LEKSION 44
Makapagayayya Kari ta Dios i Ngamin nga Selebrasion?
Kayà ni Jehova nga magayayya ittam anna masselebra sinaggi-mittan. Ngem makapagayayya kari nisa i ngamin nga selebrasion anna okasion? Kunnasi tam nga mepasingan i aya tam kani Jehova meyannung taw?
1. Ngatta aru nga selebrasion i ari makapagayayya kani Jehova?
Baka makaddag ka nu mammuammu nga aru ta selebrasion i ari nga nebase ta Biblia onu pagano i naggafuadda. Awayyana nga konektadu ta falsu nga relihion i kunnatun nga selebrasion. Awayyana gapa nga konektadu yatun ta espiritismo onu nebase ta pangurug nga imortal i kararua. Nebase gapa ta rehiya onu pangurug ta suerte i karuan nga selebrasion. (Isaias 65:11) Inabisowan ni Jehova i maddayarayaw ira nisa: “Mesina kamu nira. Arian nu siggeran i anni laman nga maritta.”—2 Corinto 6:17. a
2. Anni i matageno ni Jehova ta selebrasion ira nga sobra i pangidayawda ta totolay?
Inabisowan ittam ni Jehova nga ariattam “mattalo ta totolay laman.” (Bibbigan i Jeremias 17:5.) Egga ira i selebrasion nga idayawda i mammaguray onu i suddalu ira. I karuan gapa ay para ta simbolo na nasion onu independence. (1 Juan 5:21) Ta karuan gapa nga okasion, iselebra na totolay i pulitikal onu i karuan nga organisasion. Anni i matageno ni Jehova nu sobra i pangidayaw tam ta tadday nga tolay onu organisasion, mas ngana nu mekontra ta gakkagna i ipagaramda?
3. Anni i mamabbalin ta selebrasion ira nga ari mepangngo?
Igamma na Biblia i ‘pagillellaw, nepallo nga pappaga-pagayayya, anna magulu nga pamippissan.’ (1 Pedro 4:3) Ta karuan nga selebrasion, ari nga mafugaddan na totolay i baggida onu magangngua ira tu imoral. Tapenu mattalupaddian ittam nga kofun ni Jehova, mawag nga arayyuattam yatun nga kinaritta ta moral.
GIGIAMMUAN I ARU PAGA
Ammuan nu kunnasim nga mapagayayya si Jehova nu fustu i desisiommu meyannung ta okasion anna selebrasion ira.
4. Lillitan i selebrasion ira nga ari makapagayayya kani Jehova
Bibbigan i Efeso 5:10, anna paguvovugan yaw ira nga pakkiavu:
-
Anni i mawag nga siguraduattam nu iselebra tam i tadday nga okasion?
-
Anni ira nga okasion i popular ta lugarnu?
-
Makapagayayya kari kani Jehova yatun ira nga okasion?
Angngariganna, nanono mu kari ngana nu anni i matageno ni Jehova ta passelebra tu birthday? Awan tu nerekord ta Biblia nga nasselebra tu birthday i maddayarayaw ira kani Jehova, ngem egga i nerekord nga dua nga tolay nga nasselebra tu birthday ngem ari nga maddayarayaw Nisa. Bibbigan i Genesis 40:20-22 anna Mateo 14:6-10. Kabalinna, paguvovugan yaw ira nga pakkiavu:
-
Anni i parehas nga nesimmu tatun nga passelebra tu birthday?
-
Base tatun nga rekord na Biblia, anni i matageno ni Jehova ta birthday?
Ngem baka manono mu, ‘Anni i matageno ni Jehova nu masselebra ngà tu birthday onu tanakuan paga nga selebrasion nga ari nebase ta Biblia?’ Bibbigan i Exodo 32:1-8. Kabalinna, girawan i VIDEO anna paguvovugan yaw ira nga pakkiavu:
-
Ngatta mawag nga siguraduattam nu anni i makapagayayya kani Jehova?
-
Kunnasi tam nga makua yatun?
