LEKSION 34
Kunnasi Tam Mepasingan i Aya Tam Kani Jehova?
Mas nga naddukko ka kari ta Dios turi ta naggigiammu ka tu Biblia? Kayà mu kari nga mas paga nga malladda i pakikkofummu nisa? Nu masingan ni Jehova nga mas ayatammu yayya, mas gapa nga ayatan anna ikavurungan naka. Kunnasim mepasingan i aya mu nisa?
1. Kunnasi tam mepasingan kani Jehova nga ayatattam yayya?
Mepasingattam nga ayatattam si Jehova nu tuttulattam yayya. (Bibbigan i 1 Juan 5:3.) Arianna fuersan i maski sinni nga tumuttul nisa. Niddanna ittam tu pakawayya nga mappili nu tuttulattam yayya onu ari. Ngatta? Ikayana gare nga “napafutu” i pamarulo tam. (Roma 6:17) Ikayana nga tuttulammu yayya megafu ta ayatammu yayya, ari tu megafu ta obligadu ka laman nga kuan yatun. Moffunan naka na Seksion 3 anna 4 naw nga libru tapenu mepasingammu i aya mu kani Jehova gukaban na pangngua ta ikayana anna pallilli ta ikalussona.
2. Ngatta awayyana nga marigatattam nga ipasingan i aya tam kani Jehova?
“I matunung nga tolay ay aru nga ziga i attamman na.” (Salmo 34:19) Aru i meparubang nittam nga problema gafu ta kina-imperfekto tam. Meparubang ittam gapa ta ziga na pattolay, kawan na hustisia, anna karuan paga ira nga problema. Yari tu, baka marigatattam nga kuan i ikikkiddaw nittam ni Jehova. Megafu ta mas alistu laman nittam nga kuan i marake. Ngem nu kuammu i ngamin nga mawayyam tapenu tuttulan si Jehova, mepasingammu i aya mu nisa. Mapakurug mu gapa nga matalo ka nisa. Megafu tatun, matalo gapa yayya nikaw anna ari naka vuluvuga panawan.—Bibbigan i Salmo 4:3.
GIGIAMMUAN I ARU PAGA
Ammuan nu ngatta importante kani Jehova i pamarulo mu, anna nu anni i makoffun nikaw nga mattalupaddian nga matalo nisa.
3. Nelagum ka ta tadday nga isyu
Segun ta libru na Biblia nga Job, inakusan ni Satanas si Job anna i ngamin nga totolay nga kayàda nga passerbian si Jehova. Bibbigan i Job 1:1, 6–2:10, anna paguvovugan yaw ira nga pakkiavu:
-
Segun kani Satanas, ngatta tuttulan ni Job si Jehova?—Innan i Job 1:9-11.
-
Anni i akusasion ni Satanas nikaw, anna ta ngamin nga totolay?—Innan i Job 2:4.
Bibbigan i Job 27:5b, anna paguvovugan yaw nga pakkiavu:
-
Kunnasi nipasingan ni Job nga talaga iddukanna si Jehova?
Nipasingan ni Job i ayana kani Jehova ta pattalupaddianna nga matalo nisa
Mepasingattam i aya tam kani Jehova nu mattalupaddiattam nga matalo nisa
4. Pagayayyatan i futu ni Jehova
Bibbigan i Proverbio 27:11, anna paguvovugan yaw ira nga pakkiavu:
-
Anni i matageno ni Jehova nu mammasirib anna tuttulammu yayya? Ngatta?
5. Awayyam i mabbalin tu matalo kani Jehova
Paguyuan ittam na aya tam kani Jehova nga ikagi ta tanakuan i meyannung nisa. Nu matalo ittam nisa, kuattam yatun maski nu marigatattam. Girawan i VIDEO, anna paguvovugan yaw ira nga pakkiavu:
-
Marigatakka kari nga ikagi ta tanakuan i meyannung kani Jehova?
-
Ta video, anni i nakoffun kani Grayson tapenu malabananna i assingna?
Mas mabi i mabbalin tu matalo kani Jehova nu ayatattam i ayatanna anna ikalussaw tam i ikalussona. Bibbigan i Salmo 97:10, anna paguvovugan yaw ira nga pakkiavu:
-
Ta nagigiammum ngana ira, anni ira i kakayà ni Jehova? Anni ira i ikalussona?
-
Kunnasim nga magigiammu nga ayatan i mapia anna ikalussaw i marake?
6. Mabenefisiowan ittam ta panuttul kani Jehova
Pammakapianattam kanayun i panuttul kani Jehova. Bibbigan i Isaias 48:17, 18, anna paguvovugan yaw ira nga pakkiavu:
-
Makapattalo ka kari nga ammu ni Jehova i kapianan para nittam? Ngatta?
-
Anni ngana ira i neyuffun nikaw na nammuammu ta Biblia anna ta kurug nga Dios nga si Jehova?
I KAGIAN NA KARUAN: “Ari mafektan i Dios ta maski anni nga kuakku.”
-
Anni nga teksto i awayyam usan tapenu ipasingan nga awayya tam mapagayayya onu maparraddam si Jehova ta kukukuattam?
ANNI I NAGIGIAMMUM?
Mepasingammu nga ayatammu si Jehova nu tuttulammu yayya anna mattalupaddiakka nga matalo nisa maski nu marigatakka.
Review
-
Anni i nagigiammum ta ehemplo ni Job?
-
Kunnasim mepasingan i aya mu kani Jehova?
-
Anni i makoffun nikaw tapenu makapattalupaddiakka nga matalo kani Jehova?
I AWAYYAM PAGA KUAN
Innan nu kunnasi ka mabbalin tu matalo kani Jehova anna ta kongregasion.
Ammuan nu anni paga ira i akusasion ni Satanas ta totolay.
“Nattalupaddian nga Matalo si Job” (I Biblia—Anni i Mensahena? seksion 6)
Girawan nu kunnasi mepasingan maski na abbarabbing i ayada kani Jehova.
Kunnasi makapattalupaddian nga matalo ta Dios i kabataan ira maski nu meparubang ira ta pamipilit?
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
