LEKSION 13
Nu Kunnasi nga Makadaral ta Dios i Falsu nga Relihion
Nu i Dios ay aya, ngatta napakaru i marake nga kukukuan na relihion ira nga makkakkagi nga irepresentada i Dios? I rason, falsu gare yatun ira nga relihion. Makadaral ta Dios i kukukuan anna ituttudduda. Kunnasi? Anni i matageno na Dios tatun? Anni i kuanna noka tatun?
1. Kunnasi nga makadaral ta Dios i tuttuddu na falsu nga relihion?
I falsu nga relihion ay “panakitad-da i kurug meyannung ta Dios anna kurugad-da i siri” onu laddug. (Roma 1:25) Angngariganna, ari nga ituddu na aru nga relihion ta tagatuttulda i ngagan na Dios. Ngem kagian na Biblia nga mawag nga meyusa i ngagan na Dios. (Roma 10:13, 14) Kagian na karuan nga lider na relihion nga uray na Dios i marake nga mesissimmu. Ngem ari tu kurug yatun. Ari vuluvuga nga magangngua tu marake i Dios. (Bibbigan i Santiago 1:13.) Megafu tatun nga mali nga tuttuddu, marigatan i totolay nga ayatan i Dios.
2. Kunnasi nga makadaral ta Dios i kukukuan na falsu nga relihion?
Ari nga kagitta na pattratu ni Jehova i pattratu na falsu nga relihion ta totolay. Kagian na Biblia nga i falsu nga relihion ay “navuttul ngana i katagarulian na, makadde ngana ta langi ta karu na.” (Nepakannammu 18:5) Ta piga nga siglo, aru nga relihion i nakialam ta pulitika, sinuportadda i gerra ira, anna ira i makagafu onu inaprubadda i kapatay na aru nga totolay. Kayà na karuan nga lider na relihion i marriku yatutta makkikkiddaw ira tu kuartu ta tagatuttulda. Masingan ta kukukuadda nga ariadda ammammu i Dios, yatutta awan tu kepangngattadda nga irepresenta yayya.—Bibbigan i 1 Juan 4:8.
3. Anni i matageno na Dios ta falsu nga relihion?
Nu ikalussom i kukukuan na falsu nga relihion, anni gapa i matageno ni Jehova? Ayatanna i totolay, ngem kalussona i lider ira na relihion nga manara-daral nisa anna marake i pattratuda ta tagatuttulda. Nipromesana nga daralanna i falsu nga relihion anna “awan noka ngana” yatun. (Nepakannammu 18:21) Aranni ngana nga daralan na Dios i ngamin nga falsu nga relihion.—Nepakannammu 18:8.
GIGIAMMUAN I ARU PAGA
Gigiammuan paga i matageno na Dios ta falsu nga relihion, anna i kingnguada ira. Ammuammu gapa nu ngatta ari nakuan nga makefugag yaw ta nikaw tapenu ammuan si Jehova.
4. Ari tu ngamin nga relihion ay akseptan na Dios
Aru nga totolay i mangurug nga i relihion ira ay gittana aru nga dalan nga mappange ta Dios. Ngem kurug kari yatun? Bibbigan i Mateo 7:13, 14, NW anna paguvovugan yaw nga pakkiavu:
-
Anni i kagian na Biblia meyannung ta dalan nga mappange ta inango?
Girawan i VIDEO, anna paguvovugan i tumunug nga pakkiavu.
-
Kagian kari na Biblia nga aru nga relihion i makapagayayya ta Dios?
5. Ari nga mepasingan na falsu nga relihion i aya na Dios
Makadaral ta Dios i aru nga kukukuan na relihion ira. Tadday tatun i pakiparteda ta gerra. Girawan i VIDEO tapenu masingan i tadday nga angngarigan. Kabalinna, paguvovugan i tumunug ira nga pakkiavu.
-
Kunnasi nga nakiparte i relihion ira ta World War II?
-
Anni i makagim tatun nga kingnguada?
Bibbigan i Juan 13:34, 35 anna 17:16. Kabalinna, paguvovugan yaw ira nga pakkiavu:
-
Anni i matageno ni Jehova ta pakiparte na relihion ira ta gerra?
-
I falsu nga relihion i makagafu ta aru nga kinamarake. Kunnasi nga ari mepasingan na falsu nga relihion i aya na Dios?
Ari nga nipasingan na falsu nga relihion i aya na Dios
6. Kayà na Dios nga uffunan i totolay nga panawan i falsu nga relihion
Bibbigan i Nepakannammu 18:4, a anna paguvovugan yaw nga pakkiavu:
-
Anni i matageno mu ta nammuammu nga kayà na Dios nga uffunan i totolay ira nga nelogo na falsu nga relihion?
7. Itulu-tuloy nga gigiammuan i meyannung ta kurug nga Dios
Ipamavulummu kari nga mafektan na falsu nga relihion i pagimamma mu ta Dios? Nonopan i tadday nga ana nga ari nga nagginna ta yamana. Nanaw yayya ta baleda anna nakakua tu marake ira nga gannug. Ari nga kayà na yama i kiningngua ira na anana. Ngatta ari mepangngo nga ipaliwa ta yama i marake nga pinattolay na rebelyoso nga anana?
-
Paliwatattam kari gapa si Jehova ta marake nga kukukuan na falsu nga relihion anna magimmang ittam ngana nga gigiammuan i meyannung nisa?
I KAGIAN NA KARUAN: “Ari ngà mangurug ta Dios megafu ta relihion i kegafuan na aru nga problema.”
-
Kunnatun kari gapa i matageno mu?
-
Ngatta ari nakuan mafektan na kukukuan na falsu nga relihion i pagimamma tam kani Jehova?
ANNI I NAGIGIAMMUM?
Makadaral ta Dios i mali nga tuttuddu na falsu nga relihion anna i marake nga kukukuadda. Daralan noka na Dios i falsu nga relihion.
Review
-
Anni i matageno mu ta tuttuddu na falsu nga relihion anna ta kinikkingnguada?
-
Anni i matageno na Dios ta falsu nga relihion?
-
Anni noka i kuan na Dios ta falsu nga relihion?
I AWAYYAM PAGA KUAN
Gigiammuan i kukukuan ira na relihion nga mamallussaw ta Dios.
Ngatta kayà ni Jehova nga maddayaw ittam nisa kavulu i tanakuan?
“Mawag Kari nga Parte Ka na Tadday nga Relihion?” (Artikulo ta website)
Nadduda i tadday nga pari ta relihionna. Ngem ari tu yaw i nakefugag sa tapenu gigiammuan i kinakurug meyannung ta Dios.
“Nu Ngatta Pinanawan na Tadday nga Pari i Relihionna” (Malukag!, Pebrero 2015)
Nabayag ngana nga ituttuddu na falsu nga relihion i kinaladdug meyannung ta Dios, yatutta abbo na totolay nga awan tu pangikavurungna anna maporay yayya. Ammuan i kinakurug meyannung tatun.
“Kinaladdug nga Nakefugag ta Karuan nga Ayatan i Dios” (Passifusifutan, Nobiembre 1, 2013)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
