Niyawa na Dios i davvun ta totolay. Yaw i paddianattam. Yari gavu tu arianna pinaratu da Adan anna Eva tu maddian ta langi​—i anghel ira i pinaratuna nga maddian ta langi. (Job 38:4, 7) Nipay na Dios si Adan ta kekkasta nga paraiso nga nagalan tu hardin na Eden. (Genesis 2:15-17) Niyawa ni Jehova nisa anna ta mabbalin tu ana na ira i posibilidad nga maka-pagayayya nga mattolay tu mannanayun ta davvun.​—Bibbigammu i Salmo 37:29; 115:16.

Ta gafu na, i hardin na Eden lamang i paraiso. Kinagi na Dios ta ollu nga magatawa tu pannuadda i davvun tu gaka da. Tangngawadda anna pabbalinadda yaw tu paraiso. (Genesis 1:28) Ari vuluvuga nga madaral i davvun. Yaw i paddianan na totolay tu mannanayun.​—Bibbigammu i Salmo 104:5.

Girawan i video nga Ngatta Pinaratu na Dios i Davvun?

Ari nga pinarulo da Adan anna Eva si Jehova yari tu pinalawanna ira ta hardin. Nawawang i paraiso. Awan tu makawayya maski sinni tu tolay nga mangitoli tatun. Kagian na Biblia: “Neyawa i mismu nga davvun ta lima na tadday tu marakay.”​—Job 9:24.​—Bibbigammu i Genesis 3:23, 24.

Ari kari natuppal ni Jehova i orihinal nga gakkag na ta totolay? Ari! Makapangngua-sa-ngamin i Dios. Arianna maffalliu. (Isaias 45:18) Tuppalanna nu anni orihinal nga ginakkagna para ta totolay.​—Bibbigammu i Salmo 37:11, 34.

Metoli i paraiso ta davvun ta pammaguray ni Jesus tu Patul na Dios. Ta gerra nga magalan tu Armagedon, irollu ni Jesus i anghel ira na Dios tapenu daraladda ngamin danuri kumontra ta Dios. Kabalinna, ifuku ni Jesus si Satanas ta 1,000 nga dagun. Mapaliag danuri totolay na Dios gafu ta igiyya anna  protektan ira ni Jesus. Maka-pagayayya ngana ira nga mattolay tu mannanayun ta Paraiso nga davvun.​—Bibbigammu i Apocalipsis 20:1-3; 21:3, 4.

Sonu anni na pagimmangan na Dios i kinarakay ta davvun? Nangiyawa si Jesus tu “pagisenyalan” nga mangipasingan nga aranni ngana i panuppalan. Ipasingan na maddagun nga kananassing nga mesissimmu ta mundo tu mattolay ittam ngana ta “panuppalan na sistema na ganna-gannug.”​—Bibbigammu i Mateo 24:3, 7-14, 21, 22.

Ta 1,000 nga dagun na pammaguray ni Jesus ta davvun, alzan na ngana i ngamin nga ziga-riga. (Isaias 9:6, 7; 11:9) Fuera paga ta passerbi ni Jesus tu Patul, yayya i Katannangan nga Pari nga mangalza ta ngamin nga liwa-liwa danuri na mangiddu ta Dios. Gafu kani Jesus, alzan na Dios i taki-taki, pallakay onu pabbako anna i patay.​—Bibbigammu i Isaias 25:8; 33:24.

Danuri mamarulo ta Dios i mattolay ta mappange nga Paraiso. (1 Juan 2:17) Zinog ni Jesus i totolay na onu disipulo na nga aleradda anna tudduadda i minappakalinno ira nu kunnasi i mabbalin tu mapia ta imamma na Dios. Maddagun nga iprepara ni Jehova i minillion nga totolay para ta mappange nga Paraiso ta davvun. (Zefanias 2:3) Ta Kingdom Hall na Saksi ira ni Jehova, madidiamu na totolay nu kunnasi nga mabbalin tu mapia nga atawa anna yama onu yena. Mavvurulu nga maddaya-rayaw anna maddidiamu i anà anna magana nu kunnasi ira nga mabenefisiowan ta makakkasta nga balita. ​—Bibbigammu i Mikas 4:1-4.