LEKSION 39
I Pagimamma na Dios ta Daga
Importante i daga. Ari ittam nga matolay nu awan yatun. I Dios i Namaratu nittam, yari tu egga i kepangngattanna nga makkagi nu kunnasi i pangiyusa tam tu daga. Anni i kinagina meyannung ta daga? Puede kari nga kanan onu metubbo yatun ta baggi tam? Kunnasi ka makakua tu fustu nga desision meyannung tatun?
1. Anni i pagimamma ni Jehova ta daga?
Kinagi ni Jehova ta maddayarayaw ira nisa ta tiempo na Biblia: “I inango na kada pinaratu ay i dagana.” (Levitico 17:14) Para kani Jehova, irepresenta na daga i inango. Sagradu onu masanto i inango, regalu yatun na Dios, yari tu sagradu gapa i daga.
2. Anni nga pangusa tu daga i igamma na Dios?
Nibilin ni Jehova ta aripanna ira gari nga ariadda kuman tu daga. (Bibbigan i Genesis 9:4 anna Levitico 17:10.) Nipasigona yaw nga bilin turi ta nangiyawa i manangngal nga baggi tu instruksion ta Cristiano ira nga tulu-tuloy nga lillitadda i “daga.”—Bibbigan i Kingngua 15:28, 29.
Anni i kebalinan na pallilli ta daga? Nu kinagi na doktor nga lillitammu i binarayang, kebalinanna nga ari ka minum. Ngem kumakka kari tu makan nga egga kivuna nga binarayang onu ipatubbo mu yatun ta kallo mu? Siempre ari. Kunnatun gapa ta bilin na Dios nga lillitan i daga. Kebalinanna nga ari ittam minum onu kuman tu karne na ayam nga ari napadaga. Ariattam gapa kuman tu maski anni nga egga kivuna nga daga.
Kunnasi gapa nu meyusa i daga ta panguru? Manawag nga mekontra ta dob na Dios i karuan tatun. Kasali tatun i pappatubbo tu puro nga daga onu ta primeru nga partena—red cells, white cells, platelets, anna plasma. Egga gapa i klase na papporu nga ari tu direkta nga mekontra ta dob na Dios. Angngariganna, egga i panguru nga meyusa i baraddi nga parte na tadday nga primeru nga parte na daga. Ta karuan gapa ay meyusa i mismu nga dagam. I kada tadday lagapa i maddesision nu anni tatun i pilianna. a—Galacia 6:5.
GIGIAMMUAN I ARU PAGA
Ammuan i makoffun ira tapenu makapaddesisiokka nu anni nga klase na panguru i alawatammu.
3. Mappili tu klase na panguru nga makapagayayya kani Jehova
Kunnasi ka nga makapili tu klase na panguru nga mekunnay ta pagimamma na Dios? Girawan i VIDEO, anna paguvovugan i importansia na panuttul ta tumunug ira.
-
Makimallo ka tapenu mapeggakka tu sirib.—Santiago 1:5.
-
Mar-research tu prinsipio ira na Biblia anna nu kunnasim iyaplika.—Proverbio 13:16.
-
Ammuan nu anni ira nga klase na panguru i available ta lugarnu.
-
Maddesisiokka nu anni nga klase na panguru i ariammu alawatan.
-
Siguraduammu nga marenu lagapa i konsensiam ta desisiommu.—Kingngua 24:16. b
-
Awan nakuan tu maski sinni—maski paga i atawam, tadday nga elder, onu i mangistudy nikaw—i maddesision para nikaw ta gannug ira nga nakadepende ta konsensia.—Roma 14:12.
-
Itura mu i desisiommu.
4. Pilian na Saksi ira ni Jehova i kapianan nga klase na papporu
Posible nga matuttul i dob na Dios meyannung ta daga anna mapili tam i kapianan nga klase na papporu nga ari meyusa i daga. Girawan i VIDEO.
Bibbigan i Tito 3:2, anna paguvovugan yaw nga pakkiavu:
-
Ngatta mawag nga marespeto anna kalmadu ittam nga makiyuvovug ta doktor ira?
|
Ari mepangngo |
Depende ta konsensia |
|---|---|
|
A. Plasma na daga |
Fraction naggafu ta plasma |
|
B. White cells |
Fraction naggafu ta white cells |
|
C. Platelets |
Fraction naggafu ta platelets |
|
D. Red cells |
Fraction naggafu ta red cells |
5. Nu meyusa i baraddi nga parte na daga
Egga i appa nga primeru nga parte na daga—red cells, white cells, platelets, anna plasma. Egga gapa i baraddi nga parte danatun nga magalan tu blood fractions. c Meyusa i karuan nga fraction ta panguru tapenu malabanan i taki ira onu tapenu mapagimmang i paddaga.
Nu meyannung ta baraddi nga parte na daga, mawag nga maddesision lagapa i kada Cristiano base ta nasanay-Biblia nga konsensiana. Pammanakitan na karuan i klase na panguru nga meyusa i baraddi nga parte na daga. Ngem alawatan gapa yatun na konsensia na karuan.
Ta paddesisiommu, ikonsideram yaw nga pakkiavu:
-
Kunnasì mepakanawag ta doktor ku nu ngatta alawatakku onu ari i panguru nga meyusa i baraddi nga parte na daga?
BAKA IYAVU NA KARUAN: “Anni gapa i marake ta pappatubbo tu daga?”
-
Anni i tabbag mu?
ANNI I NAGIGIAMMUM?
Kayà ni Jehova nga lillitattam i ari nga fustu nga pangiyusa tu daga.
Review
-
Ngatta imammatan ni Jehova nga sagradu i daga?
-
Ngatta makagi tam nga kasali i pappatubbo tu daga ta bilin na Dios nga lillitan i daga?
-
Kunnasi ka makangngua tu makasta nga desision nu meyannung ta papporu nga meyusa i daga?
I AWAYYAM PAGA KUAN
Anni nakuan ira i ikonsideram nigem maddesision nu alawatammu i papporu nga meyusa i mismu nga dagam?
“Pakkiavu na Mabbibbig Ira” (Passifusifutan, Oktubre 15, 2000)
Anni nakuan i ikonsideram nigem maddesision nu alawatammu i papporu nga meyusa i baraddi nga parte na daga?
“Pakkiavu na Mabbibbig Ira” (Passifusifutan, Hunio 15, 2004)
Anni i nakoffun ta tadday nga doktor tapenu kurugan nga rasonable i pagimamma ni Jehova ta daga?
“Inalawa Ku i Pagimamma na Dios ta Daga” (Malukag!, Disiembre 8, 2003)
Gigiammuan nu kunnasi nga uffunan na elder ira nga massesserbi ta Hospital Liaison Committee i wawwaragi ira.
a Innan i Leksion 35, “Nu Kunnasi Ka Makangngua tu Makasta ira nga Desision.”
b Innan i mekalima nga punto nga “Nu Meyusa i Baraddi nga Parte na Daga,” anna Endnote 3, “Klase na Panguru nga Meyusa i Daga.”
c Ibilang na karuan nga doktor nga fraction laman i appa nga primeru nga parte na daga. Mawag gafu nga ipakanawag mu i personal nga desisiommu nga ari mappatubbo tu puro nga daga anna red cells, white cells, platelets, onu plasma.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
