LEKSION 40
Mabbalin tu Marenu ta Paningan na Dios
Imajinammu i minaggiddu nga yena nga pagannuatanna i anana nga umay ta eskuela. Siguraduanna nga nakazigu i anana, tapus marenu anna maayus i sinnunna. Megafu tatun, melilli i abbing ta taki anna masingan na tanakuan nga tangngawan yayya tu mapia na maganana. Kunnatun gapa i minaggiddu nga Yama tam nga si Jehova. Ikayana nga mabbalin ittam tu marenu ta pisikal anna moral. Nu marenu ittam, mabenefisiowattam anna medayaw tam yayya.
1. Kunnasi ittam mabbalin tu marenu ta pisikal?
Kinagi ni Jehova: “Mappakasanto kamu.” (1 Pedro 1:16) Tapenu mabbalin ittam tu masanto, mawag nga marenu ittam ta pisikal anna moral. Regular ittam nakuan nga mazzigu, kanayun nga marenu anna maayus i sinnun, balay, anna takay tam. Awayya tam gapa i manguffun ta pappakarenu ta Kingdom Hall. Nu kanayuttam nga marenu ta pisikal, medayaw tam si Jehova.—2 Corinto 6:3, 4.
2. Anni ira nga annangngua i mawag nga lillitattam tapenu marenu ittam?
Pagaramman ittam na Biblia nga “pakarennuat-tam i baggi anna espiritu tam ta anni laman nga makaparitta nittam.” (2 Corinto 7:1) Ikagumattam gafu nga lillitan i maski anni laman nga makadaral ta baggi anna nono tam. Mapagayayya tam nakuan gapa si Jehova ta nononopattam. Kuattam gafu i adde na mawayya tam tapenu lillitan i ari mepangngo ira nga appana-panono. (Salmo 104:34, NW ) Marenu nakuan gapa i paguvovug tam.—Bibbigan i Colosas 3:8.
Anni ira i karuan nga mamarritta nittam ta pisikal onu moral? Mamarritta ta baggi tam i pattabaku onu passigariliu, pammama, anna pangusa tu ilegal nga droga. Yari tu lillitattam nakuan danatun tapenu mabbalin ittam tu magawa-gawayyan anna mepasingattam nga tagibalorattam i regalu nga inango. Mabbalin ittam gapa tu marenu ta moral nu labanattam i maritta ira nga annangngua kagitta na masturbasion anna pornograpia. (Salmo 119:37; Efeso 5:5) Awayyana nga mariga nga lillitan yatun ira nga annangngua, ngem moffunan ittam ni Jehova nga kuan yatun.—Bibbigan i Isaias 41:13.
GIGIAMMUAN I ARU PAGA
Ammuan nu kunnasi tam medayaw si Jehova nu marenu ittam, anna nu kunnasi tam nga malabanan i maritta ira nga annangngua.
3. Medayaw tam si Jehova nu marenu ittam ta pisikal
Mammuattam i pagimamma ni Jehova ta kinarenu nu gigiammuattam i bilinna ta Israelita ira. Bibbigan i Exodo 19:10 anna 30:17-19, anna paguvovugan yaw ira nga pakkiavu:
-
Anni i magigiammum taw ira nga teksto ta pagimamma ni Jehova ta pisikal nga kinarenu?
-
Anni ira i makuam tapenu kanayukka nga marenu ta pisikal?
Kawagan i tiempo anna pappursigi tapenu mabbalin tu marenu ta pisikal. Ngem mawayya tam nga kuan yatun maski sitaw i paddianattam anna maski anni i estado na pattoletam. Girawan i VIDEO, anna paguvovugan i tumunug nga pakkiavu.
-
Ngatta irespeto na layyagayyattam ira si Jehova nu masingadda nga kanayun nga maayus anna marenu i pakkukua tam?
4. Iyemmang i marake ira nga bisiu
Moffunan ittam ni Jehova nga meyemmang i marake nga bisiu
Nu massigariliu ka onu mangusa tu ilegal nga droga, siguradu nga ammum nu kunnasi kariga iyemmang yatun. Anni i makoffun? Ammuammu i efektona nikaw. Bibbigan i Mateo 22:37-39, anna paguvovugan nu kunnasi afektan na pattabaku onu passigariliu onu pangiyusa tu ilegal nga droga . . .
