Natayakka ngana kari? Baka manono mu: ‘Anni i mesimmu nu matay ittam? Masingattam paga kari i natay ira nga iddeddukattam?’ Taw nga leksion anna ta tumunug, gigiammuattam i makapabannay nga tabbag na Biblia.

1. Anni i mesimmu nu matay ittam?

Nikumpara ni Jesus i patay ta pakkatrug. Ari nga ammu na tolay nga masingngo i katrugna i mesissimmu ta pallevuna. Anni i papparehuan na patay ta pakkatrug? Nu matay i tadday, awan ngana tu matagenona. Arianna kanappan i kokkofun anna i familiana ira maski nu iddedduna ira. Kagian na Biblia: “I natay ira ay awan ngana vuluvuga tu ammuda.”​—Bibbigan i Eclesiastes 9:5.

2. Anni i meyuffunna nu ammu tam i kinakurug meyannung ta patay?

Maganassing i aru nga totolay ta patay anna ta natay! Ngem makapabannay i kagian na Biblia meyannung ta patay. Kinagi ni Jesus: ‘I kurug i mamalubbang nikamu.’ (Juan 8:32) Ituddu na karuan nga relihion nga nu matay i tadday, egga i imortal nga kararuana nga mattulu-tuloy nga mattolay. Ngem ari tu kunnatun i ituddu na Biblia. Ari gapa nga mazziga-riga i natay anna awan ngana gapa tu ammuda, yatutta ariadda ittam nga matakitan. Yari tu ariattam mawag nga pagustuan onu dayawan ira, anna ariattam gapa mawag nga ipakimallo ira.

Kagian na karuan nga totolay nga awayyada kibbidan i natay. Ngem imposible yatun. Kagitta na nagigiammu tam, ‘awan ngana vuluvuga tu ammu’ na natay ira. I totolay nga makibbida ta natay ay awayyana nga i demonio ira i kikkibbidadda nga pinarigadda laman i tolay nga natay ngana. Nu ammu tam gafu i kinakurug meyannung ta patay, maprotektan ittam ta demonio ira. Inabisowan ittam ni Jehova nga ariattam makibbida ta natay ira, megafu ta ammuna nga pakikomunika yatun ta demonio ira nga mamappeligro nittam.​—Bibbigan i Deuteronomio 18:10-12.

3. Gigiammuan i situasion na natay

Nadduruma i kurugan na totolay ta mesimmu nu matay ittam. Ngem siempre, ari tu ngamin nga kuru-kurugadda ay fustu.

• Anni i kurugadda ta diannu nga situasion na natay?

 4. Makoffun nittam i kinakurug meyannung ta patay

Nu ammu tam i kinakurug meyannung ta patay, ari ittam maganassing ta natay. Bibbigan i Eclesiastes 9:10, anna paguvovugan yaw nga pakkiavu:

• Awayya kari ittam takitan na natay?

Nu ammu tam i kinakurug maggafu ta Biblia, ariattam melogo ta kinaladdug nga mawag nga pagustuan onu dayawattam i natay ira. Bibbigan i Isaias 8:19 anna Nepakannammu 4:11, anna paguvovugan yaw nga pakkiavu:

• Anni i matageno ni Jehova ta totolay nga maddayaw onu mappoffun ta natay ira?

5. Bannayan ittam na kinakurug meyannung ta patay

Netuddu ta aru nga totolay nga nu matay ira, mazziga-riga ira megafu ta marake nga kinikkingnguada. Ngem makapabannay nga mammuan nga ari mazziga-riga i natay ira, maski nu nakangngua ira tu kuruga marake nga ganna-gannug. Bibbigan i Roma 6:7, anna paguvovugan yaw nga pakkiavu:

• Kagian na Biblia nga nu matay i tadday nga tolay, mapalubbangan ngana yayya ta liwana ira. Para nikaw, rasonable kari nga nonopan nga mazziga-riga i natay ira megafu ta nakuada ira nga liwa?

Nu mas makilala tam si Jehova, mas mabbalin ittam tu kumbinsidu nga arianna nga ziga-rigatan i natay ira. Bibbigan i Deuteronomio 32:4 anna 1 Juan 4:8, anna paguvovugan yaw ira nga pakkiavu:

• Segun ta nabibbig mu ira nga kualidad na Dios taw ira nga teksto, kayà kari na Dios nga mazziga-riga i natay ira?

• Makapabannay kari nikaw i kinakurug meyannung ta patay? Ngatta?

 ANNI I NAGIGIAMMUM?

Nu matay i tolay, awan ngana tu ammuna. Ari mazziga-riga i natay, anna ariadda takitan i matolay ira.

Review

• Anni i mesimmu nu matay ittam?

• Kunnasi makoffun nittam i kinakurug meyannung ta patay?

• Kunnasi ittam bannayan na kinakurug meyannung ta patay?