Nadduruma i assissinnun anna itchura tam. Ngem nu tuttulattam i prinsipio ira na Biblia, mapili tam lagapa i kayà tam anna mapagayayya tam si Jehova. Ikonsidera tam i karuan nga prinsipio.

1. Anni ira nga prinsipio i makoffun nu mappili ittam tu sinnun anna nu kunnasi i itchura tam?

Mawag nga mappili ittam tu sinnun nga “mepangngo anna umangay laman,” anna mapattalupaddian i marenu nga itchura nga mangipasingan ta ‘nespirituan nga attolay’ tam. (1 Timoteo 2:9, 10) Ikonsidera yaw nga appa nga punto: (1) Mawag nga “mepangngo” i assissinnuttam. Baka naobserbam ta study nga nadduruma i estilo na assinnun na totolay ni Jehova ngem kanayun nga makedayaw ta Dios i assissinnun anna estilo na vu da. (2) Disente nakuan i assissinnuttam. Kebalinanna nga ari nakuan nga makatenta i itchura tam, onu ari nga medirekta nittam i fokus na totolay. (3) Mawag gapa nga mepangngo i appana-panono tam. Ariattam nga parigan i uso ira nga assissinnun anna itchura na totolay ta mundo. (4) Kanayun nakuan gapa nga masingan ta itchura tam i ‘nespirituan nga attolay’ tam nga mangipasingan ta tanakuan nga maddayarayaw ittam ta kurug nga Dios.​—1 Corinto 10:31.

2. Ngatta mawag nga ikonsidera tam i wawwaragi nu mappili ittam tu iyusa tam nga sinnun?

Egga i lallaguray tam nga mappili nu anni i iyusa tam nga sinnun. Ngem mawag nga nonopattam nu anni i efektona ta tanakuan. Ikagumattam nga ari mesiddukal i tanakuan, nu ari nonopattam i “pammakapian na ngamin nga kagitta tam nga mangurug tapenu mapasikan i angngurug da.”​—Bibbigan i Roma 15:1, 2.

3. Kunnasi tam mapaguyu i tanakuan nga maggigiammu meyannung kani Jehova gukaban na assissinnuttam?

Ikagumattam nga mepangngo kanayun i assissinnuttam, ngem mas nakuan nu magatende ittam ta study onu makipartisipa ta ministerio. Kayà tam nga maffokus i totolay ta importante nga mensahe tam, ari tu ta nittam. Ikaya tam nga mapaguyu i tanakuan nga gigiammuan i meyannung ta Dios anna “mepasingan i pia na tuttuddu nga meyannung ta Dios nga Mammaliag nittam.”​—Tito 2:10.

 GIGIAMMUAN I ARU PAGA

4. Merespeto tam si Jehova nu makasta i itchura tam

Anni i importante nga rason nu ngatta makasta nakuan i itchura tam? Bibbigan i Salmo 47:2, anna paguvovugan yaw ira nga pakkiavu:

• Megafu ta irepresenta tam si Jehova, kunnasi nakuan i assissinnuttam?

• Talaga kari nga importante i itchura tam nu magatende ittam ta study anna makipartisipa ittam ta ministerio? Ngatta?

 5. Nu kunnasi tam mapili i mepangngo nga assissinnun anna itchura

Girawan i VIDEO.

Maski nu mangina onu mappo laman i sinnuttam, mawag nga kanayun nga marenu anna mepangngo yatun. Bibbigan i 1 Corinto 10:24 anna 1 Timoteo 2:9, 10. Kabalinna, paguvovugan nu ngatta lillitattam i pangiyusa tu sinnun nga . . .

• maritta onu ari disente.

• pitis, ababba, onu makatenta.

Ari ngana mawag nga tuttulan na Cristiano ira i Mosaiko nga Dob, ngem magigiammuda tatun i appana-panono ni Jehova. Bibbigan i Deuteronomio 22:5, anna paguvovugan yaw nga pakkiavu:

• Ngatta lillitattam i assissinnun anna itchura nga mabbalin tu gittana lalaki i babay onu gittana babay i lalaki?

Bibbigan i 1 Corinto 10:32, 33 anna 1 Juan 2:15, 16, anna paguvovugan yaw ira nga pakkiavu:

• Ngatta importante nga ariattam isiddukal i totolay ta lugar tam onu wawwaragi ta kongregasion megafu ta itchura tam?

• Anni ira i gagangay nga assissinnun anna itchura na totolay ta lugarnu?

• Para nikaw, mepangngo kari i karuan tatun nga estilo para ta tadday nga Cristiano? Ngatta?

 ANNI I NAGIGIAMMUM?

Nu fustu i desisiottam ta assissinnun anna itchura tam, merespeto tam si Jehova anna i tanakuan.

Review

• Ngatta importante kani Jehova i assissinnun anna itchura tam?

• Anni ira nga prinsipio i makoffun nittam nga maddesision meyannung ta itchura tam?

• Anni i efekto na itchura tam ta pagimamma na tanakuan ta fustu nga paddayaw?