LEKSION 55
Suportan i Kongregasiommu
Ta interu mundo, minillion i magayayya nga maddayarayaw kani Jehova ta rinivu nga kongregasion. Magayayya ira ta malawada nga instruksion anna ta magiggigiammuda. Kakayàda gapa nga suportan i kongregasiodda. Kunnatun kari gapa i matageno mu ta kongregasiommu?
1. Kunnasim nga meyusa i tiempo anna sikammu tapenu suportan i kongregasion?
Awayya tam ngamin i manguffun ta kongregasion. Angngariganna, egga kari i kakongregasiommu nga manakam ngana onu infirm? Awayyam kari ira uffunan nga magatende ta study? Onu awayyam kari ira uffunan ta tanakuan paga ira nga gannug, kagitta na paggatang tu kawagadda onu pappakarenu ta baleda? (Bibbigan i Santiago 1:27.) Awayya tam gapa mabboluntariu nga mappakarenu anna mammentena ta Kingdom Hall tam. Awan tu mamilit nittam nga magangngua tu kunnaw ira nga gannug. I aya tam ta Dios anna ta wawwaragi tam i mamaguyu nittam nga “sigga-paran” nga manguffun.—Salmo 110:3.
Aru i makua na bawtisadu ira tapenu masuportan i kongregasion. Awayya na kualipikadu ira nga lallaki i masserbi nga ministerial nga aripan anna elder. Awayya na wawwaragi i masserbi nga payunir tapenu aktibo nga masuportan i trabahu nga pallayyagayya. Manguffun gapa i karuan nga Saksi ta pappataddag ta lugar ira nga paddayarayawan onu magali ira ta kongregasion nga makawag tu uffun.
2. Kunnasi tam nga meyusa i pakkukua tam ira tapenu suportan i kongregasion?
Awayya tam nga ‘medayaw si Jehova gukaban na nabalor ira nga pakkukua tam.’ (Proverbio 3:9) Magayayya ittam nga usan i kuartu anna i pakkukua tam ira tapenu suportan i kongregasiottam anna i trabahu nga pallayyagayya ta interu mundo. (Bibbigan i 2 Corinto 9:7.) Meyusa i donasiottam ira tapenu moffunan i biktima ira na kalamidad. Aru i dati ngana “mangisina” tu kuartuda nga idonada. (Bibbigan i 1 Corinto 16:2.) Awayya tam maddona ta lugar ira nga paddayarayawattam onu ta online ta donate.pr418.com. Iniddan ittam ni Jehova tu oportunidad nga ipasingan i aya tam nisa gukaban na pangusa tam ta pakkukua tam.
GIGIAMMUAN I ARU PAGA
Ammuan i karuan nga makuam tapenu masuportammu i kongregasion.
3. Awayya tam usan i pakkukua tam
Ayatan ni Jehova anna ni Jesus i magayayya nga mangiyawa. Angngariganna, kinomendan ni Jesus i tadday nga balu nga naddona lagapa maski nu mariga laman i pattolena. Bibbigan i Lucas 21:1-4, anna paguvovugan yaw ira nga pakkiavu:
-
Mawag kari nga dakal i donasiottam tapenu mapagayayya si Jehova?
-
Anni i matageno ni Jehova anna ni Jesus nu napafutuan i donasiottam?
Girawan i VIDEO tapenu mammuan nu kunnasi nga meyusa i donasion ira. Kabalinna, paguvovugan yaw nga pakkiavu:
-
Kunnasi nga meyusa i donasion ira tapenu moffunan i kongregasion ira ta interu mundo?
4. Awayya tam mabboluntariu nga manguffun
Ta tiempo na Biblia, nallallappo i maddayarayaw ira kani Jehova tapenu mapattalupaddian nga marenu anna maayus i lugar nga paddayarayawadda. Ngem ari laman nga paddona tu kuartu i kawagan tatun. Bibbigan i 2 Cronicas 34:9-11, anna paguvovugan yaw nga pakkiavu:
-
Anni i kingngua na kada Israelita tapenu mapakappian anna mamentena i balay ni Jehova, onu i lugar nga paddayarayawan?
Girawan i VIDEO tapenu masingan nu kunnasi nga tuttulan na Saksi ira ni Jehova i ehemplo ta Biblia. Kabalinna, paguvovugan yaw ira nga pakkiavu:
-
Ngatta importante nga pattalupaddianattam nga marenu anna maayus i Kingdom Hall tam?
-
Kunnasi ka nga makoffun?
5. Awayya gawatan na lallaki i aru nga responsibilidad
Ipagaram na Biblia ta Cristiano nga lallaki nga gawatadda i kualipikasion ira tapenu mas aru i makuada ta passuporta ta kongregasion. Girawan i VIDEO tapenu masingan i tadday nga angngarigan. Kabalinna, paguvovugan i tumunug nga pakkiavu.
-
Ta video, anni i kingngua ni Ryan tapenu masuportan tu mapia i kongregasion?
Nipakanawag na Biblia i kualipikasion ira para ta lallaki nga masserbi nga ministerial nga aripan anna elder. Bibbigan i 1 Timoteo 3:1-13, anna paguvovugan yaw ira nga pakkiavu:
-
Anni ira i kualipikasion para ta lallaki nga masserbi nga ministerial nga aripan anna elder?
-
Kunnasi nakuan i kondukta na familiada?—Innan i versikulo 4 anna 11.
-
Nu mappursigi i lallaki nga gawatan yaw ira nga kualipikasion, kunnasi nga mabenefisiowan i ngamin ta kongregasion?
BAKA IYAVU NA KARUAN: “Pangapan na Saksi ira ni Jehova tu fundu para ta trabahuda?”
-
Anni i tabbag mu?
ANNI I NAGIGIAMMUM?
Kuruga appresian ni Jehova i pappursigi tam nga suportan i kongregasion gukaban na tiempo, sikan, anna pakkukua tam.
Review
-
Kunnasi tam nga meyusa i tiempo anna sikattam tapenu masuportan i kongregasion?
-
Kunnasi tam nga meyusa i pakkukua tam tapenu masuportan i kongregasion?
-
Anni ira i kayà mu kuan tapenu masuportan i kongregasion?
I AWAYYAM PAGA KUAN
Ammuan nu ngatta ari ngana ikikkiddaw na Dios i pangiyawa tu pakkafulu.
“Anni i Kagian na Biblia Meyannung ta Pakkafulu?” (Artikulo ta website)
Egga ira i nakagi ta Biblia nga annungan nga meyawa ta bawtisadu ira nga lallaki. Ngem kunnasi nu babay i magangngua taw nga annungan?
“I Unnug na Pakka-ulu ta Kongregasion” (Passifusifutan, Pebrero 2021)
Girawan i dakal nga sakrifisio na magutu ira nga brother tapenu metulug i publikasion ira ta kapangngurugda.
Ammuan i neruman na finansial nga passuporta na Saksi ira ni Jehova ta trabahuda kumpara ta tanakuan nga relihion.
“Sitaw i Paggafuan na Fundu na Saksi ira ni Jehova Para ta Trabahuda?” (Artikulo ta website)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
