Nituddu ni Jesus ta tagatuttulna ira: “Ari kamu nga kukua na mundo.” (Juan 15:19) Kasali tatun i pabbalin tu neutral—awan tu suportattam ta pulitika anna gerra ira ta mundo. Ngem ari tu kanayun nga mabi i pabbalin tu neutral. Awayyana nga mauyaw ittam. Kunnasi ittam gafu nga mattalupaddian nga neutral anna matalo kani Jehova nga Dios?

1. Kunnasi nga imammatan na kurug ira nga Cristiano i gobiernu na totolay?

Irespeto na Cristiano ira i gobiernu. Kuattam i kinagi ni Jesus nga “iyawa nu ta Emperador i kukua ira na Emperador”—kebalinanna nga tuttulattam i dorob na nasion, kagitta na pappaga tu vugi onu tax. (Marcos 12:17) Ituttuddu na Biblia nga mammaguray i gobiernu na totolay megafu ta nipamavulun yatun ni Jehova. (Roma 13:1) Kayàna kagian nga relatibo, onu limitadu, i autoridad na gobiernu na totolay. Mattalo ittam nga i Dios anna i nelangitan nga Pappatulanna i makasolba ta problema ira na totolay.

2. Kunnasi tam mepasingan nga neutral ittam?

Kagitta ni Jesus, ariattam nga makiparte ta pulitika. Turi ta nasingan na totolay i milagro nga kingngua ni Jesus, kayàda yayya nga pabbalinan tu patul, ngem nammanaki yayya. (Juan 6:15) Ngatta? Kinagina: “I pammagurayak-ku ay awan toye ta utun na davvun.” (Juan 18:36) Kagitta na disipulo ira ni Jesus, aru i makua tam tapenu mepasingattam nga neutral ittam. Angngariganna, ari ittam nga makiparte ta gerra. (Bibbigan i Mikias 4:3.) Irespeto tam i simbolo ira na nasion—kagitta na bandera—ngem ariattam dayawan yatun. (1 Juan 5:21) Ariattam gapa nga suportan onu kontran i maski anni nga pulitikal nga partidu onu kandidato. Nu kuattam i kunnaw ira nga gannug, mepasingattam nga talaga matalo ittam ta gobiernu na Dios—i Pappatulanna.

 GIGIAMMUAN I ARU PAGA

3. Neutral i kurug ira nga Cristiano

Makasta i ehemplo nittam ni Jesus anna na tagatuttulna ira. Bibbigan i Roma 13:1, 5-7 anna 1 Pedro 2:13, 14. Kabalinna, girawan i VIDEO anna paguvovugan yaw ira nga pakkiavu:

• Ngatta mawag nga irespeto tam i gobiernu na totolay?

• Kunnasi tam mepasingan nga makimoray ittam nira?

Nu egga i gerra, kagian na karuan nga nasion nga neutral ira. Ngem parehu nga suportadda i makkalaban nga nasion. Anni talaga i kebalinan na pabbalin tu neutral? Bibbigan i Juan 17:16. Kabalinna, girawan i VIDEO anna paguvovugan yaw nga pakkiavu:

• Anni i kebalinan na pabbalin tu neutral?

Kunnasi nu egga i dob na gobiernu nga mekontra ta dob na Dios? Bibbigan i Kingngua 5:28, 29. Kabalinna, girawan i VIDEO anna paguvovugan yaw ira nga pakkiavu:

• Nu mekontra ta dob na Dios i dob na tolay, anni nakuan i tuttulammu?

• Anni ira i manono mu nga situasion nga ari nga tuttulan na Cristiano ira i gobiernu?

 4. Neutral ta nono anna annangngua

Bibbigan i 1 Juan 5:21. Kabalinna, girawan i VIDEO anna paguvovugan yaw ira nga pakkiavu:

• Ta video, ngatta ari nakiparte si Ayenge ta pulitikal ira nga partidu anna nasionalistiko ira nga seremonia kagitta na passaludo ta bandera?

• Masirib kari yatun nga desisionna?

Anni paga ira i situasion nga posible nga marigatan ittam nga mattalupaddian nga neutral? Girawan i VIDEO, anna paguvovugan yaw ira nga pakkiavu:

• Kunnasi ittam nga makapattalupaddian nga neutral nu meyannung ta isport ira nga marralaban i nadduruma nga nasion?

• Kunnasi ittam makapattalupaddian nga neutral nu afektadu ittam ta desision ira na pulitiko?

• Kunnasi nga mafektan na balita ira onu na kakavulu tam i neutralidad tam?

 ANNI I NAGIGIAMMUM?

Mappuppursigi i Cristiano ira tapenu mepasingadda ta appana-panono, kakkagian, anna kukukuadda nga neutral ira ta pulitika.

Review

• Anni i obligasiottam ta gobiernu na totolay?

• Ngatta mawag nga mattalupaddiattam nga neutral ta pulitika?

• Anni ira i situasion nga posible nga marigatan ittam nga mattalupaddian nga neutral?