LEKSION 26
Ngatta Egga i Kinamarake Anna Pazziga-riga?
Nu egga marake nga mesimmu, normal laman nga iyavu tam: “Ngatta nesimmu yaw?” Pia ngana laman ta manawag i tabbag na Biblia tatun!
1. Anni i kingngua ni Satanas nga narresulta tu kinamarake?
Narrebelde si Satanas nga Diablo kontra ta Dios. Kayà ni Satanas i mammaguray, yari tu ininfluwensianna da Adan anni Eva nga marrebelde. Tapenu makuana yatun, nalladdug si Satanas kani Eva. (Genesis 3:1-5) Pinalawanna nga egga i mapia nga iyetu ni Jehova nisa. Gittana kakkagianna gapa nga mas magayayya i totolay nu ariadda tuttulan i Dios. Kinagi ni Satanas i ollu nga kinaladdug nga ari nga matay si Eva. Yatutta kagian na Biblia nga si Satanas ay “massiri-siri” anna “i yama ngamin na siri” onu laddug.—Juan 8:44.
2. Anni i pinili da Adan anni Eva?
Aru i niyawa ni Jehova kani Adan anni Eva. Kinagina nga awayyada i kuman ta vunga na kada kayu ta hardin na Eden fuera laman ta tadday. (Genesis 2:15-17) Ngem kinnadda lagapa i vunga na kayu. “Nanga [si Eva] tu vungana anna kinnanna yatun.” Kabalinna, “kiminan gapa” si Adan. (Genesis 3:6) Ariadda nga sinuppal i Dios. Megafu ta perfekto da Adan anni Eva, natural laman nga kuadda i fustu. Ngem pinilida i ari mattuppal ta Dios. Megafu tatun, nakaliwa ira anna pinammanakitadda i pammaguray na Dios. Yatun i rason nu ngatta nazziga-riga ira.—Genesis 3:16-19.
3. Anni i efekto nittam na desision da Adan anni Eva?
Turi ta nakaliwa da Adan anni Eva, nabbalin ira tu imperfekto, anna yatun i namana na ngamin nga ginakada. Meyannung kani Adan, kinagi na Biblia: “Megafu ta tadday nga tolay, egga ta utun na davvun i pattagaruli, ay i katagarulian na i nangirattal ta patay. Ay nawwara i patay ta ngamin nga totolay.”—Roma 5:12.
Aru i rason nu ngatta mazziga-riga ittam. Nu karuan megafu ta mali nga desisiottam, mali nga desision na tanakuan, onu nekanna nga egga ittam ta tadday nga lugar ta ari mepangngo nga tiempo.—Bibbigan i Eclesiastes 9:11.
GIGIAMMUAN I ARU PAGA
Ammuan nu ngatta ari tu Dios i makalliwa ta kinamarake anna pazziga-riga nga mesissimmu anna nu anni i matagenona nu mazziga-riga ittam.
4. I makalliwa ta pazziga-riga tam
Aru i mangurug nga i Dios i mammaguray ta interu mundo. Kurug kari yatun? Girawan i VIDEO.
Bibbigan i Santiago 1:13 anna 1 Juan 5:19, anna paguvovugan yaw nga pakkiavu:
-
Dios kari i makalliwa ta pazziga-riga anna kinamarake?
5. Ikonsidera i resulta ira na pammaguray ni Satanas
Bibbigan i Genesis 3:1-6, anna paguvovugan yaw ira nga pakkiavu:
-
Anni nga kinaladdug i kinagi ni Satanas?—Innan i versikulo 4 anna 5.
-
Kunnasi nga pinalawan ni Satanas nga egga i mapia nga iyetu ni Jehova ta totolay?
-
Segun kani Satanas, kawagan kari na totolay si Jehova nga Mammaguray tapenu magayayya ira?
Bibbigan i Eclesiastes 8:9, anna paguvovugan yaw nga pakkiavu:
-
Anni i mesissimmu megafu ta ari tu si Jehova i Mammaguray ta mundo?
-
Perfekto da Adan anni Eva anna nattolay ira ta Paraiso. Ngem nagginna ira kani Satanas anna narrebelde ira kontra kani Jehova
-
Kabalin na rebelyon, nawwara ta mundo i liwa, pazziga-riga, anna patay
-
Pangultimuan noka ni Jehova i liwa, pazziga-riga, anna patay. Mabbalin tu perfekto i totolay anna mattolay ira ta Paraiso
6. Mavurung si Jehova nu mazziga-riga ittam
Mavurung kari i Dios nu masinganna nga mazziga-riga ittam? Ikonsidera i nitura ni Patul David anna apostol Pedro. Bibbigan i Salmo 31:7 anna 1 Pedro 5:7, anna paguvovugan yaw nga pakkiavu:
-
Anni i matageno mu ta nammuammu nga masingi-singan ni Jehova i pazziga-riga tam anna ikavurunganna ittam?
7. Pangultimuan na Dios i ngamin nga pazziga-riga
Bibbigan i Isaias 65:17 anna Nepakannammu 21:3, 4, anna paguvovugan yaw nga pakkiavu:
-
Ngatta makapabannay nga mammuan nga alsan ni Jehova i efekto ira na marake nga nappasa-pasan na totolay?
Ammum kari?
Turi ta nalladdug si Satanas, pinara-parakena si Jehova. Zinaralna i makasta nga reputasion ni Jehova bilang ari mangireruma anna minaggiddu nga Mammaguray. Sonu alsan ni Jehova i pazziga-riga, metolina i makasta nga reputasionna. Mapakurugna nga i pammagurena i kapianan. I pamakarenu ta ngagan ni Jehova i pinaka-importante ta interu uniberso.—Mateo 6:9, 10.
I KAGIAN NA KARUAN: “Parte na gakkag na Dios nittam i pazziga-riga.”
-
Anni i makagim?
ANNI I NAGIGIAMMUM?
Si Satanas nga Diablo anna da Adan anni Eva i primeru nga rason nu ngatta egga i kinamarake. Kuruga mavurung si Jehova nu mazziga-riga ittam, anna aranni ngana nga alsanna i pazziga-riga tam.
Review
-
Anni nga kinaladdug i kinagi ni Satanas nga Diablo kani Eva?
-
Anni i efekto nittam na parrebelde da Adan anni Eva?
-
Ngatta makagi tam nga mavurung si Jehova nu mazziga-riga ittam?
I AWAYYAM PAGA KUAN
Gigiammuan i kebalinan na liwa segun ta Biblia.
Bibbigan i aru paga meyannung ta isyu nga pinalattuag ni Satanas nga Diablo ta hardin na Eden.
“Ngatta Ipamavulun na Dios i Pazziga-riga?” (Passifusifutan, Enero 1, 2014)
Ammuan i makapabannay nga tabbag ira ta mariga nga pakkiavu.
“Ngatta Nesimmu i Holocaust? Ngatta Ari Finugaddan na Dios Yatun?” (Artikulo ta website)
Ammuan i nagigiammu na tadday nga lalaki ta pazziga-riga nga masingi-singanna.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
