Nu ikaya tam nga mapagayayya si Jehova, mawag tu magginna ittam ta tadday paga nga importante nga persona. Nige ni Adan, pinaro labbi na Dios ta langi i tadday nga makapangngua nga anghel.

Zimittal i tiempu tu zinog ni Jehova yaw nga anghel. Niyana yayya na tadday nga birhen nga mangngagan tu Maria ta Betlehem. Yaw nga abbing ay nangaganan tu Jesus.—Juan 6:38.

Nguri ta nabbalin tu tolay, perfekto nga naparigan ni Jesus i ugali na Yama na nga Jehova. Masippo, minangngaya anna mabi yayya nga marannian. Awang tu anassin na nga nanuddu tu kinakurug meyannung kani Jehova.

Nikalussaw na lider ira na relihion tagga si Jesus gafu ta kinagi na ta totolay i marakay nga panuddu-tuddu anna annangngua da.

Pinammapia gapa ni Jesus i mataki nga totolay anna pinaginnolay na i karuan ta natay ira.

Kinumbinsi na lider na relihion i Romano ira tapenu masissillaran anna mapapatay si Jesus.