LEKSION 41
Anni i Kagian na Biblia Meyannung ta Sex?
Ari nga komfortable i aru nga pabbidan i meyannung ta sex. Ngem nu kagian na Biblia i meyannung ta sex, direkta anna marespeto yatun. Mabenefisiowattam ta kagian na Biblia megafu ta naggafu yatun kani Jehova nga Namaratu nittam. Ammuna gafu i mapia para nittam. Kagianna nu kunnasi tam yayya nga mapagayayya anna nu kunnasi ittam nga magayayya nga mattolay tu mannanayun.
1. Anni i pagimamma ni Jehova ta sex?
Regalu ni Jehova i sex. Ikayana nga magayayya tatun i lalaki anna babay nga kasal ta kataggi-tadday. Niregaluna yaw ta magatawa, ari laman tapenu makka-ana ira, nu ari, tapenu mepatagenoda i pangayada ta kataggi-tadday. Yari tu kagian na Uvovug na Dios: “Magayayya ka ta atawam ta kasikannammu.” (Proverbio 5:18, 19) Kayà ni Jehova nga matalo i Cristiano ira ta gi-attawadda, yari tu ariadda mamabay onu maki-lalaki.—Bibbigan i Hebreo 13:4.
2. Anni i paggannug onu seksual nga imoralidad?
Nakagi ta Biblia nga “i Pammagurayan na Dios ay ari nga irensian na minaggannug.” (1 Corinto 6:9, 10) Niyusa na nattura ira ta Biblia i Griego nga uvovug nga por·neiʹa ta seksual nga imoralidad. Nelavu tatun i (1) seksual nga relasion a na ari magatawa onu na ari nga kasal, (2) homoseksualidad, anna (3) bestialidad. Mapagayayya tam si Jehova anna mabenefisiowattam nu arayyuattam i “paggannug.”—1 Tesalonica 4:3.
GIGIAMMUAN I ARU PAGA
Ammuan nu kunnasim malillitan i seksual nga imoralidad anna i benefisio na pattalupaddian nga marenu ta moral.
3. Lillitan i seksual nga imoralidad
Nikaguman na matalo nga lalaki nga si Jose nga mattalupaddian nga marenu ta moral. Bibbigan i Genesis 39:1-12, anna paguvovugan yaw ira nga pakkiavu:
-
Anni i namaguyu kani Jose nga manaw?—Innan i versikulo 9.
-
Para nikaw, fustu kari i desision ni Jose? Ngatta?
Kunnasi marayyuan na kabataan ira i seksual nga imoralidad kagitta na kingngua ni Jose? Girawan i VIDEO.
Kayà ni Jehova nga lillitattam i imoralidad. Bibbigan i 1 Corinto 6:18, anna paguvovugan yaw ira nga pakkiavu:
-
Anni ira i situasion nga posible nga mattuppal ta seksual nga imoralidad?
-
Kunnasim arayyuan i imoralidad?
4. Malabanammu i tentasion
Ngatta mariga labanan i tentasion na seksual nga imoralidad? Girawan i VIDEO, anna paguvovugan i tumunug nga pakkiavu.
-
Anni i kingngua na brother turi ta nasinganna nga marresulta ta ari kinamatalo ta atawana i nononopan anna kukukuanna?
Ikaguman na matalo ira nga Cristiano nga pabbalinan tu marenu i appana-panonoda. Kunnasim malillitan i pagimajin tu imoral ira nga gannug? Bibbigan i Filipos 4:8, anna paguvovugan yaw ira nga pakkiavu:
-
Anni nakuan ira nga gannug i nononopattam?
-
Kunnasi makoffun i pabbibbig tu Biblia anna pabbalin tu okupadu ta espiritual tapenu malillitattam i tentasion nga makaliwa?
5. Mabenefisiowan ittam ta estandarte ira ni Jehova
Ammu ni Jehova i kapianan para nittam. Kagianna nu kunnasi ittam nga mabbalin tu marenu ta moral anna i benefisiona nu kuattam yatun. Bibbigan i Proverbio 7:7-27 onu girawan i VIDEO, anna paguvovugan i tumunug ira nga pakkiavu.
-
Kunnasi neparubang i kabataan nga lalaki ta makatenta nga situasion?—Innan i Proverbio 7:8, 9.
-
Segun ta Proverbio 7:23, 26, marake i resulta na seksual nga imoralidad. Nu marenu ittam ta moral, anni ira nga problema i malillitattam?
-
Kunnasi makoffun i kinarenu ta moral tapenu malawa tam i mannanayun nga inango?
Nonopan na karuan nga kawan tu aya i kagian na Biblia meyannung ta homoseksualidad. Ngem Dios na aya si Jehova, anna ikayana nga magayayya nga mattolay tu mannanayun i ngamin. Tapenu malawa tam yatun, mawag nga mattolay ittam segun ta estandartena ira. Bibbigan i 1 Corinto 6:9-11, anna paguvovugan yaw nga pakkiavu:
-
Para ta Dios, i homoseksual nga pakkaraga kari laman i ari mepangngo?
Tapenu mapagayayya tam i Dios, kawagattam i manguli. Pammakapianattam kari nu kuattam yatun? Bibbigan i Salmo 19:8, 11, anna paguvovugan yaw ira nga pakkiavu:
-
Para nikaw, rasonable kari i moral nga estandarte ira ni Jehova? Ngatta?
Aru i noffunan ni Jehova nga tumuttul ta moral nga estandartena ira. Moffunan naka gapa.
I KAGIAN NA KARUAN: “Awayyam i maki-sex ta maski sinni basta iddukannu i kataggi-tadday.”
-
Anni i makagim?
ANNI I NAGIGIAMMUM?
Regalu ni Jehova i sex ta magatawa tapenu magayayya ira tatun.
Review
-
Anni i seksual nga imoralidad?
-
Anni i makoffun nittam nga lillitan i seksual nga imoralidad?
-
Anni ira i benefisio na panuttul ta moral nga estandarte ira ni Jehova?
I AWAYYAM PAGA KUAN
Gigiammuan nu ngatta kayà na Dios nga makkasal labbi i tadday nga lalaki anna babay nigeda mattadday.
“Anni i Kagian na Biblia ta Pal-live-in?” (Artikulo ta website)
Ammuan nu ngatta i estandarte na Biblia meyannung ta homoseksualidad, arianna ipagaram nga ikalussaw tam ira.
Gigiammuan nu kunnasi ittam maprotektan na dob na Dios meyannung ta sex.
Ta ekspiriensa nga “Nirespetodà,” innan nu anni i namaguyu ta tadday nga homoseksual nga ulian i pattolena tapenu pagayayyatan i Dios.
“Pakastan na Biblia i Pattolay” (Passifusifutan, Abril 1, 2011)
a Nelavu taw nga ari mepangngo ira nga annangngua i paki-sex, oral sex, anal sex, anna ari mepangngo nga pangaffuria ta pribadu nga parte na baggi na tanakuan.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
