LEKSION 32
Mammaguray Ngana i Pappatulan na Dios!
Namegafu nga nammaguray ta langi i Pappatulan na Dios turi 1914. Tatun nga dagun gapa nga namegafu i pangurianan nga aggaggaw na pammaguray na totolay. Ngatta makagi tam yatun? Ikonsidera i profesiya na Biblia anna i paddia-paddian anna ugali na totolay namegafu turi 1914.
1. Anni i profesiya na Biblia meyannung tatun?
Nakagi ta libru na Biblia nga Daniel nga mamegafu nga mammaguray i Pappatulan na Dios ta pangultimuan na “pitu nga tiempo.” (Daniel 4:16, 17) Inagalan ni Jesus yatun nga tiempo nga “ketuppal na tiempo” na nasa-nasion, anna nitudduna nga ari paga nangultimu yatun. (Lucas 21:24) Magigiammu tam nga nangultimu yatun nga pitu nga tiempo turi 1914.
2. Anni ira i nesissimmu ta mundo anna ta ugali na totolay namegafu turi 1914?
Niyavu na disipulo ira ni Jesus nisa: “Anni i panakkilalan ta panolim [keggam, NW], nga yatun ngana i panuppalan na mundo [panuppalan na sistema na ganna-gannug, NW]?” (Mateo 24:3) Anni i tabbag ni Jesus? Kinagina i mesimmu ira sonu mammaguray ngana yayya ta langi bilang Patul na Pappatulan na Dios. Kasali tatun i gerra, bisin, anna lunig. (Bibbigan i Mateo 24:7.) Niprofesiya gapa na Biblia nga megafu ta ugu-ugali na totolay “ta pangurianan ira nga aggaw” mas nga marriga i pattolay. (2 Timoteo 3:1-5) Mas nga naggrabe yaw ira nga paddia-paddian ta mundo anna ugu-ugali na totolay namegafu turi 1914.
3. Ngatta mas narrake i paddia-paddian turi ta namegafu nga nammaguray i Pappatulan na Dios?
Kabalin nga netrono si Jesus bilang Patul na Pappatulan na Dios, nakiggerra yayya ta langi kontra kani Satanas anna ta demoniona ira. Naffu si Satanas. Kinagi na Biblia nga si Satanas ay “napatavvar tuange ta ngamin nga anghel na, anna netabbo ira ta utun na davvun.” (Nepakannammu 12:9, 10, 12) Fermi i poray ni Satanas megafu ta ammuna nga aranni ngana i kadaralna. Yayya i makagafu ta ngamin nga pazziga-riga taw ta davvun. Yatun gafu i rason nu ngatta marake i paddia-paddian taw ta mundo. Ngem solban na Pappatulan na Dios yatun ira nga problema.
GIGIAMMUAN I ARU PAGA
Ammuan nu ngatta makagi tam nga namegafu nga nammaguray i Pappatulan turi 1914 anna nu anni i efektona nittam.
4. Pakurugan na kronolohia na Biblia nga namegafu nga nammaguray i Pappatulan turi 1914
Pinattatageno na Dios si Nabucodonosor nga patul na Babilonia tapenu ipasingan i mesimmu ta mappange. Yatun nga tatageno anna i kebalinanna nga kinagi ni Daniel ay parehu nga tumukoy ta pammaguray ni Nabucodonosor anna ta Pappatulan na Dios.—Bibbigan i Daniel 4:17. a
Bibbigan i Daniel 4:20-26, anna usan i chart tapenu matabbag yaw ira nga pakkiavu:
-
(A) Anni i nasingan ni Nabucodonosor ta tatagenona?—Innan i versikulo 20 anna 21.
-
(B) Anni i mesimmu ta kayu?—Innan i versikulo 23.
-
(C) Anni i mesimmu ta pappasa na “pitu nga tiempo”?—Innan i versikulo 26.
I Koneksion na Kayu ta Pappatulan na Dios
I PROFESIYA (Daniel 4:20-36)
Pammaguray
(A) Daka-dakal nga kayu
Nagimmang i pammaguray
(B) “Gappokannu i kayu,” anna ‘pappasannu i pitu nga tiempo’
Metoli i pammaguray
(C) “Mammaguray ka mangana noka ta pappatulammu”
Ta ollu nga ketuppalan na profesiya . . .
-
(D) Sinni i irepresenta na kayu?—Innan i versikulo 22.
-
(E) Kanni nga nagimmang i pammagurena?—Bibbigan i Daniel 4:29-33.
-
(F) Anni i nesimmu kani Nabucodonosor ta kabalin na “pitu nga tiempo”?—Bibbigan i Daniel 4:34-36.
OLLU NGA KETUPPALAN
Pammaguray
(D) Nabucodonosor, Patul na Babilonia
Nagimmang i pammaguray
(E) Kabalin na 606 B.C.E., nammaguyung si Nabucodonosor anna ari nakapammaguray ta pitu nga ragun
Metoli i pammaguray
(F) Nammapia si Nabucodonosor anna nakapammaguray uli
Ta mekadua nga ketuppalan na profesiya . . .
