Ta ngamin nga relihion, egga totolay nga napafutuang angngurugda. Kuruga makakkasta nga balita tu ikakua na Dios danatun nga totolay. Ngem kaddaraddam makannamuan tu meyoyosa i relihion tu instrumentu ta marake nga anangngua. (2 Corinto 4:3, 4; 11:13-15) Magigginna ta balita tu i karuan nga relihion egga i partisipasion da ta terorismo, genocide (pammapatay ta interu nga rasa), gerra anna pammolestia ira ta abbarabbing. Kuruga makaparaddam yaw ta totolay nga napafutuang i angngurug da ta Dios.​—Bibbigammu i Mateo 24:3-5, 11, 12.

Dayawan na fustu nga relihion i Dios ngem mangipepasiran gapa ta Dios i falsu nga relihion. Ituttuddu na falsu nga relihion i ideya ira nga awan ta Biblia kagitta na falsu nga tuddu meyannung ta Dios anna ta natay. Ngem, ikaya ni Jehova tu kannammuan na totolay i kinakurug meyannung nisa.​—Bibbigammu i Ezekiel 18:4; 1 Timoteo 2:3-5.

Makapagayayya mammuan tu i Dios ari nga melologo na relihion ira nga makkagi tu iddukadda yayya ngem ta kakuruganna, i mundo ni Satanas i iddukadda. (Santiago 4:4) Sigun ta Biblia, magalan tu “Dakal nga Babilonia” i ngamin tu falsu nga relihion. Tadday tu siudad tagga i Babilonia nga namegafuan na falsu nga relihion kabalin na Delubio ta tiempu ni Noe. Aranni ngana daralan na Dios i ngamin nga falsu nga relihion tu mangilologo anna mangab-abuso ta totolay.​—Bibbigammu i Apocalipsis 17:1, 2, 5, 16, 17; 18:8.

Aru paga i makakkasta nga balita. Sigganono si Jehova ta totolay nga napafutuan i angngurugda ngem egga ira ta falsu nga relihion. Pattaraddayan na Dios danatun nga totolay gukaban na pangitudduna nira tu kinakurug.​—Bibbigammu i Mikas 4:2, 5.

Iddukan ni Jehova i totolay nga egga pangayâda ta kinakurug anna mapia. Apuran na Dios tu panawadda i falsu nga relihion. Nu fustu pangiddu na totolay ta Dios, sigga-annugu ira nga manguli.​—Bibbigammu i Apocalipsis 18:4.

Ta ollu nga siglo, kustu naginna na matunung nga totolay ta apostoles i makakkasta nga balita, nagayayya ira. Nakannammuadda kani Jehova i bagu tu pattolay​—i makapagayayya nga pattolay nga egga gakkag anna iddanama na. Makasta nga ehemplo ira nittam gafu ta tinuppalda nu anni i naginnada yari tu nipoppolluda si Jehova ta pattolayda.​—Bibbigammu i 1 Tesalonica 1:8, 9; 2:13.

Alawatan ni Jehova ta familia na nga maddaya-rayaw nisa danuri i nanaw ta falsu nga relihion. Nu alawatammu i pangimbita niko ni Jehova, awayyam mabbalin tu kofun na. Kunne na gapa, mebilan ka ta meddu nga familia na maddaya-rayaw kani Jehova anna mattolay ka tu mannanayun.​—Bibbigammu i Marcos 10:29, 30; 2 Corinto 6:17, 18.

Aranni ngana kastiguan na Dios i falsu nga relihion. Kuruga makakkasta nga balita yatun! Mapawan danuri abusadu tu totolay ta interu mundo. Awan ngana tu falsu nga relihion tu mangilologo anna mamassirina ta totolay. Mattaradday i ngamin ta paddaya-rayaw ta tattadday nga kurug nga Dios.​—Bibbigammu i Apocalipsis 18:20, 21; 21:3, 4.