Nu kunnasi tam mammuan nu mamallussaw ta Dios i tadday nga selebrasion
-
Nebase kari yatun ta pagano? Tapenu masiguradum, ammuammu i naggafuanna.
-
Sobra kari i pangidayawna ta totolay, organisasion, onu ta simbolo na nasion? Si Jehova laman i mepangngo nga dayawattam anna mattalo ittam nisa nga solbanna i problema ira ta mundo.
-
Mekontra kari ta estandarte ira na Biblia i kostumbre anna annangngua ira tatun nga okasion? Mawag nga mattalupaddiattam nga marenu ta moral.
5. Ipakanawag mu ta tanakuan i pangurug mu
Mariga nu karuan nga pammanakitan i imbitasion na tanakuan nga makipasselebra ta okasion nga ari mamagayayya kani Jehova. Mapasensia anna mataktika nakuan nga ipakanawag mu i desisiommu. Girawan i VIDEO tapenu masingan i tadday nga angngarigan nu kunnasi nga kuan yatun.
Bibbigan i Mateo 7:12, anna paguvovugan yaw ira nga pakkiavu:
-
Base taw nga teksto, mawag kari nga ikagim ta kafamiliam nga ari kapangngurug nga ariadda nakuan selebran i tadday nga okasion?
-
Anni i kuammu tapenu matageno na kafamiliam nga iddukan anna appresiammu lagapa ira maski nu ari ka nga makipasselebra nira?
6. Kayà ni Jehova nga magayayya ittam
Kayà ni Jehova nga magayayya ittam kavulu i familia anna kokkofuttam. Bibbigan i Eclesiastes 8:15, anna paguvovugan yaw nga pakkiavu:
-
Segun ta teksto, ngatta makagi tam nga kayà ni Jehova nga magayayya ittam?
Kayà ni Jehova nga magayayya anna magenjoy i totolena ira. Girawan i VIDEO nu kunnasi nga masingan yatun ta internasional nga kombensiommi.
Bibbigan i Galacia 6:10, anna paguvovugan yaw ira nga pakkiavu:
-
Mawag kari nga masselebra ittam tu okasion tapenu ‘makua i mapia’ ta tanakuan?
-
Anni nga klase na pangiyawa i mas mamagayayya nikaw—i obligadu nga pangiyawa megafu ta egga okasion onu i pangiyawa megafu ta kayà mu?
-
Nu karuan, egga i espesial nga iyunnug na aru nga Saksi para ta ánada anna regaluadda paga lagu ira. Nu egga i ána mu, anni ira i espesial nga makuam para ta nira?
I KAGIAN NA KARUAN: “Ari nga importante nu sitaw i naggafuan na tadday nga selebrasion. I importante, magenjoy ittam kavulu i familia anna kokkofuttam.”
-
Anni i makagim?
ANNI I NAGIGIAMMUM?
Kayà ni Jehova nga magenjoy ittam kavulu i familia anna kokkofuttam. Ngem kayàna gapa nga lillitattam i selebrasion ira nga mamallussaw nisa.
Review
-
Anni ira nga pakkiavu i ikonsidera tam tapenu mammuan nu mamallussaw kani Jehova i tadday nga selebrasion?
-
Kunnasi tam mepalippawa ta familia anna kokkofuttam i desisiottam meyannung ta selebrasion ira?
-
Ngatta makagim nga kayà ni Jehova nga magayayya anna magenjoy ittam?
I AWAYYAM PAGA KUAN
Ikonsidera i karuan nga okasion nga ari nga iselebra na Cristiano ira.
“Ngatta Ari Selebran na Saksi ira ni Jehova i Karuan nga Okasion?” (Artikulo ta website)
Innan i appa nga rason nu ngatta kurugammi nga mamallussaw ta Dios i passelebra tu birthday.
“Ngatta Ari Masselebra tu Birthday i Saksi ira ni Jehova?” (Artikulo ta website)
Innan nu kunnasi mapagayayya na abbing ira si Jehova nu egga ira i holiday.
Minillion nga Cristiano i ari masselebra tu Christmas. Ngatta kunnatun i desisiodda?
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
