LEKSION 27
Kunnasi Ittam Mapaliag Megafu ta Patay ni Jesus?
Makaliwa, mazziga-riga, anna matay ittam megafu ta ari nattuppal ta Dios i ollu nga magatawa nga da Adan anni Eva. a Ngem egga i iddanama tam. Niyawa ni Jehova i Anana nga si Jesu-Cristo tapenu mapaliag ittam ta liwa anna patay. Ituttuddu na Biblia nga megafu ta patay ni Jesus, natavvu ittam. I tavvu ay balor nga mepaga tapenu mapalubbangan i tadday. Nipaga ni Jesus i perfekto nga inangona bilang tolay. (Bibbigan i Mateo 20:28.) Sigga-paran nga nisakrifisio ni Jesus i perfekto nga inangona yatutta posible nga metoli i nawawan da Adan anni Eva. Nipasingan gapa ni Jesus anna ni Jehova i kadakal na ayada nittam. Makoffun yaw nga leksion tapenu mepasingammu i appabalo mu ta patay ni Jesus.
1. Sangawe, kunnasi ittam mabenefisiowan ta patay ni Jesus?
Megafu ta minakkaliwa ittam, aru i makua tam nga mamallussaw kani Jehova. Ngem nu talaga mabbabawi ittam anna kiddawattam i pamakoma ni Jehova gukaban ni Jesus, anna ari tam ngana ulian yatun nga nakkamaliattam, awayya tam mabbalin tu madukko nga kofun na Dios. (1 Juan 2:1) Kagian na Biblia: “Si Cristo ay mittan laman nga natay megafu ta katagarulian na totolay—ay adde ngana noka. Natay yaya nga matunung para ta ari nga matunung. Kingngua na yaw tapenu meyaranni na ittam ta Dios.”—1 Pedro 3:18.
2. Ta mappange, kunnasi ittam mabenefisiowan ta patay ni Jesus?
Zinog ni Jehova si Jesus tapenu isakrifisiona i perfekto nga inangona “tapenu ngamin i mangurug sa ay ari nga matay nu ari matolay ira adde ta ngangangay.” (Juan 3:16) Pia ngana laman ta kingngua yatun ni Jesus. Megafu tatun alsan ni Jehova i ngamin nga marake nga resulta na ari pattuppal ni Adan. Kebalinanna nga nu mangurug ittam ta sakrifisio ni Jesus, mapeggan ittam tu chansa nga mattolay tu mannanayun ta paraiso nga davvun!—Isaias 65:21-23.
GIGIAMMUAN I ARU PAGA
Ammuan paga i rason ira nu ngatta nisakrifisio ni Jesus i inangona, anna nu kunnasi ka mabenefisiowan.
3. Megafu ta patay ni Jesus, napalubbangan ittam ta liwa anna patay
Girawan i VIDEO, anna paguvovugan i tumunug nga pakkiavu.
-
Perfekto si Adan ngem megafu ta ari nga nattuppal ta Dios, nakaliwa yayya anna namana na ngamin nga totolay i liwa anna patay
-
Perfekto si Jesus anna nattuppal yayya ta Dios, megafu tatun neddan tu chansa i totolay nga mabbalin tu perfekto anna mattolay tu mannanayun
4. Mabenefisiowan i ngamin nga totolay ta patay ni Jesus
Girawan i VIDEO, anna paguvovugan i tumunug nga pakkiavu.
-
Kunnasi nga mabenefisiowan i ngamin nga totolay ta patay na tadday nga tolay?
Bibbigan i 1 Timoteo 2:5, 6, anna paguvovugan yaw nga pakkiavu:
-
Perfekto si Adan ngem megafu ta nakaliwa yayya, namana na ngamin nga totolay i liwa anna patay. Perfekto si Jesus, kagitta ni Adan dati. Anni gafu i nakua ni Jesus ta pangiyawana ta inangona?
5. Regalu nikaw ni Jehova i tavvu
Ibilang na kokkofun ira ni Jehova nga regalu mismu nira i tavvu. Bibbigan i Galacia 2:20, anna paguvovugan yaw nga pakkiavu:
-
Kunnasi nga nibilang ni apostol Pablo nga personal nga regalu nisa i tavvu?
Turi ta nakaliwa si Adan, nasentensian yayya nga matay anna i ngamin nga gakana. Ngem megafu ta zinog ni Jehova i Anana tapenu matay, egga i chansam nga mattolay tu mannanayun.
Bibbigammu i tumunug nga teksto, anna nonopammu nu anni i natageno ni Jehova turi ta mazziga-riga i Anana. Bibbigan i Juan 19:1-7, 16-18, anna paguvovugan yaw nga pakkiavu:
-
Anni i matageno mu ta kingngua ni Jehova anna ni Jesus para nikaw?
BAKA IYAVU NA KARUAN: “Kunnasi gapa nga mabenefisiowan i ngamin ta patay na tadday laman nga tolay?”
-
Anni i tabbag mu?
ANNI I NAGIGIAMMUM?
Megafu ta patay ni Jesus, pakoman ittam ni Jehova ta liwi-liwa tam, anna egga i chansa tam nga mattolay tu mannanayun.
Review
-
Ngatta natay si Jesus?
-
Ngatta makagi tam nga eksakto nga panavvu i perfekto nga inango ni Jesus?
-
Kunnasi ka mabenefisiowan ta patay ni Jesus?
I AWAYYAM PAGA KUAN
Gigiammuan nu ngatta magalan tu tavvu i perfekto nga inango ni Jesus.
“Kunnasi nga ‘Matavvu i Aru’ Megafu ta Sakrifisio ni Jesus?” (Artikulo ta website)
Ammuan nu anni i mawag nga kuattam tapenu mapaliag.
Pakoman kari ni Jehova maski i madammo ira nga liwa?
“Tabbag ta Pakkiavu ira ta Biblia” (Passifusifutan, Mayo 1, 2013)
Innan nu kunnasi inuli na tadday nga lalaki i kata-katolena megafu ta pakannammuna ta tavvu ni Cristo.
“Ari Ngà Ngana nga Aripanna Kinavayolente” (Artikulo ta website)
a Ari laman tu pagangngua tu marake i tukuyan na liwa. Kebalinanna gapa yatun i marake nga kondision nga namana tam.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
