LEKSION 38
Tagibaloran i Regalu nga Inango
Aru i makakkasta nga makua anna maekspiriensa tam megafu ta matolay ittam. Maski nu makkaproblema ittam, awayya tam lagapa i magayayya. Kunnasi tam mepasingan nga tagibalorattam i regalu nga inango? Anni i importante nga rason nu ngatta kuattam yatun?
1. Ngatta tagibalorattam i inango?
Tagibalorattam i inango megafu ta regalu yatun na minaggiddu nga Yama tam nga si Jehova. Yayya i “paggafuan” na inango—pinaratuna i ngamin. (Salmo 36:9) “Yaya mismu i mangiyawa tu inango, tu pattolay anna ngamin nga ganna-gannug ta ngamin nga totolay.” (Kingngua 17:25, 28) Niyawa ni Jehova i ngamin nga kawagattam tapenu matolay anna magayayya ittam.—Bibbigan i Kingngua 14:17.
2. Kunnasi tam mepasingan nga tagibalorattam i regalu nga inango?
Namegafu turi ta nevussi naka na yenam, ikavurungan naka ngana ni Jehova. Ta pakimallo nga nilavu ni Jehova ta Uvovugna, kinagi nisa na aripanna nga si David: “Ari ngà paga neyana ay nasingam-mà ngana.” (Salmo 139:16) Tagibaloran ni Jehova i inango mu. (Bibbigan i Mateo 10:29-31, NW.) Kuruga matakitan yayya nu egga i mamatay onu mappakamatay. a (Exodo 20:13) Matakitan gapa si Jehova nu pappeligrowattam i inango tam anna i inango na tanakuan. Nu immugurattam i inango tam anna irespeto tam i inango na tanakuan, mepasingattam nga tagibalorattam i regalu nga inango.
GIGIAMMUAN I ARU PAGA
Ammuan nu kunnasim paga mepasingan nga tagibalorammu i regalu nga inango.
3. Immugurammu i gawa-gawayyammu
Usan na dedikadu ira nga Cristiano i interu pattoleda ta passerbi kani Jehova. Gittana iyawada i baggida kunna matolay nga tavvung para ta Dios. Bibbigan i Roma 12:1, 2, anna paguvovugan yaw ira nga pakkiavu:
-
Ngatta immugurammu i gawa-gawayyammu?
-
Kunnasim makua yatun?
4. Magimmugug tapenu malillitan i disgrasia onu patay
Ipagaram na Biblia nga lillitattam i gannug ira nga mamappeligro nittam. Girawan i VIDEO tapenu mammuan i makuam ira tapenu makapagimmugug ka.
Bibbigan i Proverbio 22:3, anna paguvovugan nu kunnasi kamu makapagimmugug . . .
-
ta balenu.
-
ta pattrabahuan.
-
nu maggayam tu isport.
-
nu mammaneho onu nu agga-takay.
5. Tagibaloran i inango na ari paga neyana nga abbing
Kinagi ni David nga ammu ni Jehova i ngamin nga mesissimmu ta abbing ta unag na san na yenana. Bibbigan i Salmo 139:13-17, NW, anna paguvovugan yaw nga pakkiavu:
-
Para kani Jehova, namegafu kari i inango na tadday nga tolay ta nikevussina onu ta nikeyanana?
Egga ira i dorob ni Jehova ta Israelita ira gari nga mapprotekta ta yena ira anna ta agga-vussida. Bibbigan i Exodo 21:22, 23, anna paguvovugan yaw ira nga pakkiavu:
-
Anni i pagimamma ni Jehova ta tolay nga aksidente nga nadannal onu natakitanna i navussi tapus natay i abbing ta sanna?
-
Anni i matagenona nu sadya nga kuan na tadday yatun? b
-
Anni i matageno mu tatun nga pagimamma na Dios?
Awayya nga matageno na tadday nga babay nga mattagibalor ta inango nga i aborsion i solusion ta problemana. Bibbigan i Isaias 41:10, anna paguvovugan yaw ira nga pakkiavu:
-
Nu meparubang i tadday nga babay ta situasion nga kawaganna nga ipalsa i vussina, sinni i pappoffunanna? Ngatta?
I KAGIAN NA KARUAN: “Egga i kepangngattan na tadday nga babay nga ipalsa i vussina—baggina mabba yatun.”
-
Ngatta kurugammu nga nabalor kani Jehova i inango na yena anna na abbing nga ari paga neyana?
ANNI I NAGIGIAMMUM?
Tudduan ittam na Biblia nga ayatan, tagibaloran, anna immuguran i regalu ni Jehova nga inango. Nelavu taw i inango tam anna na tanakuan.
Review
-
Ngatta nabalor kani Jehova i inango na tolay?
-
Anni i matageno ni Jehova nu mappakamatay onu mamatay i tadday?
-
Ngatta tagibalorammu i regalu nga inango?
I AWAYYAM PAGA KUAN
Kunnasi ittam mappabalo kani Jehova ta regaluna nga inango?
Alegan i tabbag ta pakkiavu nga, Mapakoma kari na Dios i tadday nu nappalsa yayya tu vussi?
“Anni i Kagian na Biblia Meyannung ta Aborsion?” (Artikulo ta website)
Ammuan nu kunnasi makoffun i pagimamma na Dios ta inango ta pappili tam tu dibersion.
“‘Delikadu nga Isport’—Puruebammu Kari?” (Malukag!, Oktubre 8, 2000)
Kunnasi nu manono na tadday nga tolay i mappakamatay? Ammuan nu kunnasi makoffun i Biblia.
“Kayà Ku Ngana i Matay—Makoffun Kari i Biblia nu Manono Ku i Mappakamatay?” (Artikulo ta website)
a Ikavurungan ni Jehova i totolay nga makafi i nonoda. (Salmo 34:18) Mantindianna i mataga-tageno na totolay ira nga kayàda ngana i matay, anna kayàna ira nga uffunan. Tapenu mammuan nu kunnasi naka nga moffunan, bibbigan i artikulo nga “Kayà Ku Ngana i Matay—Makoffun Kari i Biblia nu Manono Ku i Mappakamatay?” nga egga ta seksion nga I Awayyam Paga Kuan taw nga leksion.
b Nu napafutuan nga mabbabawi i nappalsa ira tu vussi, mapakoma ira ni Jehova. Yari tu ariadda nakuan ngana nga makokkonsensia. Tapenu mammuan paga i mas aru meyannung taw, innan i artikulo nga “Anni i Kagian na Biblia Meyannung ta Aborsion?” nga egga ta seksion nga I Awayyam Paga Kuan taw nga leksion.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
