LEKSION 20
Nu Kunnasi Maorganisa i Kongregasion
Si Jehova ay Dios na unnug. (1 Corinto 14:33) Ekspektattam gafu nga organisadu gapa i totolena. Kunnasi nga maorganisa i kongregasion Cristiano? Kunnasi tam masuportan yatun tapenu mattalupaddian nga organisadu?
1. Sinni i ulu na kongregasion?
Si “Cristo i ulu na kongregasion.” (Efeso 5:23, NW ) Egga yayya ta langi, anna irolluanna i aktibidad ira na totolay ni Jehova ta interu mundo. Sinunno ni Jesus “i mekatalo anna nannono nga doroban”—baddi nga grupo na elder ira nga manakam ta espiritual, nga magalan tu Manangngal nga Baggi. (Bibbigan i Mateo 24:45-47.) Kagitta na ollu-siglo nga apostol anna elder ira ta Jerusalem, mangiyawa tu direksion i Manangngal nga Baggi ta kongregasion ira ta interu mundo. (Kingngua 15:2) Ngem ari ira nga lider na organisasiottam. Mappegiya ira kani Jehova anna ta Uvovugna, anna makimoray ira kani Jesus bilang uluda.
2. Sinni i elder ira anna anni i kukukuadda?
Cristiano nga lallaki nga manakam ta espiritual i elder ira. Manuddu ira nga nebase ta Katurakan anna tangngalladda i totolay ira ni Jehova gukaban na panguffun anna pamagaram nira. Awan tu suelduda. Masserbi ira ‘ari tu megafu ta mataddanan ira, nu ari, megafu ta pangayada nga masserbi.’ (1 Pedro 5:1, 2) Uffunan na ministerial ira nga aripan i elder ira. Awayyana gapa noka nga makualipika i ministerial ira nga aripan bilang elder.
Manunno i Manangngal nga Baggi tu karuan nga elder ira nga masserbi bilang manangngal ta sirkito. Mabbisita ira ta kongregasion tapenu mangiyawa tu instruksion anna pamagaram. Usadda i nebase-Biblia ira nga kualipikasion ta panunnoda ta elder anna ministerial ira nga aripan.—1 Timoteo 3:1-10, 12; Tito 1:5-9.
3. Anni i responsibilidad na kada tadday nga Saksi?
I ngamin ta kongregasion ay ‘maddayarayaw ta ngagan na YAFU’ nga si Jehova gukaban na pakipartisipada ta study ta kongregasion anna kuadda i ngamin nga mawayyada tapenu mallayyagayya.—Bibbigan i Salmo 148:12, 13.
GIGIAMMUAN I ARU PAGA
Ammuan nu anni nga klase nga lider si Jesus, nu kunnasi nga parigan na elder ira i ehemplona, anna nu kunnasi tam masuportan si Jesus anna i elder ira.
4. Masippo nga lider si Jesus
Egga i makakkasta nga imbitasion nittam ni Jesus. Bibbigan i Mateo 11:28-30, anna paguvovugan yaw nga pakkiavu:
-
Anni nga klase nga lider si Jesus, anna anni i kayàna nga matageno tam?
Kunnasi nga parigan na elder ira i ehemplo ni Jesus? Girawan i VIDEO.
Manawag nga ituddu na Biblia ta elder ira nu kunnasida nga kuan i responsibilidadda.
Bibbigan i Isaias 32:2 anna 1 Pedro 5:1-3, anna paguvovugan yaw ira nga pakkiavu:
-
Anni i matageno mu megafu ta paparigan na elder ira si Jesus ta pamanna-bannay ta tanakuan?
-
Kunnasi paga maparigan na elder ira si Jesus?
5. Manuddu i elder ira gukaban na ehemploda
Anni i kayà ni Jesus nga pagimamma na elder ira ta responsibilidadda? Girawan i VIDEO.
Nangiyawa si Jesus tu estandarte para ta mangirollu ira ta kongregasion. Bibbigan i Mateo 23:8-12, anna paguvovugan yaw nga pakkiavu:
-
Anni i nadduman na estandarte na Biblia para ta elder ira ta masingammu nga kukukuan na lider ira na relihion?
-
Pasikannan na elder ira i espiritualidadda anna na familiada
-
Ikavurungan na elder ira i ngamin ta kongregasion
-
Regular nga mallayyagayya i elder ira
-
Manuddu i elder ira. Manguffun ira ta pappakarenu anna ta karuan paga nga trabahu
6. Suportan i elder ira
Kagian nittam na Biblia nu ngatta mawag nga suportattam i elder ira. Bibbigan i Hebreo 13:17, anna paguvovugan yaw ira nga pakkiavu:
-
Rasonable kari i kagian na Biblia nga makimoray anna tumulu ittam ta mangirollu ira? Ngatta?
Bibbigan i Lucas 16:10, anna paguvovugan yaw nga pakkiavu:
-
Ngatta importante nga makimoray ittam ta elder ira maski ta simple laman ira nga gannug?
I KAGIAN NA KARUAN: “Ari ngana tu mawag nga makisali ta tadday nga relihion.”
-
Anni i manono mu tu benefisiona ta tadday nu dayawanna i Dios kavulu i kongregasion?
ANNI I NAGIGIAMMUM?
Si Jesus i ulu na kongregasion. Makimoray kani Jesus i elder ira yatutta magayayya ittam nga suportan ira megafu ta banna-bannayan anna tudduadda ittam gukaban na ehemploda.
Review
-
Sinni i ulu na kongregasion?
-
Kunnasi uffunan na elder ira i kongregasion?
-
Anni i responsibilidad na kada tadday nga maddayaw kani Jehova?
I AWAYYAM PAGA KUAN
Innan i pamakurug ta dakal nga pangikavurung na Manangngal nga Baggi anna karuan paga nga elder ta Cristiano ira.
Ammuan i trabahu nga kuan na manangngal ira ta sirkito.
Gigiammuan i responsibilidad na babbay ta kongregasion.
“Egga Kari i Babbay nga Ministro na Saksi ira ni Jehova?” (Passifusifutan, Setiembre 1, 2012)
Gigiammuan nu kunnasi pagaramman na elder ira i kapangngurugda.
“Elder Ira—Makipattrabahu Para ta Pagayayya Tam” (Passifusifutan, Enero 15, 2013)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