-
(G) Sinni i irepresenta na kayu?—Bibbigan i 1 Cronicas 29:23.
-
(H) Kanni nga nagimmang i pammagureda? Ngatta makagi tam nga ari paga netoli i pammagureda turi ta egga si Jesus ta davvun?—Bibbigan i Lucas 21:24.
-
(I) Kanni anna sitaw nga netoli i pammaguray?
MEKADUA NGA KETUPPALAN
Pammaguray
(G) Patul ira nga Israelita nga mangirepresenta ta pammaguray na Dios
Nagimmang i pammaguray
(H) Nadaral i Jerusalem, anna nagimmang i linia na pammaguray na patul ira nga Israelita ta 2,520 nga dagun
Metoli i pammaguray
(I) Namegafu nga nammaguray si Jesus ta langi bilang Patul na Pappatulan na Dios
Kunnasi kapaddu i pitu nga tiempo?
Makoffun nittam i karuan nga parte na Biblia tapenu mantindian i karuan nga partena. Angngariganna, kagian na libru na Biblia nga Nepakannammu nga i tallu anna gaddua nga tiempo ay katumbas na 1,260 nga aggaw. (Nepakannammu 12:6, 14) Nu madoble i tallu anna gaddua nga tiempo, mala i pitu nga tiempo, onu 2,520 nga aggaw. Ta Biblia, meyusa nu karuan i tadday nga aggaw tapenu tumukoy ta tadday nga ragun. (Ezekiel 4:6) Kunnatun i pitu nga tiempo nga nakagi ta libru na Daniel—katumbasna i 2,520 nga dagun.
5. Dakal i nangulian na mundo namegafu turi 1914
Kinagi ni Jesus nu anni ira i mesissimmu ta mundo kabalinna nga metrono bilang Patul. Bibbigan i Lucas 21:9-11, anna paguvovugan yaw nga pakkiavu:
-
Anni taw ira nga mesissimmu i nasingan onu naginnam ngana?
Kinagi ni apostol Pablo nu anni i ugali na totolay ta pangurianan nga aggaggaw na pammaguray na tolay. Bibbigan i 2 Timoteo 3:1-5, anna paguvovugan yaw nga pakkiavu:
-
Anni taw ira nga ugali i naobserbam ta totolay sangawe?
6. I efekto nikaw na pammaguray na Pappatulan na Dios
Bibbigan i Mateo 24:3, 14, anna paguvovugan yaw ira nga pakkiavu:
-
Anni nga importante nga trabahu i mangipasingan nga mammaguray ngana i Pappatulan na Dios?
-
Kunnasi ka nga makoffun tatun nga trabahu?
Mammaguray ngana i Pappatulan na Dios, anna aranni ngana nga pammagurayanna i interu nga davvun. Bibbigan i Hebreo 10:24, 25, anna paguvovugan yaw nga pakkiavu:
-
Anni nakuan i kuan na kada tadday nittam ta “masingat-tam tu aranni ngana i Aggaw na Yafu”?
Anni i kuammu nu egga i nammuammu nga makoffun anna makepaliag ta tanakuan?
BAKA IYAVU NA KARUAN: “Ngatta kakkagian na Saksi ira ni Jehova nga importante nga dagun i 1914?”
-
Anni i makagim?
ANNI I NAGIGIAMMUM?
Pakurugan na profesiya na Biblia, kronolohia, anna na mesissimmu ira ta mundo nga mammaguray ngana i Pappatulan na Dios. Ipasingattam nga mangurug ittam tatun nu ilayyagayya tam yatun anna magatende ittam ta study.
Review
-
Anni i nesimmu kabalin na pitu nga tiempo nga neprofesiya ta Daniel?
-
Ngatta mangurug ka nga namegafu nga nammaguray turi 1914 i Pappatulan na Dios?
-
Kunnasim mepasingan nga mangurug ka nga mammaguray ngana i Pappatulan na Dios?
I AWAYYAM PAGA KUAN
Ammuan i kagian na historiador ira anna na tanakuan meyannung ta dakal nga nangulian na mundo namegafu turi 1914.
Bibbigan nu kunnasi nga nakoffun i profesiya ta Mateo 24:14 ta tadday nga lalaki.
“Grabe i Pangaya Ku ta Baseball!” (Passifusifutan Num. 3 2017)
Ngatta makagi tam nga meyannung ta Pappatulan na Dios i profesiya ta Daniel kapitulo 4?
“Kanni Namegafu nga Nammaguray i Pappatulan na Dios? (Part 1)” (Passifusifutan, Oktubre 1, 2014)
Anni i mangipasingan nga nangultimu turi 1914 i “pitu nga tiempo” nga nakagi ta Daniel kapitulo 4?
“Kanni Namegafu nga Nammaguray i Pappatulan na Dios? (Part 2)” (Passifusifutan, Nobiembre 1, 2014)
a Bibbigan i dua nga ultimu nga artikulo ta seksion nga I Awayyam Paga Kuan taw nga leksion.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
