LEKSION 42
I Kagian na Biblia Meyannung ta Awan tu Atawana Anna ta Egga i Atawana
Ta karuan nga kultura, kurugan na totolay nga magayayya laman i tadday nu egga i atawana. Ngem ari tu ngamin nga egga i atawana ay magayayya anna ari tu ngamin nga awan tu atawana ay ari magayayya. Kakuruganna, egga i atawam onu awan, parehas nga regalu yatun segun ta Biblia.
1. Anni ira i benefisio na awan tu atawana?
Kinagi na Biblia: “Mapia nu mangatawa i lalaki ngem mas mapia paga nu ari nga mangatawa.” (Bibbigan i 1 Corinto 7:32, 33, 38.) Ngatta nakagi nga “mas mapia” i awan tu atawana? Pakavurungan na natawan ira i kawagan na atawada, ngem awan tu kunnatun nga pakavurungan na Cristiano ira nga awan tu atawada. Yari tu mas aru i tiempoda. Aru i makuada tapenu mapalawa i ministerioda. Angngariganna, awayyada umay ta tanakuan nga lugar tapenu melayyagayya i mapia nga dumug. Meyusada paga i aru nga tiempoda tapenu mas maddukko kani Jehova.
2. Anni ira i benefisio na legal nga pagatawa?
Kagitta na awan tu atawana, egga gapa i benefisio na natawan ira. Kagian na Biblia nga “mas makasta i dua anne ta tadday.” (Eclesiastes 4:9) Kurug yatun ta Cristiano ira nga mangiyaplika ta prinsipio ira na Biblia ta pagatawada. Nitabba na legal nga magatawa nga ayatan, irespeto, anna tagibaloradda i kataggi-tadday. Megafu tatun, mas egga i seguridad na pagatawada anne ta mal-live-in laman. Mas nga memammo gapa i panageno na ána ira.
3. Anni i pagimamma ni Jehova ta pagatawa?
Turi ta kinasal ni Jehova i ollu nga magatawa, kinagina: “Panawan noka na lalaki i yama anna yenana anna makipattadday ta atawana.” (Genesis 2:24) Kayà ni Jehova nga ayatan na magatawa i kataggi-tadday anna ariadda maggungay. Ipamavulunna laman i diborsio nu nakaliwa ta paggannug i tadday. Nu kunnatun i nesimmu, i inosente nga atawa lagapa i maddesision nu idiborsiona i atawana. a (Mateo 19:9) Ari nga ipamavulun ni Jehova ta Cristiano ira i poligamia.—1 Timoteo 3:2.
GIGIAMMUAN I ARU PAGA
Ammuan nu kunnasi ka magayayya anna nu kunnasim mapagayayya si Jehova—egga i atawam onu awan.
4. Usan ta kapianan i regalu nga kawan tu atawa
Para kani Jesus, regalu i kawan tu atawa. (Mateo 19:11, 12) Bibbigan i Mateo 4:23, anna paguvovugan yaw nga pakkiavu:
-
Kunnasi nga niyusa ni Jesus i regalu nga kawan tu atawa tapenu passerbian i Yamana anna uffunan i tanakuan?
Kunnasi nga meyusa tu mapia na Cristiano ira i kawan tu atawada nga kagitta ni Jesus. Girawan i VIDEO, anna paguvovugan i tumunug nga pakkiavu.
-
Kunnasi nga meyusa tu mapia na Cristiano ira i kawan tu atawada?
Ammum kari?
Awan tu kagian na Biblia tu edad nu sonu anni nga awayya na tadday i mangatawa onu makitawa. Ngem ipagaramna nga mawag nga mappasa labbi i tiempo nga masikan i seksual nga pakkaraga megafu ta makafekto yatun ta paddesision na tadday.—1 Corinto 7:36, NW.
5. Mappili ka tu mapia
I pappili tu atawa i tadday ta pinaka-importante nga desision nga awayyam nga kuan. Bibbigan i Mateo 19:4-6, 9, anna paguvovugan yaw nga pakkiavu:
-
Ngatta ari nakuan nga mappabibibi i tadday nga Cristiano nga mangatawa onu makitawa?
