LEKSION 36
Kanayun nga Makkagi tu Kurug
Kayà tam ngamin i kokkofun nga kanayun nga makkagi tu kurug. Ekspektan gapa ni Jehova nga makkagi tu kurug i kokkofunna. Ngem ari tu mabi yatun megafu ta aru i totolay nga mangilloku. Ngatta pammakapianattam nu kanayun ittam nga makkagi tu kurug?
1. Anni i pinaka-importante nga rason nu ngatta makkagi ittam tu kurug?
Nu makkagi ittam tu kurug, mepasingattam i aya anna respeto tam kani Jehova. Daddammammu: Ammu ni Jehova i ngamin nga nononopan anna kukukuattam. (Hebreo 4:13) Masinganna nu piliattam nga kuan i fustu, anna magayayya yayya tatun. Nakagi ta Uvovugna: “Kala-kalussaw ni Jehova i tolay nga minangngilloku, ngem madukko nga kofunna i matunung ira.”—Proverbio 3:32.
2. Kunnasi tam mepasingan nga mapammakatalakkan ittam kanayun?
Kayà ni Jehova nga “makkagi [ittam] tu kurug ta kataggi-tadday.” (Zacarias 8:16, 17) Anni i kebalinanna? Ariattam malladdug onu mangiyawa tu ari fustu nga informasion nu kibbidattam i kafamilia tam, katrabahu, kapangngurug, onu ofisial ira na gobiernu. Ariattam makkoko anna ariattam illokuan i tanakuan. (Bibbigan i Proverbio 24:28 anna Efeso 4:28.) Mappaga ittam tu fustu nga vugi onu tax. (Roma 13:5-7) Nu kunnatun i kuattam, mabbalin ittam tu “mapammakatalakkan ta ngamin nga gannug.”—Hebreo 13:18, NW.
3. Anni i makasta nga resultana nu mapammakatalakkan ittam?
Nu mapammakatalakkan ittam kanayun, mattalo nittam i tanakuan. Moffunattam gapa i ngamin ta kongregasion tapenu mabbalin tu komfortable nga gitta tam i makkakafamilia. Mapeggattam gapa tu marenu nga konsensia. Nu mapammakatalakkan ittam, “mepasingan i pia na tuttuddu nga meyannung ta Dios nga Mammaliag nittam,” anna mapaguyu gapa i karuan nga maddayaw kani Jehova.—Tito 2:10.
GIGIAMMUAN I ARU PAGA
Ammuan i efekto nikaw anna kani Jehova na pakkagim tu kurug, anna gigiammuan nu kunnasi ka mabbalin tu mapammakatalakkan kanayun.
4. Magayayya si Jehova nu makkagi ittam tu kurug
Bibbigan i Salmo 44:21 anna Malakias 3:16, anna paguvovugan yaw ira nga pakkiavu:
-
Ngatta ariattam melimag i kurug?
-
Anni i matageno ni Jehova nu kagiattam i kurug maski mariga nga kuan yatun nu karuan?
Magayayya i magana ira nu kagian na ánada i kurug. Magayayya gapa si Jehova nu kagiattam i kurug
5. Kanayun nga makkagi tu kurug
Aru i mangurug nga ari tu posible i kanayun nga pakkagi tu kurug. Ngem ikonsidera nu ngatta ta mawag nga mapammakatalakkan ittam kanayun. Girawan i VIDEO.
Bibbigan i Hebreo 13:18, NW, anna paguvovugan nu kunnasi ittam mabbalin tu mapammakatalakkan . . .
-
ta familia.
-
ta trabahu onu eskuela.
-
ta tanakuan paga.
6. Mabenefisiowattam nu makkagi ittam tu kurug
Ta ollu, gittana makkaproblema laman ittam nu makkagi ittam tu kurug. Ngem kanayun nga makasta i resulta na pakkagi tu kurug. Bibbigan i Salmo 34:12-16, anna paguvovugan yaw nga pakkiavu:
-
Anni i makasta nga resultana ta pattolem na pakkagim tu kurug?
-
Nu mapammakatalakkan i magatawa, malladda i relasiodda
-
Nu mapammakatalakkan i empleyadu, mattalo nisa i boss na
-
Nu mapammakatalakkan i tadday nga magili, makasta i reputasionna ta ofisial ira na gobiernu
I KAGIAN NA KARUAN: “Okay laman i malladdug nu baddi laman nga gannug.”
-
Ngatta kurugammu nga ikalussaw ni Jehova i ngamin nga kinaladdug?
ANNI I NAGIGIAMMUM?
Kayà ni Jehova nga kanayun nga mapammakatalakkan i kokkofunna.
Review
-
Anni i karuan ira nga situasion nga mawag nga kagiammu i kurug?
-
Ngatta ariattam melimag i kurug?
-
Ngatta kayà mu i mabbalin tu mapammakatalakkan kanayun?
I AWAYYAM PAGA KUAN
Kunnasi nga matudduan na magana ira i ánada nga makkagi tu kurug?
Anni ira i makasta nga resultana nu tuppalattam i promesa tam ira?
Ammuan nu ngatta mawag nga mappaga ittam tu tax maski nu ari tu fustu i keyusanna.
“Ngatta Mawag nga Mappaga Ittam tu Tax?” (Passifusifutan, Setiembre 1, 2011)
Anni i nakoffun ta tadday nga minangngilloku tapenu ulianna i kata-katolena?
“Nagigiammù nga Minangngikallo Anna Minammakoma si Jehova” (Passifusifutan, Mayo 1, 2015)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
