LEKSION 56
Pattalupaddianan i Pattaradday ta Kongregasion
Nu kavulu tam i kapangngurug tam, matageno tam i kinagi ni Patul David: “Kuruga makapabbaw, kuruga makasta nu i totolay na Dios ay mattaradday ira!” (Salmo 133:1) Ari nga automatiko i pattaradday tam. Egga i mawag nga kuattam tapenu mapattalupaddian yatun.
1. Anni i masingi-singan ta totolay na Dios?
Nu magatende ka ta study ta tanakuan nga lugar, awayyana nga ariammu mantindian i lengguaheda, ngem siguradu nga komfortable ka lagapa. Ngatta? Megafu ta parehu nga publikasion i meyusa ta paggigiammu tu Biblia. Ikagumattam gapa nga ipasingan i aya ta kataggi-tadday. Maski nu sitaw i diattam, sittam ngamin ay “magagal ta ngagan ni Jehova, anna mattaradday nga maddayaw sa.”—Zefanias 3:9.
2. Anni i makuam tapenu mapattalupaddian i imammo?
“Makka-aya-aya kamu gafu ta napafutu.” (1 Pedro 1:22) Kunnasim meyaplika yaw nga tabarang? Imbes nga maffokus ka ta pakkafian na tanakuan, maffokus ka lallagu ta makasta ira nga kualidadda. Ariammu laman gapa makikavulu ta kaparehum tu paginteresan onu kakayàda i kakayà mu. Ammuammu gapa i wawwaragi ira nga ariammu kaparehu. Ikagumattam gapa nga alsan i maski anni laman nga pangireruma nga matageno tam.—Bibbigan i 1 Pedro 2:17. a
3. Anni i kuammu nu egga i ariannu nakka-intindian na kapangngurug mu?
Egga i pattaradday tam, ngem imperfekto ittam gapa. Nu mittan madismaya onu matakitattam i kataggi-tadday. Yari tu kagian na Uvovug na Dios: “Mawag tu makkapaka-pakoma kamu ta kunna nipamakoma na Yafu nikamu.” (Bibbigan i Colosas 3:13.) Kanayuttam nga matakitan si Jehova, ngem kanayunna ittam nga pakoman. Yari tu kayàna nga pakomattam gapa i wawwaragi tam. Nu matageno mu nga egga i natakitammu, aranniammu nakuan yayya anna makippakoma ka.—Bibbigan i Mateo 5:23, 24. b
GIGIAMMUAN I ARU PAGA
Ammuan nu anni ira i makuam tapenu mapattalupaddian i pattaradday anna imammo ta kongregasion.
Kunnasi ka makippakoma?
4. Ariammu mangireruma
Kayà tam nga ayatan i ngamin nga wawwaragi tam. Ngem awayyana nga marigatan ittam nga alawatan i ariattam nga kaparehu. Anni i makoffun? Bibbigan i Kingngua 10:34, 35, anna paguvovugan yaw ira nga pakkiavu:
-
Alawatan ni Jehova i nadduruma nga totolay nga mabbalin tu Saksina. Kunnasim yayya maparigan ta pagimamma mu ta totolay nga ariammu kaparehu?
-
Anni nga pangireruma i masingi-singammu ta lugarnu i ariammu kayà nga parigan?
Bibbigan i 2 Corinto 6:11-13, anna paguvovugan yaw nga pakkiavu:
-
Kunnasi ka mas mabbalin tu madukko ta wawwaragi ira nga ariammu kaparehu?
5. Mamakoma anna makippakoma
Ari vuluvuga kawagan ni Jehova i pamakoma tam, ngem kanayunna ittam nga pakoman. Bibbigan i Salmo 86:5, anna paguvovugan yaw ira nga pakkiavu:
-
Anni i kuan ni Jehova nu makaliwa ittam?
-
Ngatta mappappabalo ka nga minammakoma yayya?
-
Anni ira nga situasion nga marigatan ittam nga mamakoma anna makippakoma?
Kunnasi tam maparigan si Jehova anna mapattalupaddian i pattaradday tam na wawwaragi tam? Bibbigan i Proverbio 19:11, anna paguvovugan yaw nga pakkiavu:
-
Anni i makasta nga kuammu nu natakitan naka na tanakuan?
Nu mittan matakitattam i tanakuan. Anni i kuattam nu mesimmu yatun? Girawan i VIDEO, anna paguvovugan i tumunug nga pakkiavu.
-
Kunnasi nakippakoma i sister?
6. Maffokus ta makasta ira nga kualidad na wawwaragi
Nu mabbalittam tu madukko ta wawwaragi tam, masingattam i makasta ira nga kualidadda anna i pakkafiadda. Kunnasi ittam nga maffokus ta makasta ira nga kualidadda? Girawan i VIDEO, anna paguvovugan i tumunug nga pakkiavu.
-
Anni i makoffun nikaw tapenu masingan i makasta ira nga kualidad na wawwaragi?
Iinnan ni Jehova i makasta ira nga kualidad tam. Bibbigan i 2 Cronicas 16:9a, anna paguvovugan yaw nga pakkiavu:
-
Anni i matageno mu megafu ta ammum nga iinnan ni Jehova i makasta ira nga kualidad mu?
Maski i makakkasta nga diamante ay egga i defektona, ngem nabalor lagapa. Kunnatun gapa ta wawwaragi tam, imperfekto ira, ngem nabalor lagapa ira kani Jehova
I KAGIAN NA KARUAN: “Ariakku mamakoma nu ariakku masingan nga fermi i pabbabawina.”
-
Ngatta sigga-parattam nakuan nga mamakoma?
ANNI I NAGIGIAMMUM?
Mapattalupaddiammu i pattaradday ta kongregasion nu minammakoma ka anna ayatammu i ngamin nga wawwaragi.
Review
-
Anni i makuam tapenu ari ka mangireruma?
-
Anni i kuammu nu egga i ariannu nakka-intindian na kapangngurug mu?
-
Ngatta kayà mu parigan i pamakoma ni Jehova?
I AWAYYAM PAGA KUAN
Ammuan nu kunnasi ittam moffunan na ilustrasion ni Jesus tapenu meyemmang nga husgan i tanakuan.
Kawagattam kari i makippakoma maski nu gittana awan tu liwa tam?
“Pakippakoma—I Dalan ta Imammo” (Passifusifutan, Nobiembre 1, 2002)
Innan nu kunnasi nagigiammu na karuan nga ari mangireruma.
Ammuan nu kunnasim masolba i problema ta tadday nga wagi tapenu ari nga madaral i imammo na kongregasion.
“Solban i Ari Pakkarantindian Gukaban na Aya” (Passifusifutan, Mayo 2016)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
