-tuloy mu i pab-Bible study.—1 Tesalonica 5:17.
GIGIAMMUAN I ARU PAGA
Gigiammuan nu kunnasim metulu-tuloy i pab-Bible study maski nu gittana awan tu tiempom onu kontran naka na tanakuan, anna nu kunnasi naka uffunan ni Jehova nga mattulu-tuloy.
4. Prayoridad mu nakuan i pab-Bible study
Nu mittan, aru i kuattam yatutta gittana awan ngana tu tiempo tam ta pab-Bible study. Anni i makoffun? Bibbigan i Filipos 1:10, anna paguvovugan yaw ira nga pakkiavu:
-
Para nikaw anni i “kapianan” onu importante ira nga gannug?
-
Kunnasim meprayoridad i pab-Bible study?
-
Nu pagolluammu nga ipay ta baldi i daga nige na batu, ari nga makkasya i batu
-
Nu pagolluammu nga ipay ta baldi i batu, maggi mepay mu ngamin i daga. Kunnatun gapa nu pagolluammu i importante ira nga gannug, siguradu nga mebalimmu yatun anna egga paga i tiempom ta tanakuan ira nga gannug
Meyawa na paggigiammu tu Biblia i espiritual nga pakawagattam—i pakawagan nga ammuan anna dayawan i Dios. Bibbigan i Mateo 5:3 NW, anna paguvovugan yaw nga pakkiavu:
-
Anni i benefisio nga malawa tam nu pabbalinattam nga prayoridad i pab-Bible study?
5. Ari magimmang maski nu makokkontra
Awayyana nga kontran na karuan i paggigiammum tu Biblia. Innan i ekspiriensa ni Francesco. Girawan i VIDEO, anna paguvovugan yaw ira nga pakkiavu.
-
Ta video, anni i reaksion na kokkofun anna kafamilia ni Francesco turi ta kinagina ta nira i magiggigiammuna?
-
Anni ira i nalawana nga bendision?
Bibbigan i 2 Timoteo 2:24, 25, anna paguvovugan yaw ira nga pakkiavu:
-
Anni i reaksion na familiam anna kokkofummu ira ta magiggigiammum?
-
Segun ta teksto, anni i kuammu nu kokkontran naka na tanakuan ta paggigiammum tu Biblia? Ngatta?
6. Mattalo ka nga uffunan naka ni Jehova
Nu maddukko ittam kani Jehova, mas kayà tam nga pagayayyatan yayya. Ngem awayyana nga marigatattam nga ulian i pattoletam segun ta estandartena. Nu kunnatun i matageno mu, ari nakuan nga makkafi i nono mu. Uffunan naka ni Jehova. Girawan i VIDEO, anna paguvovugan yaw ira nga pakkiavu.
-
Ta video, anni ira i inuli ni Jim tapenu mapagayayyana si Jehova?
-
Anni i nakayatammu ta ekspiriensana?
Bibbigan i Hebreo 11:6, anna paguvovugan yaw ira nga pakkiavu:
-
Anni i kuan ni Jehova ta “magaleg sa”—i totolay nga kuadda i mawayyada tapenu mammammu anna mapagayayya yayya?
-
Segun ta teksto, anni i matageno ni Jehova nu masinganna i pappursigim nga mab-Bible study?
BAKA IYAVU NA KARUAN: “Ngatta mappa-Bible study ka?”
-
Anni i tabbag mu?
ANNI I NAGIGIAMMUM?
Maski nu mariga nu karuan, makoffun i paggigiammum tu Biblia tapenu magayayya ka nga mattolay tu mannanayun. Mattalo ka nga kanayun kani Jehova, anna siguradu nga bendisionan naka.
Review
-
Ngatta tagibalorammu i kinakurug ira ta Biblia?
-
Kunnasim pilian i “kapianan” ta ngamin?
-
Ngatta mappoffukka kani Jehova tapenu metulu-tuloy mu i pab-Bible study?
I AWAYYAM PAGA KUAN
Ikonsidera i appa nga metodo nga nakoffun ta totolay ira tapenu meyusada i tiempoda ta kapianan.
“Nu Kunnasim Usan i Tiempom ta Kapianan” (Malukag!, Pebrero 2014)
Innan nu kunnasi nga inuffunan ni Jehova i tadday nga babay maski nu ari nga mantindian na atawana nu ngatta kayàna nga pagayayyatan i Dios.
Pasikannan Ittam ni Jehova Tapenu Meyakka Tam i Agga-kattu Tam (5:05)
Innan nu kunnasi nabenefisiowan i tadday nga lalaki ta appursigi na atawana.
Nu mittan, akusadda i Saksi ira ni Jehova nga mamassirina ta familia. Ngem kurug kari yatun?
“Mamassirina Kari ta Familia i Saksi ira ni Jehova onu Mamattaradday?” (Artikulo ta website)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