Moffunan naka na Biblia nga makaleg tu mapia nga atawa. Importante nga magaleg ka tu atawa nga mangiddu kani Jehova. b Bibbigan i 1 Corinto 7:39 anna 2 Corinto 6:14. Kabalinna, paguvovugan yaw ira nga pakkiavu:
-
Ngatta mangatawa onu makitawa ittam laman ta kapangngurug tam?
-
Anni i matageno ni Jehova nu mangatawa onu makitawa ittam ta ari mangiddu Nisa?
Nu mapattadday ta takkilu i makkaduma nga ayam, marigatan ira. Kunnatun gapa i mesimmu ta tadday nga Cristiano nga mangatawa onu makitawa ta ari nga kapangngurug. Aru nga problema i arubanganna
6. Parigan i pagimamma ni Jehova ta pagatawa
Ta Israel gari, nidiborsio na karuan nga lallaki i atawada megafu ta makasarili nga rason. Bibbigan i Malakias 2:13, 14, 16, anna paguvovugan yaw nga pakkiavu:
-
Ngatta ikalussaw ni Jehova i diborsio nga ari nebase ta Biblia?
Mangiyawa tu daddam ta inosente nga atawa anna ta ána i paggannug anna diborsio
Girawan i VIDEO, anna paguvovugan i tumunug nga pakkiavu.
-
Nu ari nga kapangngurug i atawam, anni i makuam tapenu magayayya i pagatawanu?
7. Tuttulan i estandarte ira ni Jehova ta pagatawa
Mawag i pappursigi tapenu matuttul i estandarte ira ni Jehova ta pagatawa. c Siguradu nga bendisionan ni Jehova i magangngua tatun. Girawan i VIDEO.
Bibbigan i Hebreo 13:4, anna paguvovugan yaw ira nga pakkiavu:
-
Rasonable kari i estandarte ira ni Jehova ta pagatawa? Ngatta?
Ta aru nga nasion, kawagan nga merehistro i pagatawa anna diborsio. Ekspektan gafu ni Jehova nga kuan yatun na Cristiano ira. Bibbigan i Tito 3:1, anna paguvovugan yaw nga pakkiavu:
-
Nu egga i atawam, legal kari i pagatawanu?
BAKA IYAVU NA KARUAN: “Ari kari puede nga mal-live-in ngana laman? Ngatta kawagan paga i kasal?”
-
Anni i tabbag mu?
ANNI I NAGIGIAMMUM?
Regalu ni Jehova i kawan tu atawa anna i egga atawana. Parehas nga mamagayayya yatun nu meyusa segun ta uray ni Jehova.
Review
-
Kunnasi nga meyusa na tadday ta kapianan i kawan tu atawana?
-
Ngatta kagian na Biblia nga mangatawa onu makitawa laman ta kapangngurug?
-
Anni laman i nebase-Biblia nga rason ta diborsio?
I AWAYYAM PAGA KUAN
Anni i kebalinan na makitawa laman ta Yafu?
Girawan i video nga meyannung ta paki-date anna pagatawa.
Ammuan nu ngatta nakagi na tadday nga brother nga mas mapia i niyawa ni Jehova anne ta nisakrifisiona.
Anni ira i mawag nga ikonsidera na tadday nigena nga makidiborsio onu makigungay?
“Monag nga Irespeto i ‘Pinattadday na Dios’” (Passifusifutan, Disiembre 2018)
b Neyugalian na karuan nga i magana i mappili tu atawa na anada. Ta kunnatun ira nga kultura, mawag tu ollu nga ikonsidera na minaggiddu nga magana nu iddukan na mapangatawa na anada si Jehova, ari nakuan tu i pakkukua onu i estado ta pattolay i innadda.
c Nu egga i ka-live-in mu, personal nga desisiommu lagapa nu makkasal kamu onu panawammu yayya.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
