LEKSION 14
Kunnasi Makapagayayya ta Dios i Paddayaw Tam?
Nagigiammu ta nappasa nga leksion nga ari tu ngamin nga relihion ay makapagayayya ta Dios. Ngem awayya tam maddayaw ta Namaratu nga makapagayayya nisa. Anni nga klase na paddayaw onu “relihion” i makapagayayya ta nisa? (Santiago 1:27) Ammuattam i ituddu na Biblia.
1. Nakebaseyan nakuan na paddayaw tam?
Nebase nakuan ta Biblia i paddayaw tam. Kinagi ni Jesus ta Dios: “I uvovug mu ay kurug.” (Juan 17:17) Ari tuttulan na aru nga relihion i kinakurug nga egga ta Uvovug na Dios, i Biblia. Sinalianadda yatun tu tuttuddu anna tradisiodda ira. Ari magayayya si Jehova ta totolay nga ‘mallikug ta Dob na Dios.’ (Bibbigan i Marcos 7:9.) Mapagayayya tam i Dios nu nebase ta Biblia i paddayaw tam anna tuppalattam i bili-bilinna.
2. Kunnasi nakuan i paddayaw tam kani Jehova?
Si Jehova laman i mepangngo nga dayawattam megafu ta yayya i Namaratu nittam. (Nepakannammu 4:11) Mawag nga ayatattam yayya anna yayya laman i dayawattam, anna ariattam mangiyusa tu rebultu, imahen, onu santo.—Bibbigan i Isaias 42:8.
Mawag nga “masanto anna makapagayaya” i paddayaw tam kani Jehova. (Roma 12:1) Mattolay tam gafu segun ta moral nga estandartena. Angngariganna, ayatan anna tuttulan na mangaya ira kani Jehova i estandartena meyannung ta pagatawa. Lillitadda i marake ira nga bisiu, kagitta na pangusa tu tabaku onu pangabuso ta droga onu binarayang. a
3. Ngatta dayawattam nakuan si Jehova kavulu i kapangngurug tam ira?
Ta study tam kada ligguan, egga i oportunidad tam nga ‘dayawan i YAFU ta paggarammammungan.’ (Salmo 111:1, 2) Tadday tatun i pakkansion tu paddayaw ta Dios. (Bibbigan i Salmo 104:33.) Ikaya ni Jehova nga magatende ittam ta study megafu ta ayatanna ittam anna makoffun yaw tapenu magayayya ittam nga mattolay tu mannanayun. Ta study, mapagaram tam i kataggi-tadday.
GIGIAMMUAN I ARU PAGA
Gigiammuan nu ngatta manaki ni Jehova nga mangusa ittam tu imahen ta paddayaw nisa. Innattam i importante ira nga makua tam tapenu medayaw i Dios.
4. Ari ittam nakuan mangusa tu imahen ira ta paddayaw tam
Ngatta makagi tam nga ari tu makapagayayya yatun ta Dios? Girawan i VIDEO, anna paguvovugan yaw nga pakkiavu.
-
Anni i nesimmu ta karuan nga totolay na Dios ta tiempo na Biblia turi ta nangusa ira tu imahen ta paddayaw ta nisa?
Matageno na karuan nga totolay nga mas aranni ira ta Dios nu mangusa ira tu imahen ta paddayawda. Ari tamma nga mas umarayyu nira i Dios? Bibbigan i Exodo 20:4-6 anna Salmo 106:35, 36, anna paguvovugan yaw ira nga pakkiavu:
-
Anni ira nga gannug onu imahen i nasingammu nga iyusa na totolay ta paddayawda?
-
Anni i matageno ni Jehova ta pangusa ta imahen?
-
Anni i makagim ta pangusa tu imahen?
5. Nu si Jehova laman i dayawattam, mapalubbangan ittam ta falsu ira nga tuttuddu
Innan nu kunnasi ittam mapalubbangan ta falsu ira nga tuttuddu nu fustu i paddayaw tam kani Jehova. Girawan i VIDEO.
Bibbigan i Salmo 91:14, anna paguvovugan yaw nga pakkiavu:
-
Anni i nipromesa ni Jehova nga kuanna nu ayatattam yayya anna yayya laman i dayawattam?
6. Dayawattam i Dios ta study ta kongregasion
Medayaw tam si Jehova anna mapasikattam i kataggi-tadday gukaban na pakkansion anna pakkomento tam ta study. Bibbigan i Salmo 22:22, anna paguvovugan yaw ira nga pakkiavu:
-
Kakayà mu kari nga ginnan i komento na wawwaragi ta study?
-
Kayà mu kari i mapprepara tu komentom para ta study?
7. Magayayya si Jehova nu ikagi tam ta tanakuan i nagigiammu tam
Aru i makua tam tapenu mekagi tam ta tanakuan i kinakurug ira ta Biblia. Bibbigan i Salmo 9:1 anna 34:1, anna paguvovugan yaw nga pakkiavu:
-
Anni i nagigiammum ta Biblia nga kayà mu ikagi ta tanakuan?
I KAGIAN NA KARUAN: “Imposible nga mapagayayya tam i Dios.”
-
Anni i makagim?
ANNI I NAGIGIAMMUM?
Mapagayayya tam i Namaratu nu yayya laman i dayawattam, magatende ittam ta study, anna ikagi tam ta tanakuan i nagigiammu tam.
Review
-
Kunnasi tam magigiammu i paddayaw nga makapagayayya ta Dios?
-
Ngatta si Jehova laman nakuan i dayawattam?
-
Ngatta maddayaw ittam nakuan kavulu i totolay ira nga ikayada nga pagayayyatan i Dios?
I AWAYYAM PAGA KUAN
Ta istoria nga “Napalubbangan Ngà Ngana ta Passerbi tu Idolo,” bibbigan nu kunnasi niyemmang na tadday nga babay i passerbi ta idolo.
“Pakastan na Biblia i Pattolay” (Passifusifutan, Hulio 1, 2011)
Gigiammuan nu anni i makoffun nikaw tapenu makapakkomento ka ta study.
“Dayarayawattam si Jehova ta Kongregasion” (Passifusifutan, Enero 2019)
Innan nu kunnasi nabenefisiowan i tadday nga lalaki ta pagatendena ta study maski nu marigatan yayya nga kuan yatun.
Mangurug i aru nga totolay nga konektadu i krus ta paddayaw na Cristiano. Ngem mepangngo kari nga usattam yatun ta paddayaw tam?
“Ngatta Ari Mangusa tu Krus i Saksi ira ni Jehova ta Paddayawda?” (Artikulo ta website)
a Magigiammu yaw ira nga topiko ta tumunug ira nga leksion.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
