Iddanaman na bagu ira nga nakkasal nga mannanayun i pagayayyada. Posible yatun. Ammu yatun na Cristiano ira nga nabayag ngana nga magatawa nga nappursigi nga iyaplika i tabarang ira na Biblia.

1. Anni i tabarang na Biblia ta atawa nga lalaki?

Sinunno ni Jehova i lalaki bilang dakal onu ulu na familia. (Bibbigan i Efeso 5:23.) Yari tu kayà ni Jehova nga magangngua i lalaki tu desision nga pammakapianan na familiana. Nitabarang na Biblia ta lallaki: “Ayatan nu i gi-attawan nu.” (Efeso 5:25) Anni i kebalinanna? Masippo i pattratu na minaggiddu nga lalaki ta atawana, maski nu egga i makasingan onu awan. Protektanna yayya anna kuanna i ngamin tapenu meyawa i pisikal anna emosional nga pakawaganna. (1 Timoteo 5:8) I pinaka-importante, irolluanna yayya ta espiritual nga pakawaganna. (Mateo 4:4) Angngariganna, awayyana i makimallo anna mabbibbig tu Biblia kavulu i atawana. Nu meddu nga tangngallan na lalaki i atawana, mapattalupaddianna i pakikkofunna kani Jehova.​—Bibbigan i 1 Pedro 3:7.

2. Anni i tabarang na Biblia ta atawa nga babay?

Kagian na Uvovug na Dios nga i atawa nga babbay ay ‘mawag tu ikakua da i gi-attawad-da.’ (Efeso 5:33) Kunnasi nga makua yatun na babay? Awayyana nga nonopan i makakkasta ira nga kualidad na atawana anna i pappursigina nga meyawa i pakawaganna anna na ánada. Merespetona gapa i atawana gukaban na passuportana ta desisionna anna masippo nga pakibbida nisa onu nu egga i kagianna ta tanakuan meyannung nisa, maski nu ari yayya nga kapangngurug.

3. Kunnasi nga mapaladda na magatawa i relasiodda?

Kinagi na Biblia meyannung ta magatawa ira: I “dua ay mabbalin tu tattadday.” (Mateo 19:5) Kebalinanna nga ikagumadda nga kuan i ngamin tapenu awan tu maski anni nga mamallummin ta ayada. Makuada yatun nu kanayun nga egga i tiempoda ta kataggi-tadday anna meddu nga ikagida i nononopan anna mataga-tagenoda ta kattagi-tadday. Fuera kani Jehova, awan tu maski anni onu maski sinni i mas importante ta atawada. Mawag gapa nga magimmugug ira tapenu ari tu sobra i kadukkoda ta tanakuan.

 GIGIAMMUAN I ARU PAGA

4. Atawa nga lalaki—ayatan anna tangngallammu tu mapia i atawam

5. Atawa nga babay—ayatan anna irespetom i atawam

Ipagaram na Biblia ta atawa nga babay nga irespetona i atawana maski nu ari maddayarayaw kani Jehova. Bibbigan i 1 Pedro 3:1, 2, anna paguvovugan yaw ira nga pakkiavu:

• Nu ari nga kapangngurug i atawam, siguradu nga kayà mu nga maddayaw gapa yayya kani Jehova. Anni tamma i mas nga efektibo—i kanayun nga pallayyagayya nisa onu i pangipasingammu tu makasta nga kondukta anna i pangirespetom nisa? Ngatta?

Makangngua tu makasta ira nga desision i magatawa nu makka-uffun ira. Ngem nu karuan, awayyana nga ari umanugu i atawa nga babay ta atawana.  Nu kunnatun, awayyana kagian ta atawana i egga ta nonona ngem kalmadu anna marespeto nakuan. Daddammanna nakuan gapa nga i atawa nga lalaki i nangiyawatan ni Jehova tu responsibilidad nga maddesision para ta pammakapianan na familia. Mawag gafu nga suportanna i desision na atawana. Nu kuanna yatun, magayayya i interu nga familia. Bibbigan i 1 Pedro 3:3-5, anna paguvovugan yaw nga pakkiavu:

• Anni i matageno ni Jehova nu irespeto na atawa nga babay i atawana?

6. Marubannu i problema ira ta pagatawa

 ANNI I NAGIGIAMMUM?

Magayayya i magatawa nu ayatan anna irespetoda i kataggi-tadday, anna iyaplikada i prinsipio ira na Biblia.

Review

• Anni i makua na lalaki tapenu magayayya i pagatawada?

• Anni i makua na babay tapenu magayayya i pagatawada?

• Nu egga i atawam, anni ira nga prinsipio na Biblia i makoffun tapenu mapaladda i pagatawanu?