LEKSION 43
Anni Nakuan i Pagimamma na Cristiano ira ta Binarayang?
Nadduruma i opinion na totolay ta interu mundo meyannung ta binarayang. Magayayya nga minum i karuan sinaggi-mittan kavulu i kokkofudda. Pinili gapa na karuan nga ari vuluvuga minum. Ngem minum gapa i karuan adde ta mellaw ira. Anni i ituddu na Biblia meyannung ta binarayang?
1. Marake kari i paginum tu binarayang?
Ari kagian na Biblia nga marake i paginum tu binarayang. Kakuruganna, tadday yatun ta makakkasta ira nga gannug nga niyawa na Dios nittam. Kagian na Biblia nga mamagayayya ta totolay i binarayang. (Salmo 104:14, 15) Egga ira i matalo nga lallaki anna babbay ta Biblia nga mininum tu binarayang.—1 Timoteo 5:23.
2. Anni i tabarang na Biblia ta minum ira?
Igamma ni Jehova i sobra nga paginum anna pagillellaw. (Galacia 5:21) Nakagi ta Biblia: “Ari ka makikavulu turi ira ta sossobra minum tu binarayang.” (Proverbio 23:20) Yari tu nu minum ittam—maski magitetadday ittam—ariattam nakuan minum nga magadde ta ariattam ngana makapannono tu mapia, komforme ngana i kakkagiattam anna kukukuattam, onu marake ngana i efektona ta gawa-gawayyattam. Nu ariattam makontrol i karu na binarayang nga inumattam, determinadu nakuan ittam nga iyemmang i paginum.
3. Kunnasi tam merespeto i desision na tanakuan meyannung ta binarayang?
I kada tadday lagapa i maddesision nu minum yayya onu ari. Ariattam husgan i tadday nu baddi laman i inumanna, anna ariattam gapa pilitan i tadday nga minum. (Roma 14:10) Piliattam nga ari minum nu egga i mesiddukal. (Bibbigan i Roma 14:21.) ‘Ari tu i pammakapian na baggi tam laman i nonopattam, nu ari i pammakapian na ikattoletam.’—Bibbigan i 1 Corinto 10:23, 24.
GIGIAMMUAN I ARU PAGA
Ammuan i prinsipio ira na Biblia nga makoffun nikaw nga maddesision nu minukka tu binarayang anna nu kunnasi i karu na inumammu. Ammuan gapa nu anni i makoffun nikaw nu egga i problemam ta paginum.
4. Maddesision nu minukka onu ari
Anni i pagimamma ni Jesus ta paginum tu binarayang? Tapenu mammuan i tabbag, ikonsidera i ollu nga milagro nga kingnguana. Bibbigan i Juan 2:1-11, anna paguvovugan yaw ira nga pakkiavu:
-
Ta milagro ni Jesus, anni i magigiammu tam ta pagimammana ta binarayang anna ta minum ira tu binarayang?
-
Megafu ta ari igamma ni Jesus i paginum tu binarayang, anni nakuan i pagimamma na Cristiano ira ta totolay nga pinilida i minum?
Ari nga megamma i minum tu binarayang, ngem arianna kayà kagian nga kanayun nga minum i tadday nga Cristiano. Bibbigan i Proverbio 22:3, anna ikonsidera i tumunug ira nga situasion, nigem nga maddesision nga minum:
-
Nu mammaneho ka onu magoperate tu makina.
-
Nu mavussi ka.
-
Nu igamma na doktor nga minukka.
-
Nu ariammu makontrol i karu na inumammu.
-
Nu egga i dob nga mangigamma nga minukka tu binarayang.
-
Nu egga i kavulu mu nga niyemmanna ngana i minum megafu ta arianna makontrol i paginumna dati.
Mappenum ka kari tu binarayang ta kasal onu ta tanakuan paga ira nga okasion? Girawan i VIDEO tapenu innan nu anni i makoffun nikaw nga makapaddesision.
