Ikaya na Dios tu makapagayayya nga mattolay i totolay ta davvun. Megafu ta ayâ na nittam, pinaratuna i davvun anna ngamin nga egga ta. Aranni ngana nga iddan na Dios tu mas makasta nga pattolay i totolay ta interu davvun. Alzanna ngaming i kegafuan na ziga-riga.​—Bibbigammu i Jeremias 29:11.

Awan paga tu gobiernu nga naka-alza ta kinarakay, taki anna patay. Ngem egga i makakkasta nga balita! Ari mabbayag, tallianan na gobiernu na Dios i ngamin nga gobiernu na totolay. Mapeggan tu imammo anna mapia nga gawa-gawayyang i sakup natun nga gobiernu.​—Bibbigammu i Isaias 25:8; 33:24; Daniel 2:44.

Magimmang lamang i ziga-riga sonu alzan na Dios i marakay nga totolay ta davvun. (Zefanias 2:3) Sonu anni mesimmu yatun? Neprofesiya ta Uvovug na Dios i mamaganassing nga mesissimmu ta interu mundo. Ipasingan na maddagun nga mesissimmu tu aranni ngana i tiempu na pammanunnu na Dios.​—Bibbigammu i 2 Timoteo 3:1-5.

Mawag tu madidiamu tam i meyannung ta Dios ta Uvovug na—i Biblia. Kagitta yatun na tura nittam na minangngaya nga yama. Kagianna nu kunnasi tam mattolay tu mas makasta sangawe anna nu kunnasi tam mapeggan tu pattolay nga mannanayun ta davvun ta mappange. Egga karuan sangoye tu mangontra ta paddidiamum ta Biblia. Ngem arriammu ipamavulun! Kakenga gapa nu mawawwammu i mas makasta nga pattolay ta mappange.​—Bibbigammu i Proverbio 29:25; Apocalipsis 14:6, 7.