-
i pakikkofummu kani Jehova.
-
i familiam anna i totolay ta pallevu mu.
Mapplano nu kunnasi meyemmang i marake nga bisiu. a Girawan i VIDEO.
Bibbigan i Filipos 4:13, NW, anna paguvovugan yaw nga pakkiavu:
-
Kunnasi makoffun ta tadday i kanayun nga paddasal, paggigiammu tu Biblia, anna pagatende ta study tapenu meyemmanna i marake nga annangngua?
5. Labanan i maritta nga appana-panono anna annangngua
Bibbigan i Colosas 3:5, anna paguvovugan yaw ira nga pakkiavu:
-
Ngatta makagi tam nga maritta para kani Jehova i pornograpia, sexting, anna masturbasion?
-
Rasonable kari nga kayà ni Jehova nga mabbalin ittam tu marenu ta moral? Ngatta?
Girawan nu kunnasi malabanan i maritta nga appana-panono. Girawan i VIDEO.
Nangiyusa si Jesus tu ilustrasion tapenu ipasingan nga mawag tu determinadu ittam nga kuan i ngamin tapenu kanayun ittam nga marenu ta moral. Bibbigan i Mateo 5:29, 30, NW, anna paguvovugan yaw nga pakkiavu:
-
Ari kakkagian ni Jesus nga takitattam i baggi tam, nu ari, kakkagianna nga mawag nga egga i kuattam. Anni i mawag nga kuan na tadday tapenu malillitan i maritta nga appana-panono? b
Tagibaloran ni Jehova i pappursigim nga labanan i maritta nga appana-panono. Bibbigan i Salmo 103:13, 14, anna paguvovugan yaw nga pakkiavu:
-
Nu marigatakka nga iyemmang i maritta nga annangngua, kunnasi naka pagaramman naw nga teksto tapenu itulu-tuloy nga labanan yatun?
Ari nakuan makkafi i nono mu!
Baka manono mu, ‘Nakuà mangana, ariakku ngana meyemmang yaw.’ Ngem nonopammu yaw: Nu neduki i tadday nga makippareha, arianna kebalinan nga naffu ngana yayya, onu pegafuananna uli i pareha. Kunnatun gapa nu nakuam mangana i marake nga annangngua, arianna kebalinan nga ariammu ngana meyemmang yatun onu awan tu sesserbi na pappursigim ta nappasa. Egga ira i tiempo nga makuam uli yatun, ngem parte yatun na pakillabammu ta marake nga annangngua. Pasikannammu i nono mu! Uffunan naka ni Jehova nga meyemmang i marake nga annangngua.
I KAGIAN NA KARUAN: “Nasanay ngà ngana nga kuan yaw. Ariakku ngana meyemmang.”
-
Anni nga teksto i awayyam usan tapenu ipasingan ta tadday nga uffunan yayya ni Jehova nga meyemmang i marake nga annangngua?
ANNI I NAGIGIAMMUM?
Mapagayayya tam si Jehova nu marenu i baggi, nono, anna kondukta tam.
Review
-
Ngatta importante nga marenu ka?
-
Kunnasi ka mabbalin tu marenu ta pisikal?
-
Kunnasi mabbalin tu marenu kanayun i appana-panono anna konduktam?
I AWAYYAM PAGA KUAN
Anni ira i awayyam kuan tapenu mabbalikka tu marenu ta pisikal maski nu mariga laman i pattolem?
Ammuan nu anni paga i makuam tapenu meyemmang i passigariliu.
Innan i efekto na pornograpia.
“Pornograpia—Makadaral onu Ari?” (Passifusifutan, Agosto 1, 2013)
Ammuan nu kunnasi nalabanan na tadday nga lalaki i pornograpia.
“Namippiga Ngà Naffu Nigè Nangaffu” (Passifusifutan, Hulio 2016)
a Mammuan ta “Nu Kunnasi Meyemmang i Passigariliu,” ta seksion nga I Awayyam Paga Kuan taw nga leksion nu anni ira i awayya kuan na tadday tapenu meyemmang yaw nga bisiu.
b Ammuan i makoffun tapenu meyemmang na tadday i masturbasion. Bibbigan i “Paano Ko Madadaig ang Masturbasyon?” ta libru nga Ang mga Tanong ng mga Kabataan—Mga Sagot na Lumulutas, Tomo 1, kabanata 255.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
