Si Jesus i Ulu na kongregasion Cristiano. (Efeso 5:23) Maddaggun ngana nga mammaguray si Jesus ta langi. Irolluanna i tagatuttulna ira ta davvun gukaban na “mekatalo anna nannono nga doroban.” (Bibbigan i Mateo 24:45.) Si Jesu-Cristo mismu i nanunno tatun nga “doroban” onu aripan anna iniddanna ira tu autoridad. Ngem mattalupaddian ira nga aripan ni Cristo anna passerbiadda i wawwaragina. Sinni yatun nga aripan? Kunnasida ittam nga tangngallan?

1. Sinni i “mekatalo anna nannono nga doroban”?

Kanayun nga mangusa si Jehova tu tadday nga lalaki onu baddi nga grupo na lallaki tapenu irolluan i totolena. (Malakias 2:7; Hebreo 1:1) Kabalin na patay ni Jesus, i apostoles anna mannakam ira ta Jerusalem i nangirollu. (Kingngua 15:2) Kunnatun gapa i matuttul sangawe. Egga i grupo na mannakam onu elder ira nga mangirollu. Magalan ira tu Manangngal nga Baggi na Saksi ira ni Jehova. Ira i mangiyawa ta espiritual ira nga makan anna mangirollu ta trabahu nga pallayyagayya. Yaw nga grupo i “mekatalo anna nannono nga doroban . . . nga sinullo [ni Jesus].” (Mateo 24:45a) Nazelugan nga Cristiano i ngamin nga miembro na Manangngal nga Baggi. Makipammaguray ira kani Cristo ta nelangitan nga Pappatulan kabalin na pattoleda ta davvun.

2. Anni nga espiritual nga makan i iyawa na mekatalo nga aripan?

Kinagi ni Jesus nga i mekatalo nga aripan i “mangiyawa [ta kapangngurugda] ta kanad-da ta gagangay nga oras na akkakan.” (Mateo 24:45b) Massikan anna magawa-gawayyan ittam megafu ta kana-kanattam. I espiritual nga makan gapa onu i instruksion nga maggafu ta Uvovug na Dios i mangiyawa nittam tu sikan tapenu makapattalupaddian ittam nga matalo kani Jehova, anna metuppal tam i trabahu nga nipakua ni Jesus. (1 Timoteo 4:6) Malawa tam yatun nga espiritual nga makan ta study, asembli, anna kombension ira. Kunnatun gapa ta nebase-Biblia nga publikasion anna video ira nga makoffun nittam tapenu mantindian i uray na Dios anna mapaladda i pakikkofuttam nisa.

 GIGIAMMUAN I ARU PAGA

3. Mawag nga organisadu i totolay ni Jehova

Ta pangigiya ni Jesus, organisan na Manangngal nga Baggi i trabahu na Saksi ira ni Jehova. Kunnatun gapa i pinangigiya ni Jesus ta ollu ira nga Cristiano. Girawan i VIDEO.

Bibbigan i 1 Corinto 14:33, 40, anna paguvovugan yaw nga pakkiavu:

• Kunnasi nga masingan taw nga teksto nga kayà ni Jehova nga organisadu i Saksina ira?

4. Organisan na mekatalo nga aripan i trabahu tam nga pallayyagayya

I pallayyagayya i pinaka-importante nga trabahu nga kingngua na ollu ira nga Cristiano. Bibbigan i Kingngua 8:14, 25, anna paguvovugan yaw ira nga pakkiavu:

• Sinni i nangiyawa tu instruksion ira ta pallayyagayya?

• Anni i kingngua da Pedro anni Juan turi nakalawa ira tu instruksion nga naggafu ta kaparehuda nga apostol?

I pallayyagayya i pinaka-importante nga trabahu nga organisan na Manangngal nga Baggi. Girawan i VIDEO.

 Nipasigo ni Jesus nga kuruga importante i pallayyagayya. Bibbigan i Marcos 13:10, anna paguvovugan yaw ira nga pakkiavu:

• Ngatta kuruga importante ta Manangngal nga Baggi i trabahu nga pallayyagayya?

• Ngatta kawagattam i “mekatalo anna nannono nga doroban” tapenu maorganisa yaw nga trabahu ta interu mundo?

5. Mangiyawa tu instruksion i mekatalo nga aripan

Mangiyawa i Manangngal nga Baggi tu instruksion ta Cristiano ira ta interu mundo. Kunnasi ira nga maddesision nu anni nga instruksion i iyawada? Ikonsidera i kingngua na manangngal nga baggi na ollu ira nga Cristiano. Bibbigan i Kingngua 15:1, 2, anna paguvovugan yaw ira nga pakkiavu:

• Anni nga problema i neparubang ta ollu ira nga Cristiano?

• Sinni i nappoffunan da Pablo, Bernabe, anna na tanakuan paga tapenu masolba i problema?

Bibbigan i Kingngua 15:12-18, 23-29, anna paguvovugan yaw nga pakkiavu:

• Nige nga naddesision i manangngal nga baggi, anni i kingnguada tapenu malawa i pangigiya na Dios?​—Innan i versikulo 12, 15, anna 28.

Bibbigan i Kingngua 15:30, 31 anna 16:4, 5, anna paguvovugan yaw ira nga pakkiavu:

• Anni i reaksion na ollu ira nga Cristiano ta instruksion nga niyawa na manangngal nga baggi?

• Kunnasi nga binendisionan ni Jehova i panuttulda tatun?

Bibbigan i 2 Timoteo 3:16 anna Santiago 1:5, anna paguvovugan yaw nga pakkiavu:

• Anni i makoffun ta Manangngal nga Baggi sangawe ta pagangnguada tu desision?

 ANNI I NAGIGIAMMUM?

I Manangngal nga Baggi i “mekatalo anna nannono nga doroban” nga sinunno ni Cristo. Mangiyawa ira tu direksion anna espiritual nga makan ta Cristiano ira ta interu mundo.

Review

• Sinni i nanunno ta “mekatalo anna nannono nga doroban”?

• Kunnasi ittam nga tattangngallan na Manangngal nga Baggi?

• Mangurug ka kari nga i Manangngal nga Baggi i “mekatalo anna nannono nga doroban”?