LEKSION 22
Kunnasim Melayyagayya i Mapia nga Dumug?
Ta paggigiammum ta kinakurug ira ta Biblia, baka manono mu, ‘Mawag nga mammuan na ngamin yaw!’ Fustu. Mawag nga mammuan na ngamin yatun! Ngem baka maganassing ka nga ikagi ta tanakuan i nagigiammum ira. Ammuattam nu kunnasim malabanan i assing nga mataga-tageno mu anna magayayya nga ilayyagayya i mapia nga dumug ta Biblia.
1. Kunnasim ikagi ta kakilalam ira i magiggigiammum?
Kinagi na disipulo ira ni Jesus: “Arian na awayya tu ariam-mi nga ilammuyag i nasingan anna nagigginna mi ira.” (Kingngua 4:20) Talaga nabalor para nira i kinakurug yatutta ikayada nga ilayyagayya yatun ta totolay. Nu kunnatun gapa i mataga-tageno mu, magaleg ka tu chansa tapenu marespeto nga mekagim ta kafamilia anna kokkofummu ira i magiggigiammum.—Bibbigan i Colosas 4:6.
Nu kunnasi igafu
-
Nu makistoria ka ta kafamiliam, mangikagi tu topiko meyannung ta Biblia. Awayyam ikagi: “Egga i makakkasta nga nagigiammù taw nga ligguan.”
-
Mangibillay tu makapagaram nga teksto ta kofummu nga mataki onu mavuru-vurung.
-
Ikagim ta katrabahum nga mangumusta nikaw nu anni i nagigiammum ta Biblia onu ta study ta kongregasion.
-
Ipasingammu ta kokkofummu i website nga jw.org.
-
Imbitan i karuan nga mevulu ta paki-Bible studym, onu tudduan ira nu kunnasi mar-request tu Bible study ta jw.org.
2. Ngatta mawag nga mallayyagayya ka kavulu i kongregasion?
Ari laman nga nilayyagayya na disipulo ira ni Jesus i mapia nga dumug ta kakilalada. Zinog ira ni Jesus nga mallayyagayya nga “taggi-dua ta kada ili anna lugar” nga angngayadda. (Lucas 10:1) Megafu ta organisadu nga pinallayyagayyada, aru nga totolay i nakaginna ta mapia nga dumug. Nagayayya gapa i disipulo ira ta pakkaravuluda nga mallayyagayya. (Lucas 10:17) Kayà mu kari gapa i mallayyagayya kavulu i kongregasion?
GIGIAMMUAN I ARU PAGA
Ammuan nu kunnasim malabanan i assing nga matageno mu tapenu maekspiriensa i pagayayya ta pangilayyagayya ta mapia nga dumug.
3. Uffunan naka ni Jehova
Maganassing i karuan nga mallayyagayya nu nonopadda i posible ira nga reaksion na layyagayyadda.
-
Maganassikka kari nga ilayyagayya i magiggigiammum onu ari? Ngatta?
Girawan i VIDEO, anna paguvovugan i tumunug nga pakkiavu.
-
Kunnasi nga nalabanan na kabataan ira nga Saksi i assidda?
Bibbigan i Isaias 41:10, anna paguvovugan yaw nga pakkiavu:
-
Kunnasi makoffun i pakimallo nu maganassikka nga mallayyagayya?
Ammum kari?
Aru nga Saksi ira ni Jehova i nakatageno nga ariadda melayyagayya i mapia nga dumug ta tanakuan. Angngariganna, minappasiran si Sergey anna marigatan yayya nga makiyuvovug ta tanakuan. Ngem turi ta ginigiammuna i Biblia, kinagina: “Maski nu maganassing ngà, nigafù lagapa nga ilayyagayya ta tanakuan i magiggigiammù. Megafu tatun, napeggan ngà tu komfiansa anna magayayya ngà. Napasikan paga i pangurug ku.”
4. Mabbalin tu marespeto
Nu ilayyagayyam i mapia nga dumug, nonopan nu anni i ikagim anna nu kunnasi i pangikagim tatun. Bibbigan i 2 Timoteo 2:24 anna 1 Pedro 3:15, 16, anna paguvovugan yaw ira nga pakkiavu:
-
Kunnasim nga meyaplika yaw ira nga teksto nu ilayyagayyam i mensahe na Biblia?
-
Anni i kuammu nu ari alawatan na kafamiliam onu kokkofummu i ilayyagayyam? Anni gapa i ariammu nga kuan?
-
Ngatta mas makasta i mangiyusa tu mataktika ira nga pakkiavu imbes tu pilitan ira nga kurugan i kakkagiammu?
5. Makapagayayya i pallayyagayya
Niyawa ni Jehova kani Jesus i annungan nga ilayyagayya i mapia nga dumug. Anni i pagimamma ni Jesus tatun nga annungan? Bibbigan i Juan 4:34, NW, anna paguvovugan yaw ira nga pakkiavu:
-
I pakkakan ta masustansia ira nga makan i manustini ta inango tam anna mamagayayya nittam. Ngatta nikumpara ni Jesus ta pakkakan i pangngua ta uray na Dios—kagitta na pangilayyagayya ta mapia nga dumug?
-
Anni ira i makapagayayya nga resulta na pangilayyagayya ta mapia nga dumug?
Suhestion ira
-
Awayyam iyaplika i nagigiammum ira ta study ta midweek nu kunnasi igafu i pallayyagayya.
-
Awayyam ikiddaw nga meddakka tu asayment ta study ta midweek. Masanay ka taw nu kunnasim ikagi ta tanakuan i magiggigiammum.
-
Usan i seksion naw nga leksion nga “I Kagian na Karuan” onu i “Baka Iyavu na Karuan” tapenu mapraktis mu nu kunnasi ka tubbag ta gagangay ira nga pakkiavu anna pambar.
BAKA IYAVU NA KARUAN: “Kumusta ka ngana?”
-
Kunnasim approbetsan yatun tapenu ikagi i magiggigiammum ta Biblia?
ANNI I NAGIGIAMMUM?
Makapagayayya i pangilayyagayya ta mapia nga dumug, anna mawayyam nga kuan yatun.
Review
-
Ngatta ilayyagayyam ta tanakuan i mapia nga dumug?
-
Kunnasim mepasingan i respeto nu mallayyagayya ka?
-
Kunnasim malabanan i assing ta pallayyagayya?
I AWAYYAM PAGA KUAN
Ikonsidera i appa nga makuam tapenu melayyagayyam i mapia nga dumug gukaban na jw.org contact card.
Pamarigan nga Presentasion Para ta JW.ORG Contact Card (1:43)
Gigiammuan i appa nga kualidad nga makoffun nikaw tapenu melayyagayyam i mapia nga dumug.
“Desididu Ka Ngana Kari nga Magimmanango tu Totolay?” (Passifusifutan, Setiembre 2020)
Girawan nu kunnasi makoffun i ehemplo ta Biblia tapenu maggutu ittam nga ilayyagayya i mapia nga dumug, maski nu mabbing ittam laman.
Ammuan nu kunnasim mekagi i mensahe na Biblia ta kafamiliam nga ariadda ammu i meyannung kani Jehova.
“Pangadde ta Futu na Ari Kapangngurug nga Kafamilia” (Passifusifutan, Marso 15, 2014)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
