LEKSION 21
Kunnasi Melayyagayya i Mapia nga Dumug?
Aranni ngana nga alsan ni Jehova i ngamin nga problema gukaban na Pappatulanna. Makakkasta yatun nga dumug yatutta mawag nga mammuan na ngamin. Ikaya ni Jesus nga ilayyagayya na tagatuttulna yatun nga mensahe ta ngamin nga totolay! (Mateo 28:19, 20) Kunnasi nga tuttuttulan na Saksi ira ni Jehova yatun nga bilin ni Jesus?
1. Kunnasi matuttuppal i Mateo 24:14?
Kinagi ni Jesus: “Melayya-gayya noka ta tanga-ravvunan yaw nga Mapia nga Dumug na Pammaguray na Dios tapenu kannammuan na ngamin nga sinolay.” (Mateo 24:14) Magayayya i Saksi ira ni Jehova nga makiparte taw nga importante nga trabahu. Melayyagayya i mapia nga dumug ta interu mundo ta maturu 1,000 nga lengguahe! Alawa anna aru i matrabahu yatutta kawagan i pappursigi anna makasta nga pangorganisa. Kawagan gafu i uffun ni Jehova tapenu metuppal yaw nga trabahu.
2. Kunnasi kami mappursigi tapenu layyagayyan i totolay?
Layyagayyammi i totolay maski nu sitaw i diadda. Kagitta na ollu-siglo ira nga Cristiano, mallayyagayya kami ta “babalay ira.” (Kingngua 5:42) Megafu taw nga metodo, malayyagayyan i minillion nga totolay kada dagun. Megafu ta ari nga kanayun nga egga ta balay i totolay ira, mallayyagayya kami gapa ta publiko ira nga lugar. Kanayukkami magaleg tu chansa tapenu ikagi ta tanakuan i meyannung kani Jehova anna ta gakkagna ira.
3. Sinni i makarresponsibilidad ta pangilayyagayya ta mapia nga dumug?
Responsibilidad na ngamin nga kurug nga Cristiano nga ilayyagayya i mapia nga dumug ta ngamin nga totolay. Kuammi i adde na mawayya mi para taw nga responsibilidad. Ikagumammi nga mallayyagayya megafu ta ammu mi nga makepaliag yaw tu inango. (Bibbigan i 1 Timoteo 4:16.) Ari kami mapagan taw nga trabahu ta kagian na Biblia: “Inalawa nu yaw nga pakawayya nga awan tu paga; yatun tu kuan nu gapa danaw tu ari nga kapagan.” (Mateo 10:7, 8) Aru i ari mangalawa ta mensahe mi. Ngem mallayyagayya kami lagapa megafu ta parte yaw na paddayarayaw kani Jehova anna tapenu mapagayayya yayya.
GIGIAMMUAN I ARU PAGA
Ammuan paga i kukukuan na Saksi ira ni Jehova tapenu makapallayyagayya ta interu mundo, anna innan nu kunnasi ira uffunan ni Jehova.
Pallayyagayya ta interu mundo: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Ikagumammi nga layyagayyan i ngamin nga totolay
Kuan na Saksi ira ni Jehova i ngamin nga mawayyada tapenu ilayyagayya i mapia nga dumug ta totolay maski nu sitaw i diadda. Girawan i VIDEO, anna paguvovugan yaw nga pakkiavu:
-
Anni i maappresiam ta kukukuan na Saksi ira ni Jehova tapenu makapallayyagayya?
Bibbigan i Mateo 22:39 anna Roma 10:13-15, anna paguvovugan yaw ira nga pakkiavu:
-
Kunnasi ipasingan na trabahu nga pallayyagayya nga ayatammi i kasittolay mi?
-
Anni i pagimamma ni Jehova turi ira ta mangilayyagayya ta mapia nga dumug?—Innan i versikulo 15.
5. Katrabahu kami na Dios
Ipasingan na aru nga ekspiriensa nga igigiya ni Jehova i trabahu mi. Angngariganna, ta New Zealand, nakimallo i tadday nga babay ta Dios. Niyusana i ngagan ni Jehova. Nikiddona nga egga nakuan i mabbisita nisa. Tapus ta fugag, ta pamala-balay ni Paul nalayyagayyanna yatun nga babay. “Tallu nga oras laman i nappasa” kabalin na babay nga nakimallo “nattotto ngà ta puertana,” kunni Paul.
Bibbigan i 1 Corinto 3:6, 9, anna paguvovugan yaw nga pakkiavu:
-
Kunnasi ipasingan na ekspiriensa ira kagitta na ta New Zealand nga igigiya ni Jehova i trabahu nga pallayyagayya?
Bibbigan i Kingngua 1:8, anna paguvovugan yaw nga pakkiavu:
-
Ngatta kawagammi i uffun ni Jehova tapenu metuppal mi i ministerio mi?
Ammum kari?
Kada ligguan ta study mi ta midweek, masanay kami nga mallayyagayya. Nu naka-atende ka ngana tatun nga study, anni i makagim tatun nga passanay?
6. Tuttulammi i bilin na Dios nga mallayyagayya
Ta ollu siglo, pinurueban na kumokkontra ira nga pagimmangan i tagatuttul ira ni Jesus ta pallayyagayya. Nidefensa na ollu ira nga Cristiano i kepangngattadda nga mallayyagayya gukaban na ‘pangitaddag anna pamakaladda ta evanghelio.’ (Filipos 1:7) Kunnatun gapa i kukukuan na Saksi ira ni Jehova sangawe. a
Bibbigan i Kingngua 5:27-42, anna paguvovugan yaw nga pakkiavu:
-
Ngatta ariammi magimmang nga mallayyagayya?—Innan i versikulo 29, 38, anna 39.
BAKA IYAVU NA KARUAN: “Ngatta mamala-balay i Saksi ira ni Jehova?”
-
Anni i tabbag mu?
ANNI I NAGIGIAMMUM?
Nibilin ni Jesus ta tagatuttulna nga ilayyagayyada i mapia nga dumug ta ngamin nga totolay. Uffunan ni Jehova i totolena tapenu metuppal yaw nga trabahu.
Review
-
Kunnasi nga melayyagayya i mapia nga dumug ta interu mundo?
-
Kunnasi ipasingan na trabahu nga pallayyagayya nga ayatammi i kasittolay mi?
-
Para nikaw, makapagayayya kari i pallayyagayya? Ngatta?
I AWAYYAM PAGA KUAN
Girawan nu kunnasi mallayyagayya i Saksi ira ni Jehova ta darakal nga siudad.
Kunnasi inuffunan na Saksi ira ni Jehova i refugee ira?
Girawan nu kunnasi nga makapagayayya i pabbalin tu ngamin-tiempo nga ministro.
Gigiammuan i karuan ta importante nga desision na korte nga nakoffun tapenu tulu-tuloy i pallayyagayya.
a I Dios i nangibilin nga mallayyagayya kami. Yatutta ari kawagan na Saksi ira ni Jehova i permiso na egga ira ta autoridad tapenu ilayyagayya i mapia nga dumug.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
