LEKSION 57
Kunnasi nu Nakakua Ka tu Madammo nga Liwa?
Maski nu kuruga iddeddukattam si Jehova anna kuattam i ngamin tapenu mapagayayya yayya, makaliwa ittam lagapa nu karuan. Egga ira i liwa nga mas madammo kumpara ta tanakuan. (1 Corinto 6:9, 10) Nu nakakua ka tu madammo nga liwa, ariammu nakuan nonopan nga ariannaka ngana iddeddukan ni Jehova. Ayatan naka lagapa. Mapakoma naka anna uffunan naka.
1. Anni i mawag nga kuattam tapenu pakoman ittam ni Jehova?
Kuruga maraddam i mangaya ira kani Jehova nu nakakua ira tu madammo nga liwa. Ngem mabanna-bannayan ira ta promesa ni Jehova ta totolena: “Maski nu kagitta na eskarlata i liwi-liwanu, mapafuraw yatun nga kagitta na niebe.” (Isaias 1:18) Nu napafutuan nga mabbabawi ittam, pakoman ittam ni Jehova. Kunnasi tam mepasingan i pabbabawi tam? Iyemmattam i marake nga kukukuattam anna ipakimemallo kani Jehova nga pakomanna ittam. Mappursigi ittam nga ulian i marake nga appana-panono onu annangngua nga nakaliwatattam, anna tuttulattam i marenu nga estandarte ni Jehova.—Bibbigan i Isaias 55:6, 7.
2. Kunnasi nga usan ni Jehova i elder ira tapenu uffunan ittam nu nakaliwa ittam?
Nu nakakua ittam tu madammo nga liwa, kayà ni Jehova nga ‘agalattam i mannakam ira’ ta kongregasion. (Bibbigan i Santiago 5:14, 15.) Ayatan na elder onu mannakam ira si Jehova anna i karneruna ira. Moffunadda ittam tapenu metoli i makasta nga relasiottam kani Jehova.—Galacia 6:1.
Kunnasi ittam nga moffunan na elder ira nu nakakua ittam tu madammo nga liwa? Dua onu tallu nga elder i mangitunung nittam. Usadda i Biblia nga manabarang nittam. Mangiyawa gapa ira tu praktikal nga suhestion anna pamagaram tapenu malillitattam nga kuan uli i nakaliwatattam. Malsa gapa ta kongregasion i sinni laman nga nakakua tu madammo nga liwa nga ari mabbabawi tapenu maprotektan i kongregasion ta marake nga influwensia.
GIGIAMMUAN I ARU PAGA
Appresian i panguffun nittam ni Jehova nu makakua ittam tu madammo nga liwa.
3. Makoffun i pangikagi tam ta liwa tam
Matakitan si Jehova nu makaliwa ittam. Yari tu mepangngo laman nga ikagi tam nisa i liwa tam. Bibbigan i Salmo 32:1-5, anna paguvovugan yaw nga pakkiavu:
-
Ngatta makasta nu ikagi tam i liwi-liwa tam kani Jehova imbes nga ilimag tam yatun?
Fuera ta pangikagi tam ta liwi-liwa tam kani Jehova, mabanna-bannayan ittam gapa nu mappoffun ittam ta elder ira. Girawan i VIDEO, anna paguvovugan i tumunug nga pakkiavu.
-
Kunnasi nga noffunan na elder ira si Canon tapenu makatoli kani Jehova?
Mawag nga kagiattam i kurug ta elder ira; moffunadda ittam. Bibbigan i Santiago 5:16, anna paguvovugan yaw nga pakkiavu:
-
Ngatta mas mabi para ta elder ira nga uffunan ittam nu kagiattam i kurug?
Kagiammu i liwa mu, ikagim i kurug ta elder ira, anna alawatammu i meddu nga uffun ni Jehova
4. Ikallo ni Jehova i nakaliwa ira
Nu manaki na tadday nga nakakua tu madammo nga liwa nga tuttulan i estandarte ira ni Jehova, malsa yayya ta kongregasion, anna ariattam makikavulu nisa. Bibbigan i 1 Corinto 5:6, 11, anna paguvovugan yaw nga pakkiavu:
-
Nu kunnasi nga pagalsan na lebadura i interu nga masa, kunnasi gapa nga mainfluwensian i kongregasion nu makikavulu ittam ta ari mabbabawi nga nakaliwa?
Parigan na elder ira i pangikallo ni Jehova nu ikagumadda nga alegan anna uffunan i ngamin nga nalsa ta kongregasion. Aru i nanoli gabbalaman ta kongregasion, maski gare nu mataki i nika-disiplinada, nakoffun yatun tapenu manonoda nga marake i kingnguada.—Salmo 141:5
Ngatta makagi tam nga rasonable, minangngikallo, anna meddu i pattratu ni Jehova ta nakaliwa ira?
5. Pakoman ittam ni Jehova nu mabbabawi ittam
Nangiyusa si Jesus tu ilustrasion tapenu mammuattam nu anni i matageno ni Jehova nu mabbabawi i tadday. Bibbigan i Lucas 15:1-7, anna paguvovugan yaw nga pakkiavu:
-
Anni i magigiammu tam taw meyannung kani Jehova?
Bibbigan i Ezekiel 33:11, anna paguvovugan yaw nga pakkiavu:
-
Kunnasi nga mepasingan na tadday nga talaga mabbabawi yayya?
Kagitta na tadday nga pastor, kuruga ikavurungan ni Jehova i karneruna ira
I KAGIAN NA KARUAN: “Maganassing ngà nga malsa ngà ta kongregasion nu kagiakku ta elder ira i liwa ku.”
-
Anni i kagiammu ta tadday nga kunnatun i matagenona?
ANNI I NAGIGIAMMUM?
Nu nakakua ittam tu madammo nga liwa ngem napafutuan nga mabbabawi ittam anna determinadu ittam nga iyemmang i magangngua tu marake, pakoman ittam ni Jehova.
Review
-
Ngatta makasta nu ikagi tam kani Jehova i liwi-liwa tam?
-
Anni i mawag nga kuattam tapenu pakoman ittam ni Jehova ta liwi-liwa tam?
-
Nu nakakua ittam tu madammo nga liwa, ngatta mawag nga mappoffun ittam ta elder ira?
I AWAYYAM PAGA KUAN
Girawan nu kunnasi nga naekspiriensa na tadday nga lalaki i allo ni Jehova nga nakagi ta Isaias 1:18.
Kunnasi nga uffunan na elder ira danuri nakaliwa tu madammo?
“Nu Kunnasi Ipasingan na Elder ira i Aya Anna Allo ta Nakaliwa Ira” (Passifusifutan, Agosto 2024)
Ammuan nu kunnasi mepasingan i aya anna allo ta nakaliwa ira nga ari mabbabawi.
“Uffun Para Tari ta Nalsa ira ta Kongregasion” (Passifusifutan, Agosto 2024)
Ammuan ta istoria nga “Mawag Ku i Manoli Kani Jehova,” nu kunnasi nga natageno na tadday nga lalaki nga niyaranni uli yayya ni Jehova ta kinakurug.
“Pakastan na Biblia i Pattolay” (Passifusifutan, Abril 1, 2012)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
