LEKSION 17
Anni i Personalidad ni Jesus?
Nu gigiammuattam i kinagi anna kiningngua ira ni Jesus ta keggana ta davvun, mammuattam i kualidadna ira nga mas mamaddukko nittam ta nisa kunnatun gapa ta Yamana nga si Jehova. Anni ira yatun nga makakkasta nga kualidad? Kunnasi tam nga maparigan si Jesus?
1. Kunnasi naparigan ni Jesus i Yamana?
Nakavulu ni Jesus ta langi i minaggiddu nga Yamana ta binillion nga dagun anna nakagigiammu yayya ta nisa. Yatutta napariganna i appana-panono, panageno, anna kukukuan na Yamana. (Bibbigan i Juan 5:19.) Naparigan tu mapia ni Jesus i personalidad na Yamana yatutta nakagina: “I nakasingan niakan ay nasingan na ngana gapa i Yama.” (Juan 14:9) Ta paggigiammum ta personalidad ni Jesus, mas makilalam tu mapia si Jehova. Angngariganna, i pangikabbi ni Jesus ta totolay ira, ipasinganna nu anni i mataga-tageno ni Jehova nikaw.
2. Kunnasi nipasingan ni Jesus nga ayatanna si Jehova?
Kinagi ni Jesus: “Kuak-ku ngamin i ipakua na Yama tapenu kannammuan na mundo tu ayatak-ku yaya.” (Juan 14:31) Ta kegga ni Jesus ta davvun, nipasinganna i dakal nga pangayana ta Yamana gukaban na panuttulna ta nisa maski nu egga i tiempo nga mariga kuan yatun. Kakayà ni Jesus nga iyistoria ta tanakuan i meyannung ta Yamana anna uffunanna ira nga makikkofun ta Nisa.—Juan 14:23.
3. Kunnasi nga nipasingan ni Jesus i ayana ta totolay?
Kagian na Biblia nga “netallugaring nga kakayà [ni Jesus] i ána na totolay.” (Proverbio 8:31) Nipasingan ni Jesus i ayana gukaban na pamagaramna anna panguffunna ta totolay. Nagangngua gapa yayya tu milagro nga mangipasingan nga egga i pakapangngua anna allona. (Marcos 1:40-42) Masippo yayya ta ngamin nga totolay anna ari mangireruma. Makapabannay i uvovugna anna mangiyawa yatun tu iddanama ta masippo i giffutuadda nga magginna ta nisa. Sigga-paran si Jesus nga mazziga-riga anna matay megafu ta ayana ta totolay. Ngem mas ayatanna i tumuttuttul ta tudduna ira.—Bibbigan i Juan 15:13, 14.
GIGIAMMUAN I ARU PAGA
Ammuan paga i meyannung ta personalidad ni Jesus, anna nu kunnasi tam maparigan i pangipasinganna tu aya anna kinavuka-palag.
4. Iddukan ni Jesus i Yamana
Magigiammu tam ta ehemplo ni Jesus nu kunnasi tam mepasingan i aya tam ta Dios. Bibbigan i Lucas 6:12 anna Juan 15:10; 17:26. Ta kabibbig na kada teksto, paguvovugan yaw nga pakkiavu:
-
Kunnasi tam maparigan si Jesus, anna ipasingan nga ayatattam si Jehova?
Iddeddukan ni Jesus i nelangitan nga Yamana anna kanayun yayya nga nakiyuvovug nisa ta pakimallo
5. Ikavurungan ni Jesus i totolay ira nga makawag
Pinagollu ni Jesus i pakawagan na totolay anne ta baggina. Maski nu nababbannag yayya, inusana i tiempo anna sikanna tapenu uffunan i totolay. Bibbigan i Marcos 6:30-44, anna paguvovugan yaw ira nga pakkiavu:
-
Taw nga rekord, kunnasi nipasingan ni Jesus i pangikavurunna ta tanakuan?—Innan i versikulo 31, 34, 41, anna 42.
-
Ngatta inuffunan ni Jesus i tanakuan?—Innan i versikulo 34.
-
Megafu ta masingan kani Jesus i personalidad ni Jehova, anni i magigiammum tatun meyannung kani Jehova?
-
Kunnasi tam maparigan i pangikavurung ni Jesus ta tanakuan?
6. Vuka-palag si Jesus
Vuka-palag si Jesus maski nu baddi laman i material nga pakkukuana, anna pagarammanna gapa ittam nga mabbalin tu vuka-palag. Bibbigan i Kingngua 20:35, anna paguvovugan yaw nga pakkiavu:
-
Segun kani Jesus, kunnasi ittam magayayya?
Girawan i VIDEO, anna paguvovugan yaw nga pakkiavu.
-
Kunnasi ittam mangiyawa maski nu mariga ittam laman?
Ammum kari?
Ituddu na Biblia nga usattam i ngagan ni Jesus nu makimallo ittam kani Jehova. (Bibbigan i Juan 16:23, 24.) Nu kuattam yatun, mepasingattam i pappabalo tam ta panguffunna nittam nga mabbalin tu kofun ni Jehova.
I KAGIAN NA KARUAN: “Awan tu pakialam na Dios ta pazziga-riga tam.”
-
Megafu ta masingan kani Jesus i personalidad na Yamana, kunnasi pakurugan na kingnguana ira nga ikavurungan ittam ni Jehova?
ANNI I NAGIGIAMMUM?
Iddukan ni Jesus si Jehova anna i totolay. Kagitta ni Jesus i Yamana, yatutta nu mas mammammum yayya, mas makilalam gapa si Jehova.
Review
-
Kunnasi tam mepasingan i aya tam kani Jehova kagitta na kingngua ni Jesus?
-
Kunnasi tam mepasingan i aya tam ta totolay kagitta na kingngua ni Jesus?
-
Anni i kakayà mu nga personalidad ni Jesus?
I AWAYYAM PAGA KUAN
Gigiammuan i kualidad ira ni Jesus nga awayya tam parigan.
“Mabbalin tu Kagitta ni Jesus” (Si Jesus—I Dalan, i Kurug, Anna Inango, pahina 317)
Gigiammuan nu ngatta mawag nga makimallo ittam ta ngagan ni Jesus.
“Ngatta Makimallo Ittam ta Ngagan ni Jesus?” (Passifusifutan, Pebrero 1, 2008)
Egga kari i kagian na Biblia meyannung ta itchura ni Jesus?
Anni i magigiammu tam ta pinattratu ni Jesus ta babbay?
“Kayà na Dios nga Merespeto i Babbay” (Passifusifutan, Setiembre 1, 2012)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
