LEKSION 48
Piliammu tu Mapia i Kokkofummu
Makipappagayayya i madukko ira nga kofuttam nu magayayya ittam, anna pasikannadda ittam nu egga i problema tam. Kagian na Biblia nga ari tu ngamin ay mapia nga kofun. Kunnasi ka gafu makapili tu mapia nga kokkofun? Ikonsidera i tumunug ira nga pakkiavu.
1. Kunnasi naka influwensian na kokkofummu?
Awayya tam mabbalin tu kagitta na totolay nga kakkavulu tam. Megafu ta kanayun nga makavulu tam ira onu makibbida ta social media, maparigattam i makasta onu marake nga kukukuadda. Kagian na Biblia nga “i makikakkavulu ta masirib ay mabbalin tu masirib, ngem i makillivu-livu ta awan tu ammuna [danuri ari mangaya kani Jehova] ay marake i pattuppalanna.” (Proverbio 13:20) Nu i kokkofuttam ay iddukadda si Jehova anna passerbiadda yayya, moffunadda ittam nga mabbalin tu madukko nisa. Moffunadda gapa ittam nga makangngua tu makasta ira nga desision. Ngem meyarayyu ittam kani Jehova na kokkofuttam nga ari mangaya nisa. Yari tu pagaramman ittam na Biblia nga pilian tu mapia i kokkofuttam! Nu ayatan na kokkofuttam i Dios, parehu ittam nga mabenefisiowan. Awayya tam “makkapasa-pasikan . . . ta nono, anna makka-uffu-uffun.”—1 Tesalonica 5:11.
2. Anni i efektona kani Jehova na piliammu nga kokkofun?
Pilian tu mapia ni Jehova i kokkofunna. “Madukko nga kofunna i matunung ira.” (Proverbio 3:32) Anni i matageno ni Jehova nu piliattam i kokkofun nga ari mangaya nisa? Siguradu nga madismaya yayya! (Bibbigan i Santiago 4:4.) Ngem magayayya si Jehova anna mabbalittam tu kofunna nu lillitattam i marake ira nga kakavulu, nu makiddukko tam nisa anna ta iddukanna ira.—Salmo 15:1-4.
GIGIAMMUAN I ARU PAGA
Ammuan nu ngatta importante nga piliammu i kokkofummu, anna nu kunnasi ka mapeggan tu mapia nga kokkofun nga makoffun nikaw.
3. Lillitan i marake nga kakavulu
Marake nga kakavulu i totolay nga ari mangaya ta Dios anna ta estandartena ira. Girawan i VIDEO, anna paguvovugan i tumunug nga pakkiavu.
-
Kunnasi nga awayya tam nga mabbalin tu kokkofun i marake nga kakavulu?
Bibbigan i 1 Corinto 15:33, anna paguvovugan yaw ira nga pakkiavu:
-
Sinni ira i marake nga kakavulu? Ngatta?
Bibbigan i Salmo 119:63, anna paguvovugan yaw nga pakkiavu:
-
Anni i mangipasingan nga mapia i tadday nga kofun?
Mafektan na tadday nga daral nga mansanas i karuan nga mansanas. Kunnasi naka gapa mainfluwensian na tadday nga marake nga kavulu?
4. Awayyana nga mabbalin tu mapia nga kofuttam i totolay nga ariattam kaparehu
Mabibbig ta Biblia i dua nga Israelita nga si David anni Jonatan. Makkaduma i dagudda anna i estado na pattoleda ngem makasta i pakkofudda. Bibbigan i 1 Samuel 18:1, anna paguvovugan yaw nga pakkiavu:
-
Ngatta ari nakuan tu kanayun nga i kadagunattam onu kaparehu tam ta estado na pattolay i kokkofuttam?
Bibbigan i Roma 1:11, 12, anna paguvovugan yaw nga pakkiavu:
-
Kunnasi makka-pasa-pasikan i makkofun nga mangaya kani Jehova?
Ta video, girawan nu kunnasi nakaleg tu kofun i tadday nga kabataan nga brother. Girawan i VIDEO, anna paguvovugan i tumunug ira nga pakkiavu.
-
Ta video, ngatta mavurung i magana ni Akil ta pakikkofunanna ta eskuela?
-
Anni ira i nagustuanna ta kokkofunna ta gafuna?
-
Kunnasi yayya nabbalin tu magayayya?
5. Nu kunnasi nga mapeggan tu mapia nga kokkofun
Ammuan nu kunnasi ka makaleg tu kurug nga kokkofun, anna nu kunnasi ka nga mabbalin tu kurug nga kofun. Girawan i VIDEO.
Bibbigan i Proverbio 18:24 anna 27:17, anna paguvovugan yaw ira nga pakkiavu:
-
Kunnasi makka-uffun i kurug nga makkofun?
-
Egga kari i kunnatun nga kokkofummu? Nu awan, kunnasi ka makaleg?
Bibbigan i Filipos 2:4, anna paguvovugan yaw nga pakkiavu:
-
Tapenu mapeggakka tu mapia nga kokkofun, mawag nga mabbalikka tu mapia nga kofun. Kunnasim makua yatun?
Tapenu mapeggakka tu mapia nga kokkofun, mawag nga mabbalikka tu mapia nga kofun
I KAGIAN NA KARUAN: “Okay laman maski sinni i kokkofummu, anne ta awan tu kofummu.”
-
Anni i makagim?
ANNI I NAGIGIAMMUM?
Nu piliattam tu mapia i kokkofuttam, mapagayayya tam si Jehova anna mabenefisiowan ittam.
Review
-
Ngatta importante kani Jehova nu sinni i kokkofuttam?
-
Sinni ira nga kokkofun i lillitattam?
-
Kunnasim mapaladda i pakikkofummu ta mapia ira nga kokkofun?
I AWAYYAM PAGA KUAN
Ammuan nu kunnasi naka moffunan na kurug ira nga kokkofun ta mariga ira nga tiempo.
“Pasikannan i Pakkorofun Nige Duttal i Panuppalan” (Passifusifutan, Nobiembre 2019)
Ammuan nu anni ira i makuam tapenu mapeggakka tu mapia nga kokkofun.
Anni i mawag nga ammuammu meyannung ta pakikkofun ta online?
Ta istoria nga “Ala-alegakku i Pangaya na Tadday nga Yama,” ammuan nu anni i namaguyu ta tadday nga lalaki nga mappili tu tanakuan nga kokkofun.
“Pakastan na Biblia i Pattolay” (Passifusifutan, Abril 1, 2012)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
