Nituddu ni Jesus nga mawag nga mabawtisowan i Cristiano ira. (Bibbigan i Mateo 28:19, 20.) Ngem anni i bawtismo? Anni i mawag nga kuan na tadday tapenu mabbalin tu kualipikadu ta bawtismo?

1. Anni i bawtismo?

I termino nga “bawtismo” ay naggafu ta Griego nga termino nga i kebalinanna, “melammag” ta danum. Turi ta nabawtisowan si Jesus, nelammag i interu nga baggina ta Bannag Jordan, tapus nelawan gabbalaman ta danum. (Marcos 1:9, 10) Kagitta ni Jesus, nu mabawtisowan i kurug ira nga Cristiano, melammag gapa i interu nga baggida ta danum.

2. Anni i ipasingan na bawtismo?

Nu mabawtisowan i tadday, ipasinganna nga naddedika ngana yayya kani Jehova nga Dios. Kunnasi nga makua i dedikasion? Nige na bawtismo, ikagi na tadday kani Jehova ta pribadu nga pakimallo nga kayàna yayya nga passerbian tu mannanayun. Ipromesana nga si Jehova laman i dayawanna anna i uray na Dios i pinaka-importante ta pattolena. “Kattaman na i baggi na . . . anna tumuttul” ta tuttuddu anna ehemplo ni Jesus. (Mateo 16:24) Megafu ta dedikasion anna bawtismona, posible nga mapeggan yayya tu madukko nga pakikkofun kani Jehova anna ta kapangngurugna ira.

3. Anni i kuan na tadday nu kayàna i mappabawtiso?

Nu kayà mu i mabawtisowan, importante nga magigiammum i meyannung kani Jehova anna mangurug ka nisa. (Bibbigan i Hebreo 11:6.) Mas nga ayatammu si Jehova nu mas umaru i pakannammum anna dumakal i pangurug mu nisa. Yatutta siguradu nga kakayà mu nga ilayyagayya i meyannung nisa anna mattolay segun ta estandartena ira. (2 Timoteo 4:2; 1 Juan 5:3) Nu mattolay i tadday nga “mekunnay anna makapagayaya ta Yafu,” awayyana i maddedika ta Dios anna mappabawtiso.​—Colosas 1:9, 10. a

 GIGIAMMUAN I ARU PAGA

4. Makagigiammu ittam ta bawtismo ni Jesus

Bibbigan i Mateo 3:13-17 tapenu magigiammu i aru paga nga detalye meyannung ta bawtismo ni Jesus. Kabalinna, paguvovugan yaw ira nga pakkiavu:

• Baby kari si Jesus turi ta nabawtisowan?

• Kunnasi yayya nabawtisowan? Nawawwarsian kari laman tu danum?

Nigafu ni Jesus i espesial nga annunganna taw ta davvun nga niyawa na Dios kabalinna nga nabawtisowan. Bibbigan i Lucas 3:21-23 anna Juan 6:38, anna paguvovugan yaw nga pakkiavu:

• Kabalin na bawtismo ni Jesus, anni nga trabahu i prayoridadna ta pattolena?

5. I bawtismo ay realistiko nga addetan

Ta ollu, awayyana nga magalangan ka nga idedika i baggim anna mappabawtiso. Ngem awayyam i mapprogreso adde ta makkomfiansa ka ngana nga kuan yatun nga desision. Girawan i VIDEO tapenu masingan i karuan nga nakangngua tatun.

Bibbigan i Juan 17:3 anna Santiago 1:5, anna paguvovugan yaw nga pakkiavu:

• Anni i makoffun ta tadday tapenu mabbalin tu kualipikadu ta bawtismo?

1. Maddedika ittam gukaban na pangikagi kani Jehova nga ikaya tam yayya nga passerbian tu mannanayun

2. Nu mappabawtiso ittam, ipasingattam ta ngamin nga totolay nga naddedi ka ittam ngana ta Dios

 6. Mabbalin tu parte na familia ni Jehova i tadday nu mabawtisowan

Nu mabawtisowan ittam, mabbalin ittam tu parte na nattaradday nga familia ta interu mundo. Maski nu sitaw i diattam onu maski anni i ginafuattam, parehu i pangurug anna moral ira nga estandarte nga tuttuttulattam. Bibbigan i Salmo 25:14 anna 1 Pedro 2:17, anna paguvovugan yaw nga pakkiavu:

• Anni i meyuffun na bawtismo ta relasion na tadday kani Jehova anna na tanakuan nga maddayarayaw Nisa?

 ANNI I NAGIGIAMMUM?

Nituddu ni Jesus nga mawag nga mabawtisowan i Cristiano ira. Nige nga mabawtisowan i tadday, mawag nga matuyag i pangurugna kani Jehova, mattolay ta estandartena ira, anna idedikana i baggina ta Nisa.

Review

• Anni i bawtismo, anna ngatta importante yatun?

• Anni i ipasingan na dedikasion anna bawtismo?

• Anni i kuan na tadday nigena maddedika anna mappabawtiso?