Bibbigan i Roma 13:13 anna 1 Corinto 10:31, 32. Kabalin nga mabibbig i kada teksto, paguvovugan yaw nga pakkiavu:
-
Kunnasim meyaplika yaw nga prinsipio tapenu makangngua ka tu desision nga mamagayayya kani Jehova?
I kada Cristiano lagapa i maddesision nu minum yayya tu binarayang onu ari. Maski nu minum yayya aggi-mittan, awayyana gapa nga ari yayya minum nu karuan
5. Maddesision nu kunnasi karu na inumammu
Nu piliammu nga minum tu binarayang, daddammammu: Ari nga igamma ni Jehova i paginum tu binarayang, ngem kagianna nga marake i sobra nga paginum. Ngatta? Bibbigan i Oseas 4:11, 18, anna paguvovugan yaw nga pakkiavu:
-
Anni i awayyana nga mesimmu nu sobra nga binarayang i inuman na tadday?
Kunnasi tam malillitan i sobra nga paginum? Mawag nga ammu tam i limitasiottam. Bibbigan i Proverbio 11:2, anna paguvovugan yaw nga pakkiavu:
-
Ngatta makasta nu dati nga desisionammu i karu na inumammu?
6. I makoffun tapenu meyemmang i sobra nga paginum
Ammuan nu anni i nakoffun ta tadday nga lalaki nga meyemmanna i sobra nga paginum. Girawan i VIDEO, anna paguvovugan yaw nga pakkiavu:
-
Ta video, anni i efektona kani Dmitry nu nakenum yayya?
-
Niyemmanna kari insigida i paginum?
-
Kunnasina niyemmang i sobra nga paginum?
Bibbigan i 1 Corinto 6:9-11, anna paguvovugan yaw ira nga pakkiavu:
-
Kunnasi karake i pagillellaw?
-
Anni i mangipasingan nga awayya manguli na tadday nga sobra i paginumna?
Bibbigan i Mateo 5:30, NW, anna paguvovugan yaw nga pakkiavu:
-
I kebalinan na paggappo tu lima ay pagangngua tu sakrifisio ira tapenu mapagayayya si Jehova. Anni i awayyam kuan nu marigatakka nga iyemmang i sobra nga paginum tu binarayang? a
Bibbigan i 1 Corinto 15:33, anna paguvovugan yaw nga pakkiavu:
-
Kunnasi mainfluwensian na kokkofummu i karu na inumammu?
BAKA IYAVU NA KARUAN: “Marake kari i minum?”
-
Anni i tabbag mu?
ANNI I NAGIGIAMMUM?
Niyawa ni Jehova i binarayang para ta pappagayayya tam, ngem igammana i sobra nga paginum anna pagillellaw.
Review
-
Anni i kagian na Biblia ta binarayang?
-
Anni ira i peligro na sobra nga paginum?
-
Kunnasi tam irespeto i desision na tanakuan ta paginum?
I AWAYYAM PAGA KUAN
Kunnasi makapaddesision tu mapia i kabataan ira ta paginum?
Ammuan i makuam ira tapenu meyemmang i sobra nga paginum onu pagillellaw.
“Fustu nga Pagimamma ta Binarayang” (Passifusifutan, Enero 1, 2010)
Mepangngo kari ta Cristiano ira i pat-toast?
“Pakkiavu na Mabbibbig Ira” (Passifusifutan, Pebrero 15, 2007)
Ta istoria nga “Masikan Ngà Minum,” innan nu kunnasi niyemmang na tadday nga lalaki i sobra nga paginum.
“Pakastan na Biblia i Pattolay” (Passifusifutan, Mayo 1, 2012)
a Awayyana nga kawagan na na-adik ira ta binarayang i uffun na doktor tapenu meyemmang i paginum. Kagian na aru nga doktor nga mawag tu ari ngana vuluvuga minum i tadday nga dati egga i problemana ta paginum.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
