LEKSION 31
Anni i Pappatulan na Dios?
Meyannung ta Pappatulan na Dios i pinaka-importante nga mensahe na Biblia. Usan ni Jehova yatun nga Pappatulan tapenu ituppal i orihinal nga gakkagna para ta davvun. Anni i Pappatulan? Mammaguray kari ngana yatun? Anni ngana ira i netuppalna? Anni paga i ituppalna ta mappange? Matabbag taw nga leksion anna ta tumunug nga dua nga leksion yatun ira nga pakkiavu.
1. Anni i Pappatulan na Dios, anna sinni i Patulna?
I Pappatulan ay gobiernu nga nipataddag ni Jehova nga Dios. Si Jesu-Cristo i Patul tatun, anna mammaguray yayya ta langi. (Mateo 4:17; Juan 18:36) Kagian na Biblia meyannung kani Jesus: “Mannanayun noka i pammaguray na.” (Lucas 1:32, 33) Bilang Patul na Pappatulan na Dios, pammagurayan ni Jesus i ngamin ta davvun.
2. Sinni i makipammaguray kani Jesus?
Ari magitetadday si Jesus nga mammaguray. Egga i totolay nga maggafu ta ‘madduma-ruma nga tribu, paguvovug, nasion, anna rasa nga mammaguray ta tanga-ravvunan.’ (Nepakannammu 5:9, 10) Piga i makipammaguray kani Cristo? Namegafu ta kegga ni Jesus ta davvun magadde sangawe, minillion ngana nga Cristiano i nabbalin tu tagatuttulna. Ngem egga laman i 144,000 nga umay ta langi nga makipammaguray kani Jesus. (Bibbigan i Nepakannammu 14:1-4.) Pammagurayan na Pappatulan i ngamin nga Cristiano taw ta davvun.—Salmo 37:29.
3. Ngatta mas makasta i Pappatulan na Dios anne ta gobiernu na totolay?
Maski nu ikaguman na mammaguray nga totolay nga kuan i mapia, awan tu pakapangnguada nga kuan i ngamin nga ikayada. Awayyana gapa nga makasarili i mattali nira anna ariadda ikaya nga manguffun ta totolay. Ngem ari vuluvuga matalianan si Jesus bilang Mammaguray ta Pappatulan na Dios. ‘Namataddag i Dios tu Pappatulan nga ari vuluvuga madaral.’ (Daniel 2:44) Mammaguray si Jesus ta interu davvun, anna patas i pattratuna ta ngamin. Minaggiddu yayya, masippo, anna kanayun nga mangipasingan tu hustisia. Tudduanna gapa i totolay ira nga kunnatun i ipasingadda ta kataggi-tadday.—Bibbigan i Isaias 11:9.
GIGIAMMUAN I ARU PAGA
Ammuan nu ngatta mas makasta i Pappatulan na Dios anne ta gobiernu na totolay.
4. Mammaguray ta interu davvun i Pappatulan na Dios
Mas makapangngua si Jesu-Cristo nga mammaguray anne ta ngamin nga nammaguray nga totolay. Bibbigan i Mateo 28:18, anna paguvovugan yaw nga pakkiavu:
-
Ngatta mas makapangngua si Jesus anne ta totolay ira nga mammaguray?
Mangulu-uli i gobiernu na totolay, anna nadduruma i mammaguray ta kada parte na davvun. Kunnasi gapa ta Pappatulan na Dios? Bibbigan i Daniel 7:14, anna paguvovugan yaw ira nga pakkiavu:
-
Anni i benefisiona megafu ta ‘ari madaral’ i Pappatulan na Dios?
-
Ngatta makasta nga mammaguray yatun ta interu davvun?
5. Mawag nga matalianan i pammaguray na totolay
Ngatta mawag nga talianan na Pappatulan na Dios i gobiernu na totolay? Girawan i VIDEO, anna paguvovugan i tumunug nga pakkiavu.
-
Anni i resulta na pammaguray na totolay?
Bibbigan i Eclesiastes 8:9, anna paguvovugan yaw ira nga pakkiavu:
-
Mawag kari nga talianan na Pappatulan na Dios i gobiernu na totolay? Ngatta?
6. Makipattageno nittam i mammaguray ira ta Pappatulan na Dios
Nappasan na Patul tam nga si Jesus i mabbalin tu tolay, yari tu ammuna i “kalaray na kata-katolay tam.” (Hebreo 4:15) Pinili ni Jehova ta “madduma-ruma nga tribu, paguvovug, nasion, anna rasa” i 144,000 nga matalo nga lallaki anna babbay tapenu makipammaguray kani Jesus.—Nepakannammu 5:9.
-
Ngatta makapabannay nga mammuan nga nappasan ni Jesus anna na kakavvuluna nga mammaguray i mattolay taw ta davvun?
Nappili si Jehova tu lallaki anna babbay nga nadduruma i naggafuadda tapenu makipammaguray kani Jesus
7. Mas makasta i dorob na Pappatulan na Dios
Magangngua i gobiernu ira tu dorob tapenu mabenefisiowan anna maprotektan i pammagurayadda. Egga gapa i dorob na Pappatulan na Dios nga mawag nga tuttulan na pammagurayanna. Bibbigan i 1 Corinto 6:9-11, anna paguvovugan yaw ira nga pakkiavu:
-
Anni i paddia-paddian na mundo nu tuttulan na ngamin i dorob na Dios? a
-
Rasonable kari nga ekspektan ni Jehova nga tuttulan na sakup na Pappatulanna i dorobna? Ngatta?
-
Anni i mangipasingan nga awayya manguli na totolay ira nga ari tumuttul taw ira nga dorob?—Innan i versikulo 11.
Mangipatuppal i gobiernu ira tu dorob tapenu protektan anna mabenefisiowan i pammagurayadda. Mangipatuppal i Pappatulan na Dios tu mas makasta nga dorob tapenu protektan anna mabenefisiowan i pammagurayanna
BAKA IYAVU NA KARUAN: “Anni i Pappatulan na Dios?”
-
Anni i tabbag mu?
ANNI I NAGIGIAMMUM?
I Pappatulan na Dios ay kurug nga gobiernu nga egga ta langi nga mammaguray ta interu davvun.
Review
-
Sinni ira i mammaguray ta Pappatulan na Dios?
-
Ngatta mas makasta i Pappatulan na Dios anne ta gobiernu na totolay?
-
Anni ira i ekspektan ni Jehova ta sakup na Pappatulanna?
I AWAYYAM PAGA KUAN
Ikonsidera i nituddu ni Jesus nu sitaw i dian na Pappatulan.
“I Pappatulan Kari na Dios ay Egga ta Futu Tam?” (Artikulo ta website)
Ngatta mas mammakatalo i Saksi ira ni Jehova ta Pappatulan na Dios ari tu ta pammaguray na totolay?
Gigiammuan i kagian na Biblia meyannung ta 144,000 nga pinili ni Jehova nga makipammaguray kani Jesus.
Anni i nakakumbinsi ta tadday nga babay nga agga-fuku nga i Dios laman i makerattal tu hustisia ta mundo?
“Nalegakku i Solusion ta Kawan na Hustisia” (Malukag!, Nobiembre 2011)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
