LEKSION 47
Preparadu Ka Ngana Kari nga Mappabawtiso?
Aru ngana i nagigiammum meyannung kani Jehova ta paggigiammum tu Biblia. Aru gapa i kingnguam nga panguli tapenu meyaplika i nagigiammum. Ngem awayyana nga egga i makefugag nikaw nga maddedika kani Jehova anna mappabawtiso. Magigiammum taw nga leksion nu anni ira i karuan nga makefugag ta kabawtisom anna nu kunnasim malabanan yatun.
1. Kunnasi nakuan i karu na ammum nige mu mabawtisowan?
Tapenu mabawtisowakka, mawag nga ‘kannammuammu i kurug.’ (1 Timoteo 2:4) Arianna kebalinan nga mawag nga ammum i ngamin nga tabbag ta pakkiavu ira ta Biblia nige mu mabawtisowan. Tulu-tuloy lagapa nga maggigiammu i Cristiano ira, maski nu nabayag ngana ira nga nabawtisowan. (Colosas 1:9, 10) Ngem mawag nga ammum i pamegafuanan ira nga tuttuddu na Biblia. Moffunan naka na elder ira ta kongregasion nga mammuan nu makalanno ngana i pakannammum.
2. Anni ira i mawag nga kuammu nige mu mabawtisowan?
Nige mu mabawtisowan, mawag nga “mabbabawi . . . anna manoli” ka. (Bibbigan i Kingngua 3:19.) Kebalinan naw nga pabbabawyammu i ngamin nga naliwatammu anna ikiddom kani Jehova nga pakoman naka. Determinadu ka gapa nga lillitan i marake ira nga annangngua anna mattolay nga makapagayayya ta Dios. Regular ka gapa nga magatende ta study anna mallayyagayya bilang unbaptized publisher.
3. Ngatta ariammu nakuan ipamavulun nga fugaddan naka na paganassing mu?
Maganassing i karuan nga ariadda makua i promesada kani Jehova. Nu mittan makaliwa ka. Nesimmu gapa yatun ta matalo nga lallaki anna babbay nga nakagi ta Biblia. Ari nga ekspektan ni Jehova nga ari makkamali i maddayarayaw nisa. (Bibbigan i Salmo 103:13, 14.) Magayayya yayya nu kuammu i ngamin nga mawayyam! Siguradu nga uffunan naka. Nipasiguradu ni Jehova nga “awan vuluvuga tu makawayya nga mangigungay nittam ta aya na Dios.”—Bibbigan i Roma 8:38, 39.
GIGIAMMUAN I ARU PAGA
Ammuan nu kunnasim marubang i makefugag ira ta bawtismo gukaban na pangammu tu mapia kani Jehova anna pangalawa ta uffunna.
4. Ammuan tu mapia si Jehova
Kunnasi nakuan i karu na ammum meyannung kani Jehova nige mu mabawtisowan? Tapenu ayatan anna mapagayayya mu yayya, mawag nga ammammum yayya tu mapia. Girawan i VIDEO tapenu innan nu kunnasi nakua yatun na Bible study ira ta interu mundo. Kabalinna, paguvovugan i tumunug nga pakkiavu.
-
Ta video, anni i nakoffun ta Bible study ira tapenu mabbalin tu preparadu para ta bawtismo?
Bibbigan i Roma 12:2, anna paguvovugan yaw ira nga pakkiavu:
-
Egga kari i paddudammu ta tuddu ira na Biblia onu nu kurug kari i ituttuddu na Saksi ira ni Jehova?
-
Nu egga, anni i mawag nga kuammu?
5. Arubangan i posible ira nga makefugag ta bawtiso
Nu maddedika ittam kani Jehova anna mappabawtiso, meparubang ittam ta kapurueba ira. Girawan i VIDEO tapenu masingan i tadday nga angngarigan anna paguvovugan i tumunug ira nga pakkiavu.
-
Anni ira nga kapurueba i inarubang ni Narangerel tapenu makapasserbi kani Jehova?
-
Kunnasi nakoffun i ayana kani Jehova tapenu marubang i kapurueba ira?
Bibbigan i Proverbio 29:25 anna 2 Timoteo 1:7, anna paguvovugan yaw nga pakkiavu:
-
Anni i mamaggutu nittam tapenu marubang i kapurueba ira?
6. Mattalo ta uffun ni Jehova
Uffunan naka ni Jehova tapenu mapagayayya mu yayya. Girawan i VIDEO, anna paguvovugan i tumunug ira nga pakkiavu.
-
Ta video, anni i nakefugag ta tadday nga Bible study nga mappabawtiso?
-
Anni i nagigiammuna nga nakoffun nisa nga mas mattalo kani Jehova?
Bibbigan i Isaias 41:10, 13, anna paguvovugan yaw nga pakkiavu:
-
Ngatta makapattalo ka nga makuam i promesam ira turi naddedika ka?
7. Ponaggammu i appresasiommu ta aya ni Jehova
Nu kanayun nga agga-nono mu i kadakal na aya ni Jehova nikaw, mas mabbalikka nga minappabalo anna mas mapaguyu ka nga passerbian yayya tu mannanayun. Bibbigan i Salmo 40:5, anna paguvovugan yaw nga pakkiavu:
-
Anni ira nga bendision ni Jehova i kuruga appresiammu?
Ayatan ni profeta Jeremias si Jehova anna i uvovugna, anna kuruga appresianna i pribilehio nga irepresenta si Jehova. Kinagina: “I uvovug mu ay nabbalin niakan tu kedayaw anna pagayayya na futù, megafu ta i ngagammu ay neyagal niakan, O Jehova nga Dios.” (Jeremias 15:16) Tabbagan yaw ira nga pakkiavu:
-
Ngatta espesial nga pribilehio i pabbalin tu Saksi ni Jehova?
-
Kayà mu kari mabawtisowan bilang Saksi ni Jehova?
-
Egga kari i mangifugag nikaw nga kuan yatun?
-
Anni i mawag mu nga kuan tapenu madde i bawtismo?
I KAGIAN NA KARUAN: “Maganassing ngà nga ariakku makua i ngamin nga nipromesà sonu mabawtisowan ngà.”
-
Kunnatun kari i matageno mu?
ANNI I NAGIGIAMMUM?
Ta uffun ni Jehova, marubammu i maski anni nga makefugag ta bawtismo.
Review
-
Kunnasi nakuan i karu na pakannammum ta Biblia, nige mu mabawtisowan?
-
Anni ira nga panguli i mawag mu nga kuan nige mu mabawtisowan?
-
Ngatta ariammu ipamavulun nga fugaddan naka na paganassing mu?
I AWAYYAM PAGA KUAN
Ammuan nu anni nakuan i rason nu ngatta mappabawtiso ka.
“Preparadu Ka Ngana Kari nga Mappabawtiso?” (Passifusifutan, Marso 2020)
Ammuan nu kunnasim marubang i kapurueba ira nga awayyana nga makefugag nikaw nga mappabawtiso.
“Egga Paga Kari i Makefugag ta Kabawtisò?” (Passifusifutan, Marso 2019)
Girawan nu kunnasi narubang na tadday nga lalaki i problemana ira nga makefugag ta kabawtisona.
Ta gafuna, ari nga kayà ni Ataa i mappabawtiso. Girawan nu anni i nakakumbinsi nisa nga kuan yatun nga importante nga desision.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
