Nelangitan nga gobiernu i Pappatulan na Dios. Yaw i manali ta ngamin nga gobiernu anna iyusa na Dios tapenu makua i uray na ta langi kunne gapa ta davvun. Makakkasta nga balita i meyannung ta Pappatulan na Dios. Aranni ngana nga iyawa na Pappatulan na Dios i kawagan na totolay nga makakkasta tu gobiernu. Pattaraddayan naw i ngamin nga egga i inango na ta davvun.​—Bibbigammu i Daniel 2:44; Mateo 6:9, 10; 24:14.

Mawag tu egga i patul na tadday tu pappatulan. Pinili ni Jehova i ana na nga si Jesu-Cristo tu Patul na Pappatulan Na.​—Bibbigammu i Apocalipsis 11:15.

Girawan i video nga Anni i Pappatulan na Dios?

I ana na Dios i mepangngo tu Patul gafu ta minaggallallo yayya anna itaddagganna nu anni i kurug. (Mateo 11:28-30) Tadday paga, megafu ta egga yayya ta langi anna nelangitan i Pappatulan na, egga i pakapangngua na nga manuffun ta totolay. Kabalinna nga napaginnolay, minune yayya ta langi anna nagitubang ta ziwanan ni Jehova tapenu maginnag. (Hebreo 10:12, 13) Pagultimuanna, iniddan na Dios yayya tu pakapangngua nga mamegafu ngana mammaguray.​—Bibbigammu i Daniel 7:13, 14.

I tadday nga grupo nga magalan tu “masanto nga totolay” i kavulu ni Jesus ta langi nga mammaguray. (Daniel 7:27) Ollu nga napili tu masanto nga totolay i matalo nga apostoles ni Jesus. Adde sangawe, mappili-pili paga laman si Jehova tu matalo nga lallaki anna babbay tu masanto nga totolay. Kagitta ni  Jesus, mapaginnolay ira tu espiritu.​—Bibbigammu i Juan 14:1-3; 1 Corinto 15:42-44.

Piga i umay ta langi? Kinagi ni Jesus tu “baddi nga grupo” lamang ira. (Lucas 12:32) Egga bilang da tu 144,000. Kavulu ira ni Jesus nga mammaguray ta davvun.​—Bibbigammu i Apocalipsis 14:1

Namegafu mammaguray i Pappatulan na Dios nguri ta 1914. * I ollu nga kiningngua ni Jesus kustu nabbalin yayya tu Patul ay nitabbona si Satanas anna i demonio na ira ta davvun. Nepallo i paggaggazzi ni Satanas yari tu pinegafuananna i mamanggulu ta interu mundo. (Apocalipsis 12:7-10, 12) Namegafu tagga, kuruga nazziga-riga ngana i totolay. I gegerra, bisi-bisin, epidemia anna luni-lunig ay parte na “pagisenyalan” nga aranni ngana nga duttal i Pappatulan na Dios ta davvun.​—Bibbigammu i Lucas 21:7, 10, 11, 31.

Gukaban na pallayya-gayya ta interu mundo, maddagun nga pattaraddayan na Pappatulan na Dios i totolay ta ngamin nga nasion. Minillion nga minappakalinno nga totolay i mabbalin tu sakup na Pappatulan na Dios nga si Jesus i Patul na. Protektan ira na Pappatulan na Dios sonu daralanna i marake nga sistema na ganna-gannug ta davvun. Yari tu i ngamin nga maya tu mabenefisiowan ta Pappatulan na Dios ay mawag tu mannammuadda nu kunnasi mabbalin tu minammarulo nga taga-tuttul ni Jesus.​—Bibbigammu i Apocalipsis 7:9, 14, 16, 17.

Ta tiempu na 1,000 nga dagun, kuan na Pappatulan i orihinal nga gakkag na Dios para ta totolay. Mabbalin tu paraiso i interu mundo. Pagultimuanna, itoli ni Jesus i Pappatulan ta Yama na. (1 Corinto 15:24-26) Sinni ikaya mu pangikagianan meyannung ta Pappatulan na Dios?​—Bibbigammu i Salmo 37:10, 11, 29.