LEKSION 37
I Kagian na Biblia Meyannung ta Trabahu Anna Kuartu
Tadday kari ta pakavurungammu i trabahu onu kuartu? Awayyana nga mariga paggiddanan i pagaleg ta pakawagattam anna iyawa kani Jehova i mepappangngo nga paddayaw. Mangiyawa i Biblia tu tabarang ira nga makoffun nittam.
1. Anni i kagian na Biblia meyannung ta trabahu?
Ikaya na Dios nga magayayya ittam ta trabahu tam. Kinagi na Biblia nga “awan ngana tu mas makasta para ta tolay nu ari i . . . magayayya ta ngamin nga pinabbannaganna.” (Eclesiastes 2:24) Malappo si Jehova. Nu mallallappo ittam gapa kagittana, magayayya ittam anna si Jehova.
Importante i trabahu. Ngem ariattam ipamavulun nga mabbalin tu mas importante yatun anne ta paddayaw tam kani Jehova. (Juan 6:27) Nipromesa ni Jehova nga nu pagolluattam yayya, iyawana i pakawagattam.
2. Anni i fustu nga pagimamma ta kuartu?
Kagian na Biblia nga “proteksion i kuartu,” anna ari laman tu kuartu i mamagayayya nittam. (Eclesiastes 7:12) Ariattam nakuan gafu nga ayatan i kuartu anna ‘makkontento ta anni laman nga egga’ nittam. (Bibbigan i Hebreo 13:5.) Nu kontentu ittam, ariattam makkaraga tu mas aru paga. Malisiattam i makagatu. (Proverbio 22:7) Malillitattam gapa i marake nga efekto na passugal anna ari ittam melogo ta negosio ira nga mabi kanu nga pakkuartuan.
3. Kunnasi tam meyusa ta kapianan i kuartu tam?
Minangngiyawa nga Dios si Jehova, anna maparigattam yayya nu vuka i palag tam nga mangiyawa anna ‘sigga-paran ittam nga mangibillay.’ (1 Timoteo 6:18) Meyusa tam i kuartu tam ta kapianan gukaban na passuporta ta kongregasion anna ta makawag ira, mas ngana ta kapangngurug tam. Mas appresian ni Jehova i motibo tam ta pangiyawa ari tu i karu na iyawa tam. Nu napafutuan nga mangiyawa ittam, mabbalin ittam tu magayayya anna mapagayayya tam si Jehova.—Bibbigan i Kingngua 20:35.
GIGIAMMUAN I ARU PAGA
Ammuan i benefisiona nu fustu i pagimamma mu ta trabahu anna nu kontentu ka.
4. Medayaw nakuan si Jehova ta trabahum
Megafu ta kofuttam si Jehova, makasta nakuan i pagimamma anna ugali tam ta trabahu. Girawan i VIDEO, anna paguvovugan yaw ira nga pakkiavu:
-
Ta video, anni i naappresiam ta ugali anna kondukta ni Jason ta pattrabahuanna?
-
Kunnasi yayya nabbalin tu balanse ta trabahuna?
Bibbigan i Colosas 3:23, 24, anna paguvovugan yaw nga pakkiavu:
-
Ngatta importante i pagimamma tam ta trabahu?
Importante i trabahu. Ngem ariattam ipamavulun nga mabbalin tu mas importante yatun anne ta paddayaw tam kani Jehova
5. Mabenefisiowan ittam nu kontentu ittam
Ikaguman na aru nga totolay i mappariku. Ngem ari tu kunnatun i ipagaram na Biblia. Bibbigan i 1 Timoteo 6:6-8, anna paguvovugan yaw nga pakkiavu:
-
Anni i ipagaram na Biblia nga kuattam?
Magayayya ittam lagapa maski nu baddi laman i pakkukua tam. Girawan i VIDEO, anna paguvovugan i tumunug nga pakkiavu.
-
Ta video, anni i namagayayya ta familia ira maski nu mariga i pattoleda?
Kunnasi nu aru ngana i pakkukuam ngem ari ka paga makontentu? Nangiyawa si Jesus tu ilustrasion tapenu ipasingan i peligro natun. Bibbigan i Lucas 12:15-21, anna paguvovugan yaw nga pakkiavu:
-
Anni i nagigiammum ta ilustrasion ni Jesus?—Innan i versikulo 15.
Bibbigan i Proverbio 10:22 anna 1 Timoteo 6:10. Kabalinna, paguvovugan yaw ira nga pakkiavu:
-
Para nikaw, anni i mas importante? I pakikkofun kani Jehova onu aru i kuartuna? Ngatta?
-
Anni i marake nga resulta na pangaya ta kuartu?
6. Iyawa ni Jehova i kawagattam ira
Mapurueban i pangurug tam kani Jehova nu makkaproblema ittam ta trabahu anna ta kuartu. Girawan i VIDEO tapenu masingan nu kunnasi tam marubang yatun ira nga problema, anna paguvovugan i tumunug ira nga pakkiavu.
-
Ta video, anni ira nga problema i neparubang ta brother?
-
Kunnasina narubang yatun ira nga problema?
Bibbigan i Mateo 6:25-34, anna paguvovugan yaw nga pakkiavu:
-
Anni i nipromesa ni Jehova nga kuanna nu pagolluattam yayya?
I KAGIAN NA KARUAN: “Mawag ku mattrabahu tu aru nga oras para ta familià, yari tu awan ngana tu tiempò nga makistudy.”
-
Anni nga teksto i mangumbinsi nikaw nga i pangipoppollu ta paddayaw kani Jehova i kapianan nga desision?
ANNI I NAGIGIAMMUM?
Kawagattam i trabahu anna kuartu, ngem ari nakuan tu yatun i mangifugag ta passerbi tam kani Jehova.
Review
-
Anni i makoffun nikaw nga mapattalupaddian i balanse nga pagimamma ta trabahu?
-
Kunnasi ka mabenefisiowan nu kontentu ka?
-
Kunnasim mepasingan nga mattalo ka ta promesa ni Jehova nga iyawana i kawagan na totolena?
I AWAYYAM PAGA KUAN
Gigiammuan nu marake i kuartu segun ta Biblia.
“I Kuartu Kari i Paggafuan na Ngamin nga Marakay?” (Artikulo ta website)
Ammuan nu anni nga pangiyawa i mamagayayya ta Dios.
“Anni i Kagian na Biblia Meyannung ta Pangiyawa?” (Artikulo ta website)
Awan kari tu marake ta passugal?
Innan nu anni i nakoffun ta tadday nga minassugal anna minakkoko nga manguli.
“Kakayà Ku i Karera na Kabayu” (Passifusifutan, Nobiembre 1, 2011